Euskal Herria

Euskal iheslari politikoek sorterrira itzultzeko lehen urratsari ekin diote

Euskal Iheslari Politikoen Kolektiboak sorterrira itzultzeko prozesuari hasiera emanen diola jakinarazi du Arrangoitzen. Laurogei iheslarik baino gehiagok parte hartu dute adierazpenean. Bideoa: gaurko agerraldia, Arrangoitzen (Hamaika TB).

Aitor Renteria -

2014ko martxoak 22

Azpimarratu dute itzulera ez dela bat-batean burutuko. Frantziak eta Espainiak gatazka politikoari ezarritako blokeoa gainditzeko xedean, konponbiderako ekarpena egin nahi dutela erran dute, itzuleraren lehen urratsa eginez. "Gatazkari soluzio orokorra ematea nahi du herriak, eta askatasunean bizitzeko duen nahia etengabe adierazten du". Iheslari politikoen urrats berria gatazka politikoaren konponbidean kokatzen dute. Euskal Herrian eta nazioartean, indarrak biltzen ari dira horren alde, egindako urrats bakoitza atzeraezina izan dadin eta aukera berriak ireki ditzan. Eragile ugariren sostengua dute norabide horretan.

Iheslariek joan den ekainaren 15ean egindako Herria Dugu Arnas ekitaldian plazaratu zuten haien ekarpena. Ildo horretan egindako urrats bat da gaurkoa. Izan ere, anitz dira munduan zehar sakabanatuak dauden iheslariak. Iheslariek berek aitortzen dute egoera horrek kolektiboari eragiten dizkion zailtasunak kide guztiak etxeratzeko. "Aukera eskaintzen duten egoerei gaurdanik soluzioak ematen hasteko hautua egin dugu". Ondorioz, egundik hasita, sorterriko plazetara itzultzeko urratsa egin dute, azpimarratuz preso eta iheslari politiko guztien itzulera mailakatua izan behar duela eta zentzuzko epe batean.

Konpromisozko urratsa dela nabarmendu dute, bide oso bat egin nahi duena. Azken iheslaria itzultzeko dinamika iraunkor eta sendo bat sortu behar da gizartetik, iheslarien iritziz, konponbide prozesua garatzeak, ezinbertzean, preso eta iheslari guztien etxeratzetik pasa behar duelako."Herritar bakoitza da askatasunerako giltza".