Berria.eus

G. Honekin, amaitutzat ematen dugu gaurko elkarrizketa. Mila esker parte hartu duzuen guztioi eta, nola ez, elkarrizketatuari. Berria.info

E. Mila esker guztioi eta Bugattiko Bihurgunean ikusiko dugu elkar!

G. EGUNON LAURENTZI,EZ AL DUZU USTE K.RAIKKONENEN ALDEKO GIROA PUZTUEGIA DAGOELA?NIK S.VETTEL IKUSTEN DUT TXAPELDUN IZATEKO HAUTAGAI NAGUSI BEZALA.SEGI ORAIN ARTE BEZAIN ONDO LANEAN.ONDO SEGI. ANTXON UBIRIA BERGARA

E. Baliteke Raikkonen-mania asko zabaldu izana, baina horrek erakusten du jendeak aurpegi berri bat nahi zuela, nahiz eta harena ezaguna zen. Australia beti da lasterketa berezia, aurrean nor ibiliko den erakustekoa. Red Bullek auto bikaina du pneumatikoen iraupena luzatzea lortuz gero.

G. 1 Formula ez al da diru xahutze ikaragarri bat? Errentagarria al da talde eta lasterketak antolatzen dituzten herrialdeentzat? Krisi garaian aldaketak egingo dituztela uste al duzu? Aitor R.

E. Egun dagoen bezala ez dut uste asko iraun dezakeenik. Taldeak larri dabiltza, herrialdeek ez dute halako dirutza erabili nahi... Gora egin duen bezala, behera ere egiten jakin beharko du biziraun nahi badu.

G. Eup! Zein da zure ustez 1 formularen historixan inoiz izan dan aurrerapen teknologiko handixena? FOOBALL GITXIAU TA MOTOR GEIXAU!!! eibartarracing

E. Nahiz eta ez den 1 Formularen asmakuntza izan, aerodinamika dela esango nuke. Duela berrogei urte autoetan agertu zenetik, etengabe izan da irabazteko gakoa. Gaur egun ere oraindik ikerketa gehien jasotzen duen arloa da. Hala ere, gure eguneroko bizitzan eragin gutxi du, eta garrantzia beste zerbaitera bideratu beharko luke FIAk.

G. Kaixo Laurentzi: milioiak, teknologia, motorra... ez al zaizu iruditzen kirol izatetik urrun dagoela 1 formula? euskal herrian behin baino gehiagotan tokatu zait rallyesprintak ikustea (lagunengatik) eta, egia esan behar badut, motor kirolek kiroletik guxi dutela iruditzen zait. Zalaparta, kea, gizonkeriak... alde ederrekoa mendi buelta osasuntsu bat!!! Antidena

E. Nik uste 1 Formulaz esan daitekeela oinarrian kirola duen ikuskizun bat dela, eta ikuskizun horri etekin ekonomikoa atera nahi diotela. Alde horretatik ez da futbolaren desberdina, ezta saskibaloi edota tenisarena ere. Mendi buelta emateak onura gehiago ditu, dudarik gabe.

G. Kaixo Laurentzi! Lehenengo zorionak eta eskerrik asko Berrian Formula 1ari tokitxo bat egiteagatik, eskertzen da horrelakoak jasotzea eta gainera euskeraz!!!Zera galdetu nahiko nizuke. Nor ikusten duzu, orain "izarra" ez denen artean, hemendik urte batzuetara onenen artean egon daitekeela?Badago gazteren bat indarrez sartu daitekena? Eskerrik asko! Joxe Gabilondo

E. Goiz da esateko Australian debuta egin berri dutelako, baina Vallteri Bottas (Williams) eta Jules Bianchi (Marussia) gertutik jarraituko ditut. Batez ere Bianchik harritu nau. Ferrarik dauka fitxatua. Kategoria txikiagoetan, Antonio Felix da Costa oso sendo dator.

G. Kaixo Laurentzi!! Zein dituzu 1F-ko webhorri gustokoenak? LiXiTO

E. Bugattiko Bihurgunea, galdetzea ere! Horrez gain, eguneroko kontsultak, Autosport.com, facebook (taldeen jarioa jasotzeko), twitter-a... eta tarteka denetik: f1fanatic, AMuS, Confidentelle Renault...

G. Hiru motz. 1 Zer da garrantzitsuagoa, autoa edo pilotuaren abilezia? Batez beste? 2. Kubica itzuliko al da 1 Formulara? 3. Zein arau aldatuko zenuke sari Nagusiak entretenigarriagoak egiteko? Perez 'Txekiarra'

E. Bat: Biek elkarren beharra badute ere, gidaria da oraindik garrantzitsuena. Horrek ez du esan nahi irabazteko nahikoa denik. Bi: Bere nahia hala da, baina ukondoak ez dio uzten oraindik. Urteak aurrera doaz eta taldeek ez dute pazientzia askorik. Hiru: Urteetan 1 Formula jarraitu dut eta gutxitan izan dira hain lasterketa entretenigarriak. Ezer aldatzekotan, DRSa kenduko nuke.

G. Pare bat(?) urte izango dira pneumatiko marka bakarra erabiltzen dutela. Uniformizazio hori ona iruditzen zaizu? Ez al zen hobe hor ere taldeen arteko aldeak zeudenean? Uniroyal

E. Etxe bakarra egoteak alde on gehiago dituela uste dut, bi markaren arteko lehiak oso garestiak eta polarizatzaileak zirelako. Pneumatikoek ez lukete hainbesteko garrantzia izan behar. Oraingo kasua ere ez da onena, auto batek bere osotasunean duen konplexutasuna ezin baitu pikutara bota bost itzuli soilik irauten dituen pneumatiko batek. Ezerk ez luke hainbeste nabarmendu behar.

G. Frantziako Sari Nagusirik ez... Bernie Ecclestoneri 1 Formula Europa zaharretik urruntzen ari dela egozten diote, bat al zatoz? Zer iritzio diozu AEBko Sari Nagusiari? Errusiakoa noiz iritsiko da? Magny Cours

E. Errusiakoa datorren urterako dago aurrikusia, Sochi-n. Europa zaharretik urrundu bada, bi arrazoigatik izan da. Batetik, 1 Formula munduko txapelketan dagoelako eta Europan errotuegia zegoen. Bestetik, Europako herrialdeek gero eta zailago dute Berniek eskatzen dien dirua ordaintzeko. Komertzialki onuragarri zaio 1 Formulari AEBetan korritzea.

G. Zein duzu egungo gidarien artean gustukoena? Eta historiakoa? Aimar Agirre

E. Gidari asko ditut gustuko, bakoitzak berezko duenagatik. Hamilton gerlaria da, nahiz eta eskuetan duen abilezia batzutan buruan falta duen. Hura ikustea gozamena da. Historikoen artean Ayrton Senna dut gustukoen, gidari izateaz gain zuen ikuspegiagatik. Gaur duela 53 urte jaio zen, gainera.

G. Denborak ematen duen distantziarekin, zein iritzi duz Epsilon Euskadi egitasmoa izan zenaz? Zertan da eraiki zuten haizearen tunela? Noizbait oinarri sendoak izatera iritsi zenik uste al duzu? Miñao

E. Momentuko olatua aprobetxatu eta azkarregi hazi nahi izan zuen proiektua izan zela esango nuke. Haizearen tunela erabilpenik gabe dago, baina errentagarri izan zedin haren erabiltzaile bakarra ezin zuen Epsilonek izan. Ez dago beste bezeroen arrastorik, ordea. Horrek erakusten du planteamenduan ere oker haundiak zeudela.

G. Busti zaitez. Nork irabaziko du titulua? Jon Lasa

E. Lasterketa bakarra igarota horri erantzutea askotxo litzateke. Hiruren arteko lehia izango dela esango nuke: Vettel, Alonso eta Raikkonen. Bat aukeratu behar badut, izan dadila Raikkonen.

G. Epa Laurentzi. Lagunak galdezka ditut beti: nola azalduko zenuke KERSak 1 Formulan izan duen eragina, eta zergatik gertatzen da eragin hori? Eta beste galdera bat zure baimenarekin: faboritorik aurten? Mitxelto

E. KERSa ohiko motorraz gain lagungarri den motor elektriko bat da. Motor horri eragiteko argindarra autoak berak sortzen du balaztatzerako unean, eta bateria batzutan gordetzen da ondoren erabiltzeko. Potentzia gehigarria da, eta balaztatzen bakoitzean berritzen dena. Desabantaila nagusiak: pisua gehitzen duela eta balaztatzeko modua alda arazten diola gidariari.

G. Kaixo Laurentzi. Urte asko daramat Berrian zure artikuluak irakurtzen,eta betiko eztabaida bat planteatu nahi nizuke. Azken urteetan berritasunak eta babesleak tartean direla, badirudi indarra galdu dutela gidari handiek, eta zure iritzia jakin nahi nuke. Esan nahi dut, berritasunek berdindu egiten dituztela gidarien arteko mailak, eta patrozinatzaileek bultzatuta gidari eskasak edo sartu direla gure kirol honetan. Zer diozu? Aytor Berbinzana

E. Taldeak diru beharrean dira eta gidarien babesleak dira hori lortzeko duten moduetako bat. Beti izan dira diru poltsari esker 1 Formulara iritsi diren gidariak, baina azkenaldian ugarituz doaz. Zaildu dena gidari onak 1 Formulara iristeko aukera izan da, baina bertan irauteko kalitatea behar da, lehen eta orain. Ez dago gidari eskasik, baina onenak direnik ere ezin esan.

G. McLaren beti aurrean ibiltzen den taldea izan da, baina egia esan 2000. urtetik hona txapelketa bakarra irabazi du. Orain Hamiltonez gain taldeko zenbait partaidek alde egin dute. Gainbeheran dagoen taldea al da? Kankkunen

E. McLaren talde handia da eta batez ere baliabide aldetik gutxi bezain sendoa. Hori da Williams bezalako talde baten aldean duen abantaila. KERSa 2007an sartu zenean ere oso gaizki hasi zuen urtea, baina azkenean haiena izan zen teknologia harekin lasterketa bat irabazi zuen lehen taldea. Aurtengo urtea gaizki hasi dute baina hobeto amaituko dute.