Berria.eus

G. Eskerrik asko, Laurentzi, BERRIA.INFOko elkarrizketa digitalean parte hartzeagatik, eta hurrena arte. BERRIA.INFO

E. Eskerrak galdera bidali duten guztiei, eta igande arratsaldean Brasilgo karrera ez galdu! Hurrena arte

G. Egun on, egia al da Rosy 1 Formulara joateko zurrumurrua? Pilar

E. Duela hiru urte oso aukera posiblea izan zen, Schumacher ordezkatzeko gainera. Ondoren, Rossi-k kontratua berritu zuen Yamaha-rekin eta horrek zaildu egiten du aukera. Hala ere, egun hauetan Ferrarirekin hizketan ari da berriro test bat antolatzeko. Oraingoan ez dio Ferrarik eskaini, Rossik berak eskatu du, hobby bezala.

G. Egun on, Laurentzi Zer iruditzen zaizu lasterketak gauez egitearena? Ander

E. 1 Formulak Europatik atera nahi du, eta horrek eragiten du ordutegi desberdina duten tokietara joatea. Baina gauez korritu arazten dute, europarren ordutegira egokitzeko. Horretarako nahiago dut Europan lasterketa gehiago jartzea, zirkuito historiko asko baitago bertan. Gauez korritzeak esan nahi badu Singapur bezalako zirkuitoetan korrituko dutela, ez du merezi.

G. Gauez 1 Formulako karrerak ikustera jaikitzen horietakoa al zara? Otalora

E. Zalantzarik gabe! Esaten den bezala, gustoko tokian aldaparik ez, eta gauean loari bi ordu kentzeak ez dio inori kalterik egiten. Hobe lasterketa egunez baldin bada, baina Australiako lasterketak denboraldia hasten duenean, ezin da zalantzarik eduki!

G. Ez al da elitea goratzea 1 Formulataz informatzen jardutea? Behe mailako lanaz ez dezue ezer aipatzen. Amaia

E. Galderak zentzu guztia dauka, baina orokorren maila goreneko kategorien berri ematen da arlo guztietan. Futbola ere ez da Espainiako Ligako lehen eta bigarren maila bakarrik; tenisa ez da Grand Slam-ak bakarrik, etab. Denarentzat ez dago tokirik, eta kasu horretan maila altuena duena aukeratzen da, jakinda horrek beheko mailen beharra duela, haietatik elikatzen baita.

G. Noizko 1 Formulako euskal piloto bat? Inor ikusten duzu? Villarin

E. Ia seguru esan daiteke hamar urtetan behintzat ez dugula euskal pilotorik izango. Izan ere, 1 Formulara ez da bi egunetan iristen. Horren aurretik beste kategoria asko pasa behar dira: karting, 3 Formula, GP2, World Series... eta haietan ere ez dugu ordezkaririk. Beraz, lehen baldintza ez da betetzen, eta gainera denak ez dira 1 Formulara iristen. Euskaldun izateaz gain, oso ona izan beharko luke!

G. Kirola al da 1 Formula? Martxial Perez

E. Niri behintzat Kirol sailetik deitzen didate! Galdera hau askotan entzun dut, eta beti berdin erantzuten dut: oinarri teknologikodun kirol bat dela. Gidariari oso erreminta baliotsua ematen zaio, baina haren trebetasuna eta baldintza fisikoa beharrezkoak dira irabaztekoa. Arku jaurtiketa bezain kiroltzat daukat.

G. Telebistako komentaristak zer iruditzen zaizkizu? Alde handia nabari duzu, adibidez, Tele5koen eta EuroSports-ekoen artean? Ander

E. Ahal dudala, ez dut ez bata ezta bestea ere ikusten. Batez ere Tele5-ek lasterketak Alonsoren inguruko ikuskizun gisa planteatzen ditu, eta 1 Formularen ikuspegi 'pozoitua' transmititzen dutela iruditzen zait. Espainiak ez du 1 Formula kulturarik izan Alonso baino lehen, eta hori nabari da. Inglaterra eta Frantzian askoz hobeto egiten dute.

G. Zer moduzko lana egiten dute Azkoitian Epsilon Euskadin? Kubica han ibili zen. Aitor Larrañaga Uzkudun

E. Le Mans-eko autoa egin izanak meritu handia du, eta lortutako emaitza batzuk oso onak izan dira. Hala ere, autoaren zein zati egin diren bertan, eta zeintzuk erosi diren ondo jakitea gustatuko litzaidake. Kubicak World Series by Renault lasterketak korritu zituen, eta hor taldeak eragin gutxiago du. Baina gidari batek ezin du irabazi taldaren lan onik gabe.

G. Egun on, Laurentzi Pilotu batzuk elkarrizketatzeko aukera izan duzu. Zein iruditu zaizu atseginena? garikoitz

E. Gaur egungoen artean Robert Kubica, oso tipo naturala delako eta gertuasuna transmititzen duelako. Takuma Sato japoniarra ere atsegina da, baina talde bila dabil orain. David Coulthard eta Mark Webber agian ez dira atseginenak izango, baina hizketarako erraztasuna dute eta oso umore ironikoa dute.

G. Zaletasun handia al dago Euskal Herrian? 1 Formulako karrera bat jartzekotan, non? Bilbon? Raiko

E. Hemen beti izan da zaletasuna, baina Fernando Alonso agertu zenetik aldatu egin da. Bada zaletu 'masa' bat, lehendik zegoena eta ondoren ere jarraituko duena. Igoeretara eta antzeko lasterketetara doan jendea beti izan da. Baina 1 Formula beste askok Alonsorekin deskubritu dute. Hiri barruan lasterketa bat egitea buruhauste handiegia da, eta azken esperientziek -Valentzia, Singapur- ez naute konbentzitu. Hemen dagoen orografiarekin, zirkuito gora-beheratsu bat primeran legoke.

G. 1 Formulako zenbat karreratan egon zara orain arte? Zein gustatu zitzaizun gehiago? Joxe

E. Hogei lasterketan ingurutan izan naiz, eta bereziena Monaco izan zen. Guztiz surrealista da 1 Formula autoak halako 'scalextric' txiki batean sartzea. Beste zirkuitoetan dauden segurtasun neurriak ikusita, pentsaezina gertatzen da oraindik han korritzea. Aukera banu, Australiakoa ikusiko nuke! Hala ere, zirkuito bezala Spa-Francorchamps aukeratuko nuke.

G. ieup! Kubica Urrestilan bizi izan zuan urtebetez. Kontaidak hartaz zerbait, bai? Mikel Garmendia

E. Kubica bezalako gidariak falta dira 1 Formulan. Gidari aparta izateaz gain, oso tipo naturala da, eta gogoan dut elkarrizketa egin nionean, ezertaz ezagutzen ez baninduen ere, ilea hartu zidala galdera batekin. Bere taldea kritikatzeko gai da. Tipo lasaia da, eta esandakoan arrazoia du gehienetan.

G. 1 formulan autoen desberdintasuna gero eta txikiagoa dela uste duzu? Hortik doa etorkisuna? igor

E. Zalantzarik gabe. Beti berdinek irabazten dutela iruditzen bazaigu ere, aurten zazpi garaile desberdin izan ditugu. Eta denboretan asko estutu da 'parrila'. Pole-a egin duen eta azkena den autoaren artean bi segundu baino gutxiago daude gaur egun. Duela hamar urte, hamar segundu ere izaten ziren. Denboran zenbat eta atzerago egin, orduan eta alde handiagoak topatzen dira.

G. Kaixo Laurentzi, Gustatuko al litzaizuke telebistan 1 Formulako lasterketen komentarista izatea? Proposatu dizute halakorik? axi

E. Bai, seguru esperientzia polita litzatekeela. Aukera emanda, mundu guztian zehar jarraituko nuke 1 Formula gustora, baina oraindik inor ez da halako eskaintzarekin azaldu! Nabari du entzuten ditugun komentarista batzuk ez dutela 1 Formula ondo ezagutzen, Alonso efektuarekin batera hasi zirela, eta gauza batzuk entzunda haiek ordezkatzeko gogoa ematen du.

G. Aupa, Uste duzu azkenean, hurrengo urtean guztiak motor berdinarekin arituko direla? Epiola

E. Ez dut uste, dagoeneko kontrako ahotsak asko direlako. Horren aurrean, FIAk bere 'tonua' jaitsi du eta hiru aukera daudela argitu du. Proposamen horren atzean kostuak murriztea dago, baina uste dut taldeekin beste motako adostasun batera iritsiko dela. Aerodinamikan ez da diru gutxiago xahutzen, eta hori ez da kaleko autoetara eramaten. Motoreetako hobekuntzak, aldiz, bai.

G. Nondik datorkizu zaletasuna 1 Formularekin? Izan al zara inoiz pilotoa auto lasterketa batean? Aingeru

E. Ba ez nuke jakingo jatorria esaten. Kirol aldetik bezainbat erakartzen nau alde teknologikoak, eta horrek zeresan handia izan zuen. Ez naiz piloto izan, ez behintzat lasterketa ofizialetan, horrek diru eta medio asko eskatzen dituelako. Baina oporretan kanpora bagoaz, derrigorrezkoa da kart pistan lasterketa bat!

G. Aupa Laurentzi, Egia al da 1 Formulako pilotuek goi mailako kirolariek bezalako prestakuntza fisikoa izaten dutela? Eskerrik asko. Haritz

E. Erabat. Mundu guztian korritzen dira karrerak, eta baldintza guztietan. Gidari batek gauza bat izan behar du argi: ezin duela errendimenduan jetxi nekea nabari duelako, edota likidoak galdu dituelako. Auto barruan 40ºC izan daitezke eta bi orduz barruan arita, bete-betean iraun behar du. Lepoa landu behar dute bereziki.

G. Kaixo Laurentzi, Esango al zenidake ze prezio daukaten 1 Formulako lasterketak ikusteko sarrerek? Gutxi gorabehera, noski. igor

E. Nahiz eta 1 Formula kirol globala izan, prezioak ez dira berdinak toki guztietan. Garai batean Montmeloko sarrerak ziren merkeenak, 'pelousse' deitzen diren belardietan 90 eurotan baitzeuden. Gaur egun ia bikoiztu egin dira. Eserita ikusi nahi duenak, normalean 200 eurotik gora behar ditu. Ia berdin balio du igandeko sarrerak bakarrik, edota hiru egunetakoak.

G. Azken urteetan gidari pare bati elkarrizketa egin izan dizkiozu; haietako bat Kubica zen, eta bestea japoniarra, ezta? Nolakoak dira pertsona bezala, jatorrak? Noiz egin behar diozu elkarrizketa Alonsori? Eta Hamiltoni? Aitor

E. Orokorrean hitzak gehiegi neurtzen dituzte gaur egungo gidari gehienek. Eddie Irvine eta Jacques Villeneuve bezalakoak faltan botatzen dira, lasai botatzen baitzituzten nahi zituztenak. Gehienak gidari gazteak dira eta nabari du. Alonso eta Hamilton ere elkarrizketatuko ditugu, baina momentuko protagonista elkarrizketatzea ere bilatzen dugu.

G. Zer iruditzen zaizu FIAk omen daukan asmoa bi urte barru auto guztiek motor berdina edukitzea? lander

E. Guztiz 1 Formuaren izpirituaren aurka doa. Kirol hau motor egileek hasi zuten, eta talde askok bertan darrai motoreak taldeei emanez. Toyotak eta Ferrarik esan dute motor 'estandarra' inposatuz gero 1 Formula utz dezaketela. Lehia teknologikoa kentzen bada, 1 Formula ez litzateke berdina izango.

G. Nork irabaziko dugu txapelketa? Eta nork irabaztea nahi duzu? Alazne

E. Nork irabaziko duen ezingo dut esan, baina argi dago Hamiltonek oso eskura duela. Eta nora irabaztea nahi dudan... bien artean bata edo bestea ez zait axola. Aukerarik ez duen besteren bat nahiago nuke. Robert Kubica adibidez merituak egin ditu, baina gutxigatik gelditu da jokoz kanpo.