‘Desarme ideologikoa’

Anitzetan, Venezuelako bandera astintzen du Partidu Popularrak Espainiaren luze zabalean dituen ustelkeria kasuak estaltzeko. ETAren komodina ere erabiltzen du maiz, nahiz eta komodin horrek aspaldi eman zituen eman beharreko etekinak.

Nafarroan, UPNk eta PPk Uxue Barkos lehendakariari galdetu diote ea zergatik  elkartu zen Euskal Herriko bertze bi lehendakariekin eta armagabetze batzordearekin ETAren “antzezlanari” babesa emanez.

Lehendakariaren alderdiaren izenean, Gero Bairen izenean alegia, Koldo Martinezek erantzun dio galdera horri. Nafarroako Gobernuak armagabetzean eginiko urratsak goraipatu ditu Martinezek eta gaineratu du armagabetze hori “beharrezkoa” eta “premiazkoa” zela, baina etortzeko dagoen “desarme ideologikoa” are inportanteagoa dela.

Bai, jaun-andreok, duela pare bat aste Juan Ignacio Zoido Espainiako Barne ministroak erabili zuen esamolde berbera erabili zuen Martinezek atzo. Eta haratago joanez, garrantziaren araberako sailkapen bat egin zuen Martinezek, eta desarme ideologikoa benetako armak entregatzearen aitzinetik paratu zuen.

Geroa Baiko bozeramailearen hitzak euskaraz eta gaztelaniaz entzun nituen. Beraz, pentsatzen dut ez zirela bat-batean bururatu zitzaizkion adierazpenak izan. Hala ere, gustura irakurriko nuke Geroa Bai alderdi abertzaleak ETAren “desarme ideologiko” horretaz duen iritzia. Zuek ez?


[Euskalerria Irratiko Metropoli Forala saiorako ‘Minutu bateko manifestua’, 2017ko apirilaren 25ekoa] bannerra-EHI

Itxurak

Joaquin Zulategi izeneko abokatu batek hautagaitza aurkeztuko omen du Osasunan eginen dituzten hurrengo hauteskundeetan. Horixe lerroburua. Eta lerroburuarekin batera, Zulategiren argazki bat, Osasuna are gehiago zulatuko duela iradokitzen duena.

Ados, ados. Ez genioke jendearen irudiari erreparatu behar izanen, erabat injustua baita pertsonak itxuraren arabera epaitzea. Baina zer nahi duzue erratea?, Jesus Gilek Al Caponeren antza bazuen, eta esentzian, Al Capone zen.

ABC egunkari espainiarrarena da argazkia, Sevillako bere edizioan argitaratua. Horrek ematen digu irudiaren testuinguruaren berri, Zulategik Betis futbol taldearen zuzendaritzan sartu-atera azkar bezain polemikoa egin baitzuen.

Zulategiren gibelean zezen baten margolana ageri da. Eta zezenaren aitzinean, spanish vividor bat, Zulategi abizenekoa, adarrek sekula harrapatuko ez dutela pentsatzen duena. Ez dakit zuek, baina nik halako itxurarekin lotzen dut diru xahutze eutsiezina dela-eta ukitzen dituen toki guztiak zuloz betetzen dituen enpresaburuaren prototipoa: eskuindarren kopeta-ilea, amerikana zuria, gorbata beltza eta arrosa gorria paparrean. Eta irribarretsu, oso irribarretsu.

Badakit, badakit, ez genuke hain azalekoak izan behar. Baina nago mamira joko bagenu, are beldurgarriagoa litzatekeela kontua.

Zulategi. Ene.


[Euskalerria Irratiko Metropoli Forala saiorako ‘Minutu bateko manifestua’, 2017ko apirilaren 4koa] bannerra-EHI

Etiketa itsusia

Erosten ditudan gauzen etiketak eta osagaien zerrendak ikusteko mania dut. Tira, mania baino jarrera ideologikoa da, baina ulertzen dut inork maniatzat hartzea.

Gure kontsumo taldean hurbileko ekoizle txikien elikagai ekologikoak erosten ditugu (eta bidezko merkataritzakoak ere bai, noski). Baina hortik kanpo, erran nahi baita kontsumo taldetik kanpo erosten ditudan gauzei dagokienez, batez ere produktuaren jatorriari eta euskararen erabilerari erreparatzen diet.

Iruditzen zait arrunt garrantzitsua dela gure bizilekutik ahalik eta gertuen ekoitzi dituzten produktuak kontsumitzea. Ez dakit gauza hauek oraindik azaldu behar diren. Baina, aizue, gertuko produktuak kontsumituta batetik klima aldaketari pixka-pixka bat egiten diogu aurre eta, bertzetik, gure ingurukoen ekonomia are gehiago ez pobretzea laguntzen dugu.

Alde horretatik, atsekabea hartu nuen aurrekoan aurtengo Korrikaren petoak Txinan ekoitzi dituztela ikusi nuelarik. Ez dakit konturatu zareten; aurtengoak ez dira aurreko aldietakoak bezalakoak; aurtengoak kalitate handiagokoak dira. Baina, ai… Txinan eginak.

Korrika izanen da, ziurrenik, euskararen eta Euskal Herriaren aldeko ekitaldirik politena, atxikimendurik handiena jasotzen duena, euskaldunei indarrik handiena ematen diena. Eta horregatik, kosta egiten zait Korrikarekin gauza txarrak lotzea. Baina AEK-ko arduradun maiteok, petoak Txinan egitea itsusia izan da. Eta kalterako ere izan daiteke, petoak erosi behar dituztenen ekonomia pobretzen laguntzen ari baitzarete horrela.

Hurrengorako kontuan izan, mesedez.

—–

[Euskalerria Irratiko Metropoli Forala saiorako ‘Minutu bateko manifestua’, 2017ko apirilaren 4koa] bannerra-EHI

Olentzeroren ezabatzea

Aurreko batean, Maider Beloki zinegotziak, Iruñeko Haur Eskoletako Erakunde Autonomoko lehendakariak, testu polita idatzi zuen. Bertan hainbat zaplazteko dialektiko ematen zizkion UPNri Haur Eskolen kudeaketaren inguruan. Nik goitik behera sinatuko nuke artikulua; batez ere azken paragrafoa. Horretan, bertzeak bertze, Belokik erraten du zerbitzu honek berebiziko garrantzia duela “hurrengo belaunaldien garapen kulturalean eta edukazionalean”.

Bada, negu honetan, Iruñeko Udalaren lau haur eskola euskaldunetatik hirutan Olentzero eta inauteriak ezabatu dituzte. Hiru ikastetxe horiek ez dute deus berezirik egin bi ospakizun horien inguruan.

Nik seme bat Arrotxapeko Goiz Eder eskolan dut. Zuzendariak bilera batean azaldu zigun zergatik ez zituzten bi ospakizun horiek egin. Baina egiaren aitortzeko, bileran izan ginen gurasook ez genuen gauza handirik ulertu. Gaurko, bertze bilera batera deitu gaituzte, eta pentsatzen dut argudio pedagogikoak erabiliko dituztela haien jokabidea esplikatzeko.

Niri akatsa iruditzen zait hartu duten erabakia. Ez baitituzte bi ospakizun horiek haien metodologiara eraldatu, ez; erabat ezabatu dituzte.

Nola erreakzionatuko genukeen UPNk Iruñeko haur eskola euskaldunetatik Olentzero ezabatu izan balu? Pixka bat haserretuko ginateke, ezta? Bada, halaxe nago ni. Eta une honetan, Iruñeko haur eskola euskaldunek gu guztion babesa behar duten honetan, akats estrategikoa iruditzen zait halako zerbaitengatik zenbait guraso euskaldun haserraraztea.

Garapen kulturala. Garapen kulturala. Zer arraio izanen da hori?

—–

[Euskalerria Irratiko Metropoli Forala saiorako ‘Minutu bateko manifestua’, 2017ko martxoaren 28koa] bannerra-EHI

Ai, Simon

Ez dakit, e, zuek erranen didazue egia den ala ez, baina nik Marisa de Simon parlamentariarengan pertsonifikatu dut Nafarroako Ezker Batuak euskararen zabalkundearen aldeko lana trabatzeko duen jarrera. Konparazio batera, iruditzen zait oso modu pertsonalean oldartu zela Lehen Hezkuntzako oposizioetako euskarazko plazen kontra, erregimen zaharreko CCOO sindikatuko kide eta maistra erdaldun ele bakarra delako.

Alde horretatik, nahiago izanen nuen Ezker Batuko lema Edurne Egino Iruñeko zinegotzi euskalduna bezalako batek hartu izan balu, eta ez Marisa de Simonek. Baina nor naiz ni halako zerbait eskatzeko?

Ederki kostata, baina ulertu dut Nafarroa Garaira aldaketa instituzionala ekarri zuen akordioa oso esparru politiko ezberdinen arteko akordioa izan zela. Alde horretatik, eta ikusita zer nolako ezberdintasunak dauden aldaketako lau zutabeen artean, ikaragarria iruditzen zait 2015ean lortu zena.

Nahi nuke, noski, nitarrek pastelaren zati zabalagoa hartzea. Baina pastela halakoxea da eta geruza txiki bat Espainiako ezker klasikoari dagokio. Beraz, ulertzen dut Marisa de Simon bezalakoekin elkar ulertzen segitu behar dugula. Gure lana da gure iritzi, posizio eta planteamenduetara erakartzea. Ez da lan makala. Baina, aizue, hori nahiago UPNren kontra etengabe borrokatzen ezer ere ez lortzea baino.

—–

[Euskalerria Irratiko Metropoli Forala saiorako ‘Minutu bateko manifestua’, 2017ko martxoaren 21ekoa] bannerra-EHI

Ekialdea

Noiz edo noiz tokatzen da gipuzkoar edo bizkaitar euskaldun maitagarriren bat zirikatzea bere burua nafartzat aurkezten duelako. Halakoetan saiatzen naiz umorea erabiltzen, eta saiatzen naiz ikusarazten nafarra izatea ez dela inolako mauka; zehatzago erranda, nafar euskalduna izatea ez dela pagotxa.

Konparazio batera, atzo berean Nafarroako Parlamentuak adierazi behar izan zuen Antzingo alkatea babesten duela zer eta bertako udalak eskatu duelako herria eremu linguistiko mistoan sartzea eta, beraz, hizkuntza eskubide gutxi-gutxi batzuk errespetatzea.

Eta hauxe da gure eguneroko bazka. Nafarroa Garaian etengabe ibili behar izaten baitugu nafar euskaldunok gure nafartasun eta euskalduntasun bateragarriak azpimarratzen. Autogorroto ariketa ikagararrian, anitz eta anitz baitira euskara eta euskaldunak maite ez dituzten nafarrak.

Horregatik, zeuen burua nafartzat jotzen duzuen bizkaitar eta gipuzkoarrok, erran behar dizuet asko maite zaituztedala eta asko maite zaituztedalako ez dizuedala halako gaitzik opa.

Kontrako bidean, EAEzentrismoak jota zaudetenoi, eta euskaraz mintzatzerakoan edo idazterakoan Nafarroa, Lapurdi eta Zuberoa Euskal Herritik kanpo uzten dituzuenoi, edo “gu euskaldunok” bezalako esamoldeetan Ekialdekoak kanpoan uzten gaituzuenoi, bada, zuoi, inolako garraztasunik gabe, gripe txiki bat opa dizuet. Ez oso handia, e, baina ohatzean pare bat egunez jarriko zaituztena.

—–

[Euskalerria Irratiko Metropoli Forala saiorako ‘Minutu bateko manifestua’, 2017ko martxoaren 14koa] bannerra-EHI

Agenda

Ez dakit nori irakurri diodan UPNk eta lagunek hauspotzen dituzten polemiken mailak frogatzen duela aldaketaren gobernuak kudeaketan ongi ari direla. Alegia, kudeaketaren kontra deus txarrik errateko ez dutenez, txorakeriekin entretenitzen direla eta entretenitzen gaituztela.

Ez dakit bada, ez dakit bada.

Egun bikoitietan baikorra izatea ongi dago, baina egun bakoitietan errealitate gordinari so egin beharko diogu, ez?

Eta errealitatea da, ene uste harroxkoan betiere, ez dugula modurik aurkitzen beraiek markatzen diguten agendatik ateratzeko. Haiek aukeratzen dutela musika eta guk ez diogula dantzatzeko tentazioari segundo bakar batean ere eusten.

Eta orain, manifestu hau behar bezala biribiltzeko, aipatu beharko nuke zein den inposaturiko agenda horretatik airoso ateratzeko modua. Bada, ez dut ideirik ere! Sentitzen dut.

Martxoak 7 ditu gaur. Aupa Abel!

—–

[Euskalerria Irratiko Metropoli Forala saiorako ‘Minutu bateko manifestua’, 2017ko martxoaren 7koa] bannerra-EHI

Alkateena

Zubietako inauterietako irudi bat, 2013koa.

Behinola, animaliek eta landareek hizketan zekiten garaian, erakunde, alderdi eta elkarteen komunikatuak fax izeneko makina baten bidez jasotzen genituen erredakzioetan.

Garai hartatik, bereziki gogoan dut faxaren paper kiribilean tinta gutxirekin izkiriaturiko bat: Ituren eta Zubietako alkateek bidali zutena. Ia hogei urteko kontu batez ari naiz, e! Bada, ordu hartan, alkateek komunikatu bat bidali zuten gogorarazteko beren herrietako pertsonaia nagusiak joaldunak zirela, eta ez zanpantzarrak. “Ostia!” batekin bukatzea bertzerik ez zitzaion falta komunikatu hari, handia baitzen tonuari zerion asperdura eta amorrua.

Antzeko tonua duen komunikatua egin dute oraintsu Ituren eta Zubietako alkateek. Oraingoan, zalaparta handia sortu duen animalia hilen erabilera gaitzetsi dute eta erran dute animalia hilak erakustea ez dela Ituren eta Zubietako inauterien parte.

Ituren eta Zubietako inauteriak ikaragarri gustatzen zaizkit, joaldunen seriotasunak eta mozorroen lotsagabekeriak sortzen duten irudi ederragatik batez ere. Anitzetan ikusi izan ditut zuzenean (kazetari eta irakasle gisa) eta gehiagotan ikusi izan ditut Youtuben (guraso gisa), eta zeraaaa… ejem… okertzeko beldurrik gabe erran dezaket animalia hilen zatiak erakustea ez dela aurtengo kontua bakarrik.

Hortxe utziko dut.

—–

[Euskalerria Irratiko Metropoli Forala saiorako ‘Minutu bateko manifestua’, 2017ko otsailaren 28koa] bannerra-EHI

Segregazioa

Sarrigurengo eskola bitan banatzearen aldeko elkarretaratze bat.

Sarrigurengo eskola bitan banatzearen aldeko elkarretaratze bat.

Gogoratuko duzue agian. 2014ko urtarrilaren 9an Nafarroako Parlamentuak mozio bat onartu zuen ikastetxeetan eredu linguistiko ezberdinak harmonian eta elkarbizitza ederrean bizi daitezen. Mozioa, nola ez, Izquierda – Ezkerrak aurkeztu zuen eta talde parlamentario guztiek alde bozkatu zuten, EH Bildurenak izan ezik.

Mozio hura oinarri hartuta, UPNren gobernuak hainbat ebazpen ezarri zituen ikastetxeetan eredu ezberdinen arteko elkarbizitza lantzen dela ziurtatzeko. Noski, neurri horiek D eredua zuten jomugan, Nafarroako ikastetxe gehienak erdal eredu bakarrekoak baitira eta beraz ez dute zertan euskaldunekn nahasi.

Nolanahi ere, mozio hark eta UPNk gero ezarritako neurriek argi erakutsi zuten zenbait politikarik ez dakitela non bizi diren eta/edo bortz axola zaiela errealitatea nolakoa den.

Izan ere, ordutik, Sarrigurengo eskola ereduen arabera bitan banatu dute, guraso gehienek hala eskatu zutelako. Iruñeko iparraldean eginen duten institutu berria D eredu hutsezkoa izanen da, gaztelaniazko ereduak ez duelako bertze ikastetxe baten beharrik. Eta orain Hezkuntza Departamentuak -demokrazian sinesten badu, bederen- bitan banatu beharko du Buztintxuriko eskola, hango guraso gehienek erabaki baitute eskola hizkuntza ereduen arabera banatzea, antolakuntzarako, elkarbizitzarako eta hizkuntzen garapenerako onena delako.

Horixe ba. Beharrik gizartea ez den gure zenbait politikari bezain ergela.

—–

[Euskalerria Irratiko Metropoli Forala saiorako ‘Minutu bateko manifestua’, 2017ko otsailaren 21ekoa] bannerra-EHI

Hizkuntza paisaiatxoa

abizena 1Begiak odoletan ditut atzotik. Abizena C hizkiarekin idatzi baititate berriz. Enegarren aldiz. “Hi, Asier, ohitua egon behar huke!”. Bai, izatez, banago. Ikaragarri ohikoa baita nortasun agirian K hizkiarekin idatzita izanagatik ere betiko funtzionarioa begien aitzinean duena irakurtzeko gai ez izatea. Edota ahoz galdetuta nik “Azpilikueta Krekin” erran arren idazkaria erdal grafiarekin tematzea.

Baina atzokoak pikutara bidali du halakoak jasateko nire gaitasun titanikoa.

abizena 2Seme nagusiak Iruñeko D eredu hutsezko ikastetxe ereDugarri batean ikasten du. 4 urtekoen gelan dago. Eta gutxika-gutxika ari da bere izen-abizenetako hizkiak identifikatzen eta idazten.

Gelan badute maleta bidaiari bat, astetik astera familia batetik bertzera pasatzen dena. Bertan, bizpahiru jolas daude, haurrekin batera egitekoak. Horietako batean ikaskideen argazkiak beren izen-abizenekin lotu behar dituzte.

Bada, irakasleak prestaturiko fitxetan erdal grafiaz idatzita ageri dira euskal abizen guztiak, geurea barne.

Ezustekoaren ondotik amorrua etorri zitzaidan, eta geroago duda existentziala. Nola da posible euskara hutsezko ikastetxe batean, batere balio ofizialik ez duen jolas batean, haurrek beren izen-abizenen hizkiak identifikatzea helburu duen jolas batean, euskal abizenak euskal grafiarekin ez idaztea? Ai… [hasperena].

—–

[Euskalerria Irratiko Metropoli Forala saiorako ‘Minutu bateko manifestua’, 2017ko otsailaren 14koa] bannerra-EHI

Featuring WPMU Bloglist Widget by YD WordPress Developer