Azken elkarrizketa

Aitor Sarriegi

Aitor Sarriegi

Gipuzkoako bertso txapelduna

2011-12-23 - galderak erantzun ditu

Aitor Sarriegik (Beasain, 1976) lehen aldiz irabazi du Gipuzkoako Bertsolari Txapelketa. Txikitatik aritu da Goierriko bertso eskolan eta agurrean Mikel Mendizabali eskaini zion txapela.

 Erantzundako galderak

28

G. Elkarrizketa digitala amaitu da. Eskerrik asko Aitor irakurleen galderak erantzuteagatik, eta zorionak igandean irabazitako txapelagatik. Eskerrik asko galderak egin dituzuenoi ere. Ondo izan. BERRIA.INFO

E. Eskerrik asko zuei ere eta zer esanik ez galderak bidali dituzuenoi. Ondo izan, urtea ondo bukatu eta berria hobeto hasi!

27

G. Zu, Aitor, Gipuzkoako bertsolari txapeldun berria zara. Etxera itzultzean, ordea, zure emaztea Sálvame ikusten aurkitu duzu. Zortziko txikian, bertso bat. Jonas,

E. Etxera sartu eta eman hiru pausu telebista piztuta builan jo eta su... Jonas, pasa denaren testigu zara zu penitentzi hontatik salbatu nazazu!

26

G. Egun on eta zorionak Aitor! Pasa den igandeko saioa ederra izan zen eta gozatzeko aukera izan genuen ikusleok, eskerrik asko ! Bertsolaritza halako jarduera "estatikoa" izanik ere, bati baino gehiagori irudituko zaio harrigarria halako jendetza biltzeko ahalmena izatea. Hala ere, badu magia puntu bat, bat-batekotasunarekin guztiz lotuta dagoena. Bertsolaria muga-mugan ikustea, tentsioa, kontzentrazioa; bertsolariaren mugimenduak, aurpegia, eskuekin ilea ukitza, kopeta iluntzea… Pantaila handiari esker horiek guztiekin ikuslea harrapatzen dela, nik uste. Igandean nik behintzat gozatu adina sufritu nuen, bertsoa botatzerakoan zure aurpegian nabaritzen zen tentsioarekin, kontzentrazio-mailarekin… zorionak txapelagatik ! eli

E. Eskerrik asko Eli!!! Egia da, nik uste arrisku hori eta bertigo puntu hori dela bertsoaren magia. Pantaila entzulea amideegi ertz horretara eramateko lagun bezain bertsolariaren salatari da, eta disimuloan pasatuko liratekeenak azaleratzen ditu askotan. Guretzat traidore samarra da...:) Halaere, tentsio horrekin guztiarekin, amildegi ertzean, estu, baina... guk ere asko gozatzen dugu. Ongi irteten denean oso sentsazio atsegina da. Milesker berriz

25

G. Oraindik ospatzen? Lo egitea lortu zenuen igandean? ZORIONAK! nagore a.

E. Oraingoz bukatu dira ospakizunak. Atseden hartu nahi dut eta distantzia tartean jarrita benetan gozatzea espero dut. Igandean lo egitea baino garrantzitsuagoa izan zen behar zenean lo ez hartzea ;) Mila esker Nagore!

24

G. Zorionak txapeldun! Grazia egin zidan buruz-buruko kartzelako bideoa jarri eta buelta emanda zinela zure behatzen mugimenduak. Hitzez ala bideoz, nola nahiago gaiak ematea? Ondo pasa Gabonak!!!! Lutxi

E. Kaixo Lutxi! Eskerrik asko benetan! Gure mugimenduak ez ditugu kontrolatzen horrelakoetan. Eskuena kuriosoa da, askok esan didate silabak kontatzen aritzen garen edo... eta nerbioak dira, ez besterik. Poltsikoan edo atzean ezkutatu nahi izaten ditugula uste dut. Niri bideoaren formula gustatu zait. Hala ere kasu honetan gaiaren pisurik handiena hitzetan zegoela uste dut, baina gerora begira oso interesgarria litzateke irudiekin gaian kokapena eman eta sormenak nora garamatzan ikustea.

23

G. Zorionak Aitor!!! Txapela irabazi zenuela jakin eta jendeak eskaini zizun txalo zaparra sentitzea ikaragarria izan behar du ezta? Ni ere emozionatu egin nintzelako diotsut!!! Zorionak berriz ere!!! Leire

E. kaixo Leire! Eskerrik asko! Bai, ikaragarria da. Gero eta handiagoa den olatu bat bezala iristen da. Malkoak ez nituen urruti izan, eztarrian korapiloa... ahaztuko ez dudan momentua.

22

G. Zorionak Aitor!!Bereziki poztu ninduen txapela zure buruan ikusteak. Gaiak jartzea ez da batere lan makala eta zaila da bi bertsolariri aukera berak ematen dizkion gaia topatzea. Baina ez al zaizu iruditzen final honetan zer esan gutxi ematen zuten gai bat baino gehiago zeudela? Zein izan zen etzun eta bertsoa burutzeko gai zail xamarra iruditu zitzaizuna? Orain plazaz plaza ikusiko zaitugu! segi entzulea gozarazten! amaia

E. Kaixo Amaia, mila esker!! Oso lan zaila da, bai, aukera berdintasun hori mantentzea. Guztiok izaten ditugu gehiago edo gutxiago gustatutako gaiak, eta normalean gaizki irteten zaizkigunekin oroitzen gara. Asko baldintzatzen du iritzia emaitzak. Kasu honetan surflariena zaila iruditu zitzaidan, eta bakarkakoak ere ez zuen beste gai batzuren karga emozionalik. Baina zerorrek esan duzu, orekaia ezinezkoa da. Saiatuko gara gozatu eta gozarazten!

21

G. Hasteko eta behin ZORIONAK!! Zure agurrean ondo aipatu bezala goierritar ugarik hartu zenuten txapelketako trena eta bi herritar iritsi zineten azken geltokira. Berezia izango zen hori zuentzat ezta? Goierrin bertsolaritzak etorkizuna duela esango zenuke? ametx

E. Mila esker Ametx!!! Oso berezia izan zen. 2007an Ikerrekin partekatu nuen oholtza eta hura ere oso berezia izan zen biontzat, lehen finala genuen gainera. Iñakiren kasuan aipatzekoa da Martxoan hasi zela txapelketa beretzat, eta bukaera elkarrekin ematea izugarria izan da biontzat. Azken urteotan elkarrekin aritu gara txapelketak prestatzen eta horrek berezi bihurtzen du igandekoa. Goierri eskualde bertsozalea da, bertsolari handiak izan dira, eta talde izaera izan du gainera Goierriko bertsolarien multzoak. Orain ere harreman oso ona daukagu gure artean eta datozenek ere talde izaera horri eusten diotela ikustea oso pozgarria da. Ziur baiez, goierrin bertsolari onak izango dira.

20

G. Aupa Aitor. Lehenik zorionak. Azken urteetan, txapelketa gora, txapelketa behera, badirudi bertsolaritza txapelketen arabera mugitzen dela. 2 galdera batean : -ez al duzu uste txapelketak bertsolari elite bat sortzea duela ondorio? -Egokia iduritzen al zaizu bertso eskoletako gazteak txapelketarako formatatzea? Ongi izan Iñaki

E. Mila esker Iñaki! Baliteke txapelketen ondorioz elite bat sortzea. Dena den kezkagarria ondorio ez baina helburu izatea litzateke. Elitean plazarik plaza txapelketak utzitako edo txapelketetan hain emaitza onak lortu ez dituztenak ere ikusten ditugu. Aurreko galdera batean esan dudan bezala, abiapuntua markatzen du askotan txapelketak, baina plazan irabazten da plaza. Ez dut uste txapelketarako soilik formatzen direnik bertso eskoletako gazteak. Bertsolaritzarekin jolas egin eta ondo pasatzen erakusten zaie. Hala ere, gizarte-eredua halakoa denez, normala da begiak txapelketan jartzea,hori da ikusten dutena

19

G. Zorionak Aitor, saio bikaina Ilunbekoa! Pare bat galdera: Azken urtetan bertso asko aldatzearekin batera, entzulegoa ere aldatu da. Zure ustez, norantz doa bertsolaritza? Eta bigarren, bertsolaria jaio edo egin egiten da? Lander Arretxea

E. Mila esker Lander! Bertsolaritza dagoen tokira kamaleoi izaten asmatu duelako iritsi dela uste dut, garaiekin batera moldatzen jakin du oraingoz eta hori izan da bere arrakastaren gakoa. Entzulegoaren aldaketa gizartearen aldaketaren barruan kokatzen dut, gizartea aldatu den neurrian bertsoa ongi egokitu den seinale. Uste dut Uztapidek esn zuela lehenik behintzat, jaio egin behar dela. Bertso eskolek erakutsi dute bertsolaria egin egin daitekeela. Hala ere denean bezala, punta-puntako bertsolari izateko berezkotik ere beharko da zerbait, ezta?

18

G. Eguerdi on Aitor. Zer suposatu du zuretzako Gipuzkoako bertsolari txapelketa irabazteak? Uste al duzu Gipuzkoan daudela bertsolaririk indartsuenak(Egaña, Lujanbio...)? Zorionak eta ondo hasi urtea. Pedro

E. Niretzat lorpen izugarria izan da, bertsolari handi asko dira ibilbidea txapelik gabe osatzen dutenak eta nire buruarengan sinesten lagunduko didala uste dut. Gipuzkoan bertsolari on asko daude, baina baita Bizkaian, Iparraldean... ere. Gaur egun gainera gune ez hain euskaldunetan ere oso maila handiko bertsolariak sortzen ari dira, eta bertsolari "indartsuenen" mapa gero eta gehiago hedatuko dela uste dut. Eskerrik asko, Pedro

17

G. Epa Aitor! Zorionak txapelagatik! Jakin nahi nuke zure iritzia Irazuk egindako lanari buruz. Badakit bertsolari oso onak ibili zinetela lehian, baina merezi al zuen 6. postua? Eskerrik asko, ta gozatu txapela! laida

E. Kaixo Laida, mila esker! Irazu bertsolari handia da, ibilbide luze eta oparoa du eta ez dut ustebere maila inork zalantzan jartzen duenik. Finala oholtzatik oso ezberdin bizitzen da, eta gureburua joan-etorrian ibiltzen da. Bereziki bere bakarkakoa daukat gogoan, Tolosan bezalaxe jendea ukitzen asmatu zuela uste dut. Postuarena oso zaila da esatea, hasteko saio osoa arretaz entzun beharko nukeelako eta bestetik izan ziren tarte txikiak ikusita oso puntu gutxiren baitan postuak asko alda zitezkeelako. Saiatuko naiz gozatzen, uste dut asmatuko dugula!

16

G. Zorionak, Aitor. Zorionak, Beñat. Ene ustez, gaurko bertso-saio batean osatzen dituzuen poemak (poesia, edukia, neurtitzen perfekzioa...) ez dira bildu klasikoen ale askotan, baina... Galdera, agian, "zeharka" doa, nahi izan gabe ere: ez al duzu uste bertsolaria doinu-sena galtzen ari dela? Eskerrik asko bertsolari guztioi, asko-askotan ipar izarra zaituztegulako. Edorta Agirre

E. Kaixo Edorta, eta mila esker! Baliteke. Alde batetik asko gara kantari onak ez garen bertsolariak. Belarri oso fina ez dutenak ere badira, baina beste alde batetik kantaera jendearengana iristeko armarik indartsuena dutenak ere badira. Jendeak beti eskertzen du ongi kantaturiko bertsoa, eta bide horretan doinuen erabilera gehiago landu behar genukeela uste dut: bai erabiltzen ditugunak bertsoari eta belarriari hobeto egokitzeko eta bai abaniku zabalagoarekin jokatzeko ere. Etxeko lan bezala hartuko dut.

15

G. Aupa Aitor!kontu bat. Nri bertsolaritza gustatzen zait,Bizkaitarra izanagatik ia gipuzkoako saio denetara joan naz. Iruditzen zait, bertsoa bum bat dala baina sarritan jendea joaten dela finaletara, Bakarrik irudia emateko eta gero herrietan ez dira saioetara joaten. Horrez gain,irudipena daukat bertsolaritza munduan ere irudikeriari garrantsi handia ematen zaiola. zer diozu?adibidez, gai jartzaile batzuek duten arrogantsia eta handi ustea bertso munduan dabiltzalako. Ondo segi ta zorionak! Joxe

E. Mila esker Joxe! Egia da finaletan jendetza bildu arren gure benetako neurria ez dela hori. Plazetako jendea termometro hobea da gure benetako neurria ezagutzeko, etaune honetan osasuntsu gaudela esango nuke. Irudikeriari dagokionez, ez dut uste gizarteko beste arloetatik apartekorik dagoenik. Gu ere gizarteko parte gara eta bere bertute eta akatsak dauzkagu.

14

G. Lehenik eta behin, zorionak!! Mikel Mendizabalekin egon al zara finala ondoren? nola izan da elkartzea? Eta orain, oporretara zoaz baina... noiz/non ikusiko zaitugu urte berrian!? Gogotxu zaude plazarako edo, deskonektatzeko gogoz zaude? Julen

E. Mila esker Julen! Egon naiz, bai, Hitzetik Hortzerarako Barrenara joan ginen eta polita izan zen. Garai zaharrak gogoratu genituen, elkar besarkatu... Hala ere mahai inguruan lasaiago hitz egiteko aukera izango dugu. Momentuz deskonektatzeko gogoa dut, indarberritu eta plazara gogotsu itzultzeko. Urte berrian 5ean Dokan, 6an Amurrion, 8an Oiartzunen, 13an Getarin, 15ean Barinagan, 21ean Tolosan.... eta datozkeenak. Gogoz hasi nahi dut urtea

13

G. Zer diozu finaleko gaiez? Ez al ziren melodramatikoegiak? titi

E. Kaixo. Bati baino gehiagori entzun diot hori, eta duela 4 urte ere irten zen gaia. Ordukoekin alderatuta aukera zabalagoak izan dira aurtengoan nire ustez, eta oholtzatik dudan oroitzapenean behintzat ez nuen sentsazio hori izan. Guk ere izango dugu erruaren zati bat noski, askotan emozioen bila joaten gara jendearengana iritsi asmoz eta ertzekoenetara jotzeko ohitura dugu.

12

G. Beñatekin buruz-burukoa jokatzeak, zer sentsazio sorrarazi zizkizun? ZARU

E. Oso sentsazio onak. Bertsotako lana biren artean egiten da, eta bertsokide ezinhobea da Beñat. Batek bigarren geratu behar zuen eta bigarrenez tokatu zaio berari, baina lasaitu ere egiten du bere mailako bertsolari bat une horretan ondoan izateak

11

G. Kaixo Aitor: Lehenengoz eta behin, zorionak txapelarengatik. Idazten dizut harrituta irakurri nuelako Berriak finalaren biharamunean eginiko elkarrizketan, bertsolariaren profesionalizazioari buruz esan zenuena. Bere horretan, oso motza egin zitzaidan zure argudiaketa, era horretan, zuk irakasle roletik bakarrik abestu ahal izango zenukeelako, eta ez etxeko-andra bat edo tailer-zuloan hamar ordu egunero pasatzen dituenaren lekutik, adibidez. Bestalde, zure hitzetatik okerreko interpretazio bat eman daiteke eliteko bertsolariari buruz edo profesionalari buruz, kirolean edo sukaldaritzan, esate baterako,elitean dagoen nibelarekin parekatzera eraman dezakeelako zuen errealitatea ezagutzen ez duena. Kasu honetan, zure lan-baldintzak hobeak dira ,agian, bertsolari profesional batenak baino. imanol

E. Kaixo Imanol. Mila esker hasteko. Oker ez banago titularra "Bertsolaritza ez profesionala ona litzateke" edo horrelako zerbait zen. Kazetariak ea bertsotatik bizitzea pentsatzen nuen galdetu zidan, eta nik nire kasurako zer nahi nukeen erantzun nion. Erreferentzien kontuari dagokionez, ez nintzen lan konkretuen ezaugarri jakinez ari. Ni ere jabetzen naiz noski langintza guztiak ez direla berdinak. Nominapekoak garenon gehiengoak dituen zenbait ezaugarriri buruz ari nintzen, esaterako, eguerdiko saio baterako dei baten aurrean, edo txapelketako saio batek lanarekin koinziditzen badu. Agian ez nion behar bezala transmititu kazetariari atzean egon daitekeen guztia, eta berak ere ez zuen toki askorik azalpen guztiak sartzeko. Nik izugarrizko meritua ematen diet beraien sormenetik bizitzeko erabaki ausarta hartu duten bertsolari eta sortzaileei. Nere burua ez dut gai ikusten horrelako apustu bat egiteko, ziurrenez askoz segurolagoa naizelako. Eta "ez-profesional" izatea hobea dela uste dudala diodanean nire buruari buruz ari naiz. Ez litzateke lehen aldia eta gustura hitz egingo nuke honetaz zurekin, hau gune motzegia da ertz guztiak adierazi ahal izateko. Ez dakit erantzun dizudan, baina nire asmoa ez zen inondik inora bertsolari-eredu bat hobestea langile bezala, nire burua non kokatzen dudan adieraztea baizik.

10

G. Handia haiz Aitor! Hire elkarrizketak irakurriaz eta bertsozaleon artean askotan izandako elkarrizketetan sumatzen diat halako obsesio moderno bat diagula geroz eta plaza handiagoak, txapelketa luzeagoak... egite aldera. Ez ote da txapelketa eredua bera oker dagoena? Baten bati Anoeta betetzearen okurrentzia etorri arte izango duk bestela. ZORIONAK! Jon

E. Eskerrik asko Jon! Gaur egun bertsolaritzak txapelketaren beharra duela uste dut, eta elkar elikatzen duten bi mugimendu dira txapelketa eta bertsogintza. Egia da bertsolaritzarenak izan ez diren ezaugarriak nabaritzen hasi garela, batipat horrelako final jendetsuetan. Zaila da horri neurria hartzea, baina ez dut uste handiago /gehiago beti hobea denik.

9

G. Kaixo, Txapeldun ! BEC-en nahiko hotz ikusi zintugun, ez zirudien giroan sartuta ari zinenik. Aitzitik, igandean entzulearekin lotura zuzena lortu zenuen, nola lortzen da entzulearekiko hurbiltasun hori? Bertsozale

E. Egia esan BECen behar den tentsio minimo horretara iristea kosta egin zitzaidan, lanak eginda nituen sentipenarekin nengoelako. Zorionez final honetako 3 aurpegi berriek nik orduan baino hobeto kudeatu zuten egoera etahor daude lortu zituzten emaitzak. Nik ere jakin nahi nuke nola lortzen den hurbiltasun hori! Egunak izaten dira.

8

G. Eguerdi on, Aitor. Ez al zaizu iruditzen bakarkako gai gehiegi jartzen direla txapelketetan? Kartzelako lanean, esaterako, ez al da ikusgarriagoa ofiziokako lehia zuzena? Eskerrik asko aldez aurretik eta zorionak txapelagatik! Koxme

E. Bakarka normalean ez da lan bat baino gehiago jartzen. Kasu honetan puntu erantzunak ere baziren, baina ariketa oso ezberdina dela uste dut. Ofiziokako lehia zuzenaren aldekoa naiz, buruz-burukoan batez ere, baina kartzelakoa bakarkakoa izatearen aldekoa naiz, hori baita bere izateko arrazoia: lan beraren aurrean bertsolari ezberdinek nola erantzuten duten neurtzea. Ofiziotako kartzelan bertsokidea ere sartzen da eta ez da guztiontzat lan bera. Eskerrik asko eta ez horregatik Koxme!

7

G. Gipuzkoako eta Euskal Herriko txapelketatan, final-aurrekoetan, ibilbide luzea egin zenuen. Baina 2007-ko Gpuntuan, finalista izan zinen, BTN09-n ere bai, eta urten, 2011-n, Gipuzkoako txapeldun. Orain Euskal Herrikoa irabaztera? ZARU

E. Orain momentuz, oporrak! Egia da final-aurrekoetan askotan geratu naizela eta azken hiru txapelketetan finalerako jauzia eman badut ere, askotan gure esku ez dauden faktoreen menpe dago bat ala bestea gertatzea. Izan zitekeen alderantziz ere. Euskal Herriko Txapelketa beste txapelketa bat izango da, beste garai batean, beste bertsolari batzurekin eta beste Aitor batekin ere bai. Urrun ikusten dut oraindik

6

G. Zorionak Aitor!!! Oso bertso sorta ederrak entzun genituen zure ahotikbertsozale guztiok igandean. Zein lanetan aritu zinen erosoen? Zortzikotearen lana bukatu ondoren, zuk zure burua buruz burukoan ikusten al zenuen? Eskerrik asko! Segi horrela! MJuaristi

E. Mila esker! Agian kanpotik ez da berdin ikusiko baina puntutako saioan eta bederatzikoan aritu nintzen erosoen. Azken honi beldur piska bat ere banion baina uste baino errezago atera zitzaidan. Ez neukan faborio argirik buruz-burukorako, nahiko enpate teknikoa ikusten nuen. Saiatuko gara horrela segitzen!

5

G. Apalategi eta biak bertso-afarietarako bertsolari idealak zerate. Iruditzen zait aterako zaizkizuela saio batzuk. Gustora egongo zinateke?? Kris

E. Idealak ez dakit, egin izan ditugu saioak elkarrekin. Noski egongo nintzatekeela gustura, txapelketa ederra da baina plazak asetzen gaitu gehien

4

G. Ezagun asko ikusi al zenituen han goitik?? Berria

E. Gezurra badirudi ere batzuk bai. Lehen lerroetan esertzen den jendea errez ezagutzen da eta urrunxeago ere jo nituen begiz bat baino gehiago. Pozgarria da goitik haiek ikustea

3

G. Aupa, zorionak Aitor. Uste dezu finala irabazteagatik saio gehiagotarako deituko dizutela?? Juanma

E. Eskerrik asko. Baliteke, hasieran beti izaten du oihartzuna baina aparra berehala jaisten da eta bertsolariari plazan egindako lanak ematen dio plaza

2

G. marrubik natakin eo azukreakin? miren

E. Azukrearekin edo besterik gabe, huts-hutsean.

1

G. Kaixo Aitor, ezer baino lehen ZORIONAK!!! Bertso jaialdi eta txapelketetan beti harritzen nauen gauza da atzekaldean abesten hari ez diren bertsolariak hitzegiten ibiltzen direla, zertaz hitzegiten dezue ofizio bat bukatzean? Buruan dezun adibiderik esaterik bai? Igor

E. Ezer baino lehen Mila esker!!! Normalean egindako lanaren inguruko komentarioak izaten dira. Kasu honetan ordea, HOTZA zen protagonista hizketaldi horietan.