Hizkuntza eskubideak

Kontsumitzaile euskaldunak, "babesik gabe"

Kontseiluak "elkarlana" eskaini diete instituzioei, "urrats ausartak egiteko garaia delako eta denon lanaren beharra dagoelako".

'Merkataritzan eta ostalaritzan ere euskaraz' kanpainako txartel bat, denda bateko sarreran.
'Merkataritzan eta ostalaritzan ere euskaraz' kanpainako txartel bat, denda bateko sarreran. Andoni Canellada / Argazki Press

Gotzon Hermosilla -

2015eko otsailak 17

Kontsumitzaile eta Erabiltzaileen Hizkuntza Eskubideei buruzko Dekretuaren betetze maila aztertu zuen joan den astean Eusko Jaurlaritzak. Gauza bera egin du orain Euskararen Gizarte Erakundeen Kontseiluak. Bi metodologia desberdin erabili dituzte dekretua noraino betetzen den neurtzeko, baina kasu bietan emaitzak “berdin-berdinak” dira, Paul Bilbao Kontseiluaren idazkari nagusiak esan duenez: dekretua ez dira betetzen ari. Kontseiluaren ikerketaren arabera, hamar enpresatik zazpik ez dute betetzen.

Bilbaok gogoratu du dekretuaren balorazio positiboa egin zutela argitaratu zutenean, “euskaldunen hizkuntza eskubideak aitortzen zituelako, eta eskubide horiek betetzeko epeak ezartzen zituelako”, baina, era berean, akordura ekarri du dekretua betetzen ez zuten enpresentzako ondorioak kendu zituztenean egoera hau gertatuko zela ohartarazi zutela: “Zehapenik gabeko dekretua homilia baino ez da, diskurtso hutsa”, esan du Bilbaok.

Horregatik, dekretua aldatzeko eta han zehapenak berriro txertatzeko eskatu du Kontseiluak, ikusi dutelako "borondate hutsean oinarritzeak noraino" eraman dituzten. Gogoratu du dekretua egiteko oinarritzat hartu zituzten ereduek, Kataluniakoak eta Quebecekoak, argi zehazten dutela zein ondorio izango duen hiztunen hizkuntza eskubideak urratzeak, eta, era berean, gogoratu du Espainiako legediak 500 arau baino gehiago dituela gaztelaniaren erabilera bermatzeko. “Elkarlana” eskatu eta eskaini die euskal instituzioei bide horretan aurrera egiteko.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna
S: