Webgune honek cookie-ak erabiltzen ditu zure nabigazioa errazteko, publizitatea erakusteko eta analisi estatistikoak egiteko. Nabigatzen jarraitzen baduzu, hauen erabilera onartzen duzula ulertuko dugu. Informazio gehiago nahi baduzu, kontsultatu Cookie Politika

X

Berria.eus

Politika Cazeneuve: "Zuzenbide estatuaren arauak jarraituz armagabe daitezela"

Publizitatea

Politika

ETAren armagabetzea

Cazeneuve: "Zuzenbide estatuaren arauak jarraituz armagabe daitezela"

Frantziako lehen ministroak "erraza" duela esan dio ETAri: "Justiziarengana jo, indarkeria utzi dutela esan, eta arma guztiak entregatu".
Bernard Cazeneuve Frantziako lehen ministroa, artxiboko argazki batean.
Bernard Cazeneuve Frantziako lehen ministroa, artxiboko argazki batean. EFE

2017-03-21 / Berria

"Arau judizialak errespetatuz" egin behar duela: horixe da Frantziako lehen ministro Bernard Cazeneuvek ETAren armagabetze asmoei emandako erantzuna. "Erraza" dutela: "Justiziarengana jo, indarkeria utzi dutela esan, eta arma guztiak entregatu". France Bleu irrati kateari emandako elkarrizketan mintzatu da lehen ministroa.

Frantziako Gobernua larunbat gauean mintzatu zen, lehen aldiz, ETAren armagabetzearen aferaz. Bruno Le Roux Barne ministroak, ohar baten bitartez, honela zioen: "Legearekin bat datorren armagabetze bat egoteko konponbide bakarra da agintariei jakinaraztea non dauden armategi horiek". Eta, Cazeneuven antzera, arma biletegiak eskuratzeko eskumena "aginte judizialari" dagokiola zioen hark ere.

Oraindik ere zeresana ematen ari baita joan den ostiralean Txetx Etxeberri gizarte ekintzaileak ETAren armagabetzeari jarritako eguna. Gaur, Catalunya Radion emandako elkarrizketan, ekintzaileak nabarmendu du prozesua bi aldeetako biktimekiko errespetuz egingo dela: "Gatazka hau oso luzea da, eta ez zen ETArekin hasi, 1936ko estatu kolpearekin baizik. Armagabetzeak hainbat atal desblokeatuko ditu, eta horrek ahalbidetuko du gure herriaren historiaren zati bat behin betiko ezagutaraztea".

Bide batez, gogorarazi du apirilaren 8a izango dela armagabetze hori egiteko eguna, eta atea zabalik utzi dio Frantziako Gobernuari ere prozesu horretan parte hartzeko, nahiz eta orain arte "erantzunik jaso ez". Frantziako Barne ministroak larunbat gauean ohartarazi zuen "aginte judizialari bakarrik" dagokiola armak jasotzeko eskumena.

Josu Erkorekak, bestalde, armagabetzea ez oztopatzeko deia egin du, eta zehaztu urrats horren ostean ETA bera desegitea litzatekeela hurrengo pausoa. "ETAk bere armak entregatzeko benetako aukera baten aurrean gaude, baina horren ondoren izango dira egiteko geratuko diren lanak, besteak beste, desegitea eta egindako mina aitortzea". Ordea, ohartarazi du kontu handiz hartu beharreko gaia dela armagabetzea: "Iraganean delitu larriak egiteko erabilitako armez ari gara".

Itxaropentsu agertu da Arnaldo Otegi ere armagabetzeak ekar ditzakeen ondorioez galdetuta. EH Bilduko bozeramailearen iritziz, haren ostean, testuinguru politikoa aldatu egingo da, nahiz eta Espainiako Gobernuak entzungor jarraitu. "Haientzat guztiak dira albiste txarrak, borroka armatua uztetik armagabetzeraino".

Segurtasun indarrak

EAEko PPko buru Alfonso Alonsok ohartarazi du Espainiako presidenteak ez duela esan segurtasun indarrek armagabetzea ahalbidetuko dutenik, legea betearaziko dutela baizik. "ETAk armak entregatu eta desegin egin behar du. Baina, desegiten denean, aurkituko duen bakarra legea izango da".

Ildo beretik jo du Fernando Buesa fundazioak ere. Ohar baten bidez zehaztu du "albiste ona" dela armagabetzea, baina ohartarazi du horrek "argitu gabeko 300 hilketak argitzeko" balio behar duela. "Benetan espero dugun albiste bakarra da ETA baldintzarik gabe desegin dela eta autokritika egin duela".