Azken elkarrizketa

Aintzane Ezenarro

Aintzane Ezenarro

Aralarreko legebiltzarkide eta Getariko alkatetzarako hautagaia

2007-05-14 - 12:00etan

 Erantzundako galderak

20

G. Irakurle askoren galderak geratu dira zakuan, baina ordubetez aritu gara eta amaitu beharra daukagu. Mila esker BERRIA.INFOko elkarrizketa digitaletan parte hartzeagatik. Hurrena arte. BERRIA.INFO

E. Mila esker guztiei, galdera desberdinak, interesgarriak eta tonu onean egindakoak izan dira. Egia esan, gehienokin elkarrizketa jarrraitzeko gogoarekin geratu naiz, baina izango dugu hurrengo batean ere aukera. Mila esker eta laixter arte.

19

G. Ahotsak-en ildotik, emakumeok ba al dugu politika egiteko estilo berezirik ala pertsonen araberakoa da? Anboto

E. Emakumeok emakume izate hutsagatik ez, baina egia da emakumeoi lotuta egon diren balioak bestelakoak izan direla. Ez gara desberdinak jaiotzez, desberdin egiten gaitu kulturak eta hezkuntzak. Simone de Beavoir-ek esango lukeen bezala " la mujer no nace, se hace". Eta hori kontuan izanda, egia da besteak ulertzeko gaitasuna, bestearen lekuan jartzeko gaitasuna, entzutekoa, bakeak egitekoa, bitartekari izatekoa... gaitasun hauek guztiak emakumeon kulturari lotuak egon direla eta balio horiek gehiago garatu ditugula. Aktibo hori oso garrantzitsua da bake-prozesuetan eta gure kasuan ere erabili egin behar dugu. Adibide zehatz batekin bukatuko dut: Ahotsak-en adostasun falta izan genuen Barajaseko atentatuaren ondoren, baina emaitza ez da haustura izan. Badakigulako haustearekin ez dugula ezer lortzen, aurrera egin behar dugula unerik zailenetan, bereziki. Konstantzia ere emakumeoi lotutako balioa izan da eta holakoetan egin behar dugu gure ekarpena.

18

G. Nafarroa-Bai´k inkestek aurreikusten duen gorakada badu Nafarroan, gobernatzeko prest legoke? eta norekin paktatuko luke? Kepa

E. Bai, noski. Inkestek ematen dizkion emaitzak izango balitu, nafarrak beraiek ariko ziren eskatzen Nafarroa Bai gobernuan sartzeko eta argi esan behar dugu horrela izanez gero erantzukizun osoz jokatuko dugula. Noski, bakarrik ezingo luke gobernatu eta gainontzeko ezkerreko taldeekin bat egitera behartua egongo litzateke, IUN eta PSNrekin, nahiz eta azken honek nafarroaren etorkizun politikoari duen ikuspegia gurearen erabat kontrakoa izan egun. Helburu nagusia UPN ultra-eskuindarra gobernutik kentzea da. Hau lorpen historikoa izango litzateke. Eta beste lorpen historiko bat eta azpimarratu nahi dudana: ezker abertzalea lehenengoz gobernu batean sartuko litzateke eta politika erreala egiteko gaitasuna duela erakutsi.

17

G. Getarian alkatetza lortu ezkero, nola jokatuko zenuten Aldamar jauregia zabalkuntzarekin? Museoa eratzea? Museoak bideragarritasunik ez badu? eraitsi, beste erabilera batzuk eman, e.a.? Herrikoa

E. Aldamar jauregiaren zabalkuntza erraldoi hori egina dago dagoeneko, eta tamalez, atzera bueltarik ez du. Hori dela eta proposatu duguna da horrelako eraikin izugarria izanik, leku nahikoa badagoela museoaz gain, herrirako kultur gune egoki bat egiteko bertan, eta gainera arkitektoekin aztertu dugu eta posible da sarrera desberdin bat ezartzea. Getariak ez du kultur-etxe gutxienekorik: liburutegia oso txikia da, ez du ikasketa gelarik eta ez dugu antzerki edo emanaldi desberdinetarako aretorik. Beraz, hori guztia bertan kokatzea eta eraikuntzaren zati bat museoari lagapenean eman beharrean udalari ematea proposatu dugu. Egin daiteke, posible da, eta zentzuzkoena da.

16

G. Aralarren eta Batasunaren edo ezker abertzale "ofizialaren" arteko desberdintasunak, ez al dira areagotu denbora joan ala? Eneko Txarroalde

E. Desberdintasunak ezagunak dira: batetik indarkeriaren aurrean dugun jarrera desberdina dago. Bestetik, politika egiteko moduan maximalismo antzuak alde batera utzi eta erabaki nagusietan eragin egingo duen ezkerra eraiki nahi dugu ARALAR-en. Eta azkenik, guk hasieratik esan dugu Nafarroak erabakitzeko esparru propioa osatzen zuela eta gauza bera Iparraldeak. Azken gai honetan Batasunak goitik behera bere egin du ARALARen planteamendua eta beraz, errealismora hurbiltzen ari dela ikusteak poztu egiten gaitu. Etorkizunean, beste ezkerreko alderdi batzuekin batera, elkarlanean aritzera behartuak gaudelako.

15

G. Ahotsak-en esperientzia ez al dugu bizkorregi ahaztu? Hain beltzak diruditen garai hauetan ez al luke indar bereziz zerbait egin behar? Mari Jose

E. Ez dugu inondik inora ere ahaztu, azkena duela egun pare bat Durangon izan ginen bertako Kafe Antzokian aurkezpena egiten eta gure egungo egoeraren berri emanez. Momentu honetan barne eztabaida eta barrura begirako prozesu batean gaude. Gure helburua da konpartitzen ditugun printzipio nagusiak (indarkeriarik eza, elkarrizketaren aldekotasuna eta erabakitzeko eskubidea) egungo egoerari egokitzen saiatzen jarraitzea. Martxoan ia adostu genuen testu bat, baina azkenean batasunaren inguruko emakume batzuk (ez guztiak) atzera egin zuten. Kontua da indarkeriarik eza defendatzen dugula esaterakoan, hori zehazteko ere gai izan behar garela indarkeria guztien aurrean, baita ETAren indarkeriaren aurrean ere. Printzipio hauek modu absolutuan defendatuz bakarrik egingo dugu aurrera: elkarrizketaren alde agertuz, gertatzen dena gertatu eta indarkeriarik ezaren alde agertuz, gertatzen dena gertatuz.

14

G. ze nolako emaitzak espero dituzue hauteskundeetarako?Izan ere,aurreko hauteskundeetan lurralde bakoitzean eserleku bat lortuko zenutela esan zenuten eta azkenean bakarra izan zen eta gipuzkoan,hau da,zuk hartu zenuena. Gasteiztarra

E. Emaitzak herritarrek erabakiko dituzte eta nik aurreratzea ezinezkoa da. Baina aurreratu dezakedana da koalizio honek izugarrizko ilusioa sortu duela gizarte sektore zabal eta anitz batengan eta horrek bere islada izango du. Konbentzituta nago ezker eraginkorra inoiz baino eraginkorragoa izango dela hauteskunde hauetatik aurrera eta neurri batean, oposizio zorrotzik gabe eta indar gutxiko oposizioarekin ohituegiak zeuden sektore erosoak deserosotuko ditugula.

13

G. Soziologia "atxagatarra"-ren atzetik ote zabiltzate? Andres Ruiz

E. Zer galdetzen didazu, ea atxagaren euskal herriko ikuspegiarekin bat egiten dugun? Ba neurri batean, eta era pertsonalan erantzungo dizut, niri gustatzen zaizkit Atxagari entzuten dizkiodan kontu batzuk, gutxienez gogoetara bultzatzen dutelako. Baina ez dut uste idazle honek alderdi batek duen ikuspegi oso bat ematen duenik, baizik eta zenbait gogoeta bultzatu. Uste dut hain zuzen ere, helburu horrekin botatzen dituela hainbat ideia: eztabaida probokatzeko, eta hori herri honetan ongi etorria dela uste dut. Besterik gabe.

12

G. Orain arteko jardunean, zein talderekin izan dituzue harremanak errazen, eta zeinekin zailen? Izaro Azkorra

E. Eusko Legebiltzarrari buruz ari bazara, esango dizut gehiengo absolutua ez duen gobernu bat izan denez, legebiltzarrean gai asko eta asko adostu egin behar izan direla eta zentzu horretan ia talde guztiekin adostea egokitu zait. Gutxien alderdi popularrarekin adostu dugu, baina kasu batzuetan baita haiekin ere. Gobernuko taldeekin harreman desberdina izan dugu, gaiaren arabera, eta PSE-EE eta EHAKrekin askotan bat egin dugu, bereziki gai sozialetan.

11

G. Aurreko herri hauteskundeetan, herri gehienetan, AuBri zegokion eserlekurik ez zenuten hartu. Ezker batuarekin egindako hitzarmenarekin, oraingo hauteskundeen ondoren noraino ziurta dezakezue zuen koalizioko kideek (bereziki EB-IUkoek) ez dutela hartuko Abertzale Sozialisten edo EAE-ANVri dagokien eserlekurik? Zehaztu al duzue kontu hau EB-IUrekin? Felix

E. Ikustear dago zer gertatuko den eta ikustear dago oraindik ere zein izango den ezker abertzale ofizialaren hautua eta jokabidea. Guk gure aldetik ahal dugun guztia egingo dugu herri ordezkaritzaren araberako udalak osatzeko, udal kontseilu edo pleno paraleloak martxan jartzeko. Eta prest gaude gainera edozein proposamen entzuteko, beti ere elkar errespetuan oinarrituak badira. Ez dugu esperientzia ona izan azken lau urteotan, inoiz guri ez dagokigun boturik erabili ez badugu ere, irainak eta intimidazioa jasan behar izan ditugulako. Eta argi esangu dut: ilegalizazioa ekiditea ez dago gure esku, beste batzuen esku egon da (eta nahi izan duten lekuetan bakarrik ekidin dute) eta beraz ez dugu onartuko inolako, eraso, mehatxu, ez intimidaziorik. Nahikoa dela uste dugu.

10

G. Legebiltzarkide zara Gasteizen, zinegotzi Getarian, ama... Dobleren bat al duzu? Txomin

E. Beste hainbat eta hainbat ama eta aita bezala, ahal dudan moduan moldatzen naiz. Zenbat gizon eta bereziki emakume dago lan prekario eta ordurik gabekoetan, eta aldi berean amak dira? Amatasuna eta lana uztartzearen arazoa orokorra da, gertatzen dena da gure kasuan ikusi egiten dela. Baina nik uste dut elkartasun eta neurriak behar dituztenak bereziki beste kolektibo batzuk direla eta erakundeetatik erantzun egokiagoak emateko garaia badela.

9

G. Balenciaga Museoaren gaian egindakoa lan oso ona iruditu zait, gutxitan azaleratzen baitira hain argi horrelakoak, ba al dago berririk gai horren inguruan? Joanes

E. Lehenik eta behin eskerrak ematen dizkizut, oposiziotik bakarrik aritu gara salaketa hauek egiten eta EAJren inguruko hainbaten aldetik izugarrizko presioa jasotzen ari garenez, eskertu egiten da babesa. Bada berririk gai honetan: martxoren 8an erakundeek erabaki zuten zer gertatu zen zehatz-mehatz jakiteko azterketa juridiko eta ekonomiko bat eskatzea eta lau astetan publiko egitea. Dagoeneko 11 aste pasa dira eta informea izan arren ez dute publiko egin nahi. Guk badakigu txosten horrek baieztatu egiten dituela guk egindako salaketak eta izugarri larria iruditzen zaigu, irregulartasunak bezain larria, gai honetan erakundeek eta EAJ-EAk osatutako udal gobernuak gaia estaltzeko hartu duen jokabidea. Herriak egia jakitea merezi du, eta beraz, 27an herritarrek irregulartasunak estaltzen dituen udal-gobernua edo kontrol publikoa bermatzen duen udal-gobernuaren artean aukeratu beharko du.

8

G. Aralarre, Irauli korrontea soru da ezkerreko polo soberanista bat bultzatzeko, Ezker gogoa elkartea ere sortu dute Zutik-etik joandako hainbatek, Ezker Batua eta Aralarren koalizioa, Batasunaren diskurtsoan ere aldaketa sakonak egon dira... Posible ikusten duzu epe ertainera ezker eraldatzailearen artikulazio berri bat? Josu

E. Posible eta beharrezkoa ikusten dut epe ertainera begira ezkerra elkarlanean aritzea. Horrela bakarrik lortuko dugu berez ezkertiarra den gizarte batek erakundeetan ezkertiarrak diren ordezkariak izatea. Honekin ez dut esan nahi egitura bakar batean arituko garenik, alderdi desberdinak izaten jarraituko dute, baina elkarlanean aritzera behartuak gaude PNVren alternatiba sendoa izan nahi badugu. Elkarlan horren hazia jarri du Aralar eta Ebren koalizioak.

7

G. Ze ezberdintasun dago eusko alkartasuna eta Aralarren artean?ez litzateke zentzudunagoa izango eurekin egitea koalizioa ezker batua indar ez abertzalearekin baino? Gasteiztarra

E. Errespetu osoz esango dizut nik erakunde desberdinetan egon eta gero, ez dudala ikusi politika edo ekimen bakar bat EAren aldetik PNVtik bereizten duena: ez udalean, ez batzar nagusietan ez eta Eusko Jaurlaritzan. Ni ez naiz inor ezkerrekoa zein den eta zein ez den esateko, baina balorazioak egiten ditut ez esaten dutenagatik, egiten dutenagatik baino. Eta erakundeetako lanean ez dugu ia inoiz bat egin EAkin, honek PNVren proposamen berak babesten zituelako. Bestalde ezker batua ez dela abertzalea badakigu, baina ezkerrak eraginkorra izan nahi badu (bereziki gai sozialak jokoan dauden erakunde hauetan) ezinbestean elkarlanean aritu behar du. Elkarlan hori gutxieneko batzuk konpartituz bakarrik egin daiteke: bide politiko soilen aldeko apustua, eta erabakitzeko eskubidearen onarpena. Etorkizuena orain egin dugun elkarlan honetan beste batzuk ere egotea espero dugu, bide politikoen hautu garbia egiten dutenean.

6

G. Madrazok ez daki ia euskaraz, EBko buru askok ere ez, Duņike Agirrezabalagak esan du udaletik barrutik hasi behar dela euskaratzen, baina beraien artean erdaraz hitz egiten dute. Nola da posible horrelako alderdi batekin bat eginda joatea? Jon

E. Begira hain zuzen ere, Aralarrekin egin duten koalizioari esker EB asko euskalduntzea, eta EBren politikak askoz ere euskaltzaleagoak egitea lortuko dugu. Argi dago ARALAR askoz ere euskaltzaleagoa dela, baina esan bezala, batera joatearen ondorioz, EB ere euskaltzaletasunera erakarriko dugu eta gainera beste hainbat gai sozial eta ekonomikoetan bakarrik joanda eragingo ez genukeen aldaketa eragingo dugu.

5

G. EB aralar koalizioak ze alderdirekin ikus dezake batzea hauteskunde emaitzen ostean? Gasteiztarra

E. EB-ARALARen helburua hauteskunde hauetan bikoitza da: batetik ezkerraren pisua nabarmen igotzea bereziki gai sozialak jokoan dauden erakundeetan (udal eta foru-diputazioak) eta gehiengo absolutuak apurtuz, benetan gure proposamenak kontuan hartzera behartzea gehiengoa izango dutenak. Baina horrez gain, garrantzitsua da erakundeen buruzagitza herri honek erabakitzeko eskubidea duela onartzen dutenengan egotea, horrela herri-kontsulta baten gauzatzera gehiago hurbilduko garelako. Hori dela eta, Nafarroan Nafarroa Baik UPN gobernutik kentzea lortuko duen bezala, Araban PP gobernutik kentzea lortu behar dugu, eta Gipuzkoan ere ahal den neurrian Ardanzaren garaietako PNV-PSE-EE errepikatzea ekiditu behar dugu.

4

G. Zein baldintza bete behar dira gizarte batean biolentziaren erabilera zilegitzat hartzeko? Zilegia iruditzen al zaizu Palestinar gazte suiziden jokaera biolentoa? Zilegia iruditzen, Beslango eskolako bahiketan parte hartu zutenen (emakume gazte mordoxka tartean) jokaera biolentoa? Jokaera hauek justifikatuak daudela iruditzen al zaizu? Barkatu galderaren luzeagatik, eta eskerrik asko. juhda

E. Indarkeriaren zilegitasunaren eztabaidak erlatibismoaren bidetik eramaten badugu, bakoitzak muga desberdinak jarriko dizkio. Eta beraz, erlatibismoaren bidetik beti bilatuko dugu aitzakiaren bat bide horretan jarraitzeko. Eraman dezagun eztabaida indarkeriaren eraginkortasunaren eremura. Zer lortzen dugu egun Euskal Herrian, euskal herritarren kontrako indarkeria erabiliz? Abertzale eta erabakitzeko eskubidearen aldekoen indar metaketa oztopatzea, erakarri nahi ditugun herritarrak urruntzea, mina eragitea... Ez du inolako zentzurik. Eta une historiko bakoitzean helburuekiko estrategiak egokitzeko ausardia izatea da jarrerarik iraultzaileena.

3

G. Ea nola posible den parte hartzea omenaldi batean eta omenduta zeuden pertsona haien artean Meliton Manzanas edo Carrero Blanco bezelako perlak zeudenez nola konbentzitu esker abertzaleko sinpatizante bati zuei boto ematea. Mila esker Joxemari Ibarburu

E. Herri honetan bakea lortu nahi badugu, bakeak duen esanahi guztia kontuan hartuta, ezinbestean sufritu duten guztien mina errekonozitu behar da, guztiena. Hor dago erronka eta hor dago benetako bakerako itxaropena. IRAk ere aspaldi eskatu zien bere biktimei barkamena, eta seguraski biktima horien artean ere egongo zirela gustokoak ez zituzten pertsonak edo eta aldi berean beste batzuen giza eskubideak bortxatu zituztenak ere. Baina bidea hori da. Gainera argumentu hori bera erabili dezakete beste batzuk ETAkoak izanik baina poliziaren biktimak (adibidez Josu Zabala, Anuk...) hauek ezin direla omendu esaterakoan. Gogorra dela ulertu dezaket, baina bakea eraikitzeko hurbilekoaz gain urrunekoen minaz ere jabetu egin behar dugu. Eta horixe da guk egin duguna eta exigitu duguna parlamentuan: indar polizial, parapolizial eta eskuin muturreko taldeen biktima guztien errekonozimendu instituzional eta erreparazio ekonomiko bera izan dezaten.

2

G. Zer egiteko prest dago Aralar Alderdien legea gainditzeko eta zelan bermatuko ditu espresio politikorik gabe gelditu diren hiritarren eskubideak? sergio - abanto

E. Alderdien Legearen aurka beti agertu gara, antidemokratikoa izateaz gain ustez lortu nahi duen helburuaren aurkakoa lortzen duelako: ezin aio eskatu gizarte sektore oso bati bide politiko soiletatik abiatzeko eta ondoren bide politikoa itxi. Gaur egun hauteskunde hauen aurrean dugun egoera gainditzea ez dago alderdi gehienon esku, bereziki PSOE eta Mlnv-ren arteko elkarrizketa eta negoziazio prozesuaren baitan konpondu behar zen. Ez da horrela izan eta orain elkarri hordagoak botatzen ari dira, besteok ikusle soilak izan garen bitartean. Ez dago besteon esku inolako baliabiderik gai honi irtenbideak bilatzeko eta guztiok jakin behar dugu bide zehatz bat aukeratzen dugunean, hautu bakoitzaren ondorio guztien jabe izaten. Hala ere, gu gure aldetik aukera guztiak aztertzeko prest gaude, eskaera guztiak aztertzeko prest gaude herritar guztien partehartzea ahal den moduan bermatzeko.

1

G. Zein zure partiduaren iritzia AHTri buruz? Alde zauzie ala kontra? Eta kontra egonez gero zein da zuen alternatiba? Jokin

E. ARALAR tren sozial eta moderno baten alde agertu da beti eta hori bateraezina da egun euskal erakundeek bltzatu nahi duten Yaren eredu eta trazatuarekin. Lehengo trenbide sarea ahal den neurrian aprobetxatuko duen trenbide sarea, hiriburuak bakarrik izan beharrean eskualdeak ere lotuko dituena eta Nafarroarekin Altsasutik lotuko dena proposatzen dugu. Y grekoaren proposamena zaharkitua dago, Bilbotik bakarrik pentsatua eta EAErako bakarrik pentsatua. Gure proposamena egingarria izateaz gain, ingurugiroa gehiago errespetatzen du eta Euskal Herria hobeto lotzen du.