Albistea entzun

Elektronikoaren hatsak

Moi Moi kolektiboa garatuz doa: Baleapop jaialdiaz gain, labela dauka, Panda Valium & Polygorn horren lekuko
Txomin Ugartemendia <em>Panda Valium</em> izan da Moi Moi Records labelak kaleratu duen lehen artista.
Txomin Ugartemendia Panda Valium izan da Moi Moi Records labelak kaleratu duen lehen artista. GAIZKA IROZ

Nora Arbelbide -

2012ko abuztuak 11 - Getaria

«Gogoan dut nola lagun batzuekin sukaldean bildu ginen: 'Eta label bat sortzen bagenu?'». Gure ametsa zen festibal bat antolatzea eta gure diskoak sortzea. Eta gaur egun hor gara», dio irriz eta pozik Panda Valiumek, bizian Txomin Ugartemendia izena duen artistak.

Hor gara, erran nahi baita, Getarian (Lapurdi), Baleapop jaialdiaren hirugarren ekitaldian. Eta baita grabaketa munduan ere, Moi Moi Records labelak bere lehen grabaketa kaleratu baitzuen maiatzean; Panda Valiumen Copaiba, hain zuzen, binilo gisa. Interneten eskura daiteke, edo, bestela, Ziburu aldeko pare bat tabernatan.

Produkziotik zuzenekora, Panda Valium atzo aritzekoa zen Baleapop jaialdian, Panda Valium & Polygorn formatuan, hau da, baxu, bateria eta gitarrarekin.

Panda Valium bera produktorea da. Musika produktorea, baina konkretuki. Ez ditu DJek bezala besteen soinuak nahasten. Sintetizadorea eta bateria elektronikoak dira haren instrumentuak, eta ordenagailuaren bidez zuzentzen ditu. Eta gero berriz hartuak direnak. Copaiba singlean berean, Panda Valiumen bi zatiez gain, Copaiba izeneko musika zatia bera Groj eta Luke Abbottek berriz hartu eta landu dute. Bi izen ezagun, haren lanari oihartzun baikor bat ematen diotenak. Eta hori aski ez balitz bezala, grabaketa James Holdenek berak berriz hartua izan du bere gaualdi batean. James Holden, hau da, Panda Valiumentzat eta beste anitzentzat erreferentzia nagusietako bat dena; hura ere atzo zen aritzekoa jaialdian. Batek bestea elikatuz doaz aitzina, beti sorkuntzaren alde.

Euskal dantza eta elektronika

Eta oraindik badute besterik buru gibelean. Euskal dantza musika elektronikoarekin nahasi nahi du Panda Valiumek. Jaialdian berean esperimentatzen hasi ziren joan den ostiralean, Donibane Lohizuneko Begiraleak dantzariekin: «Banakoa biziki maite dut. Eta aspalditik nahi nuen entzun, ez bakarrik txistu edo ttunttun batekin. Soinu berriak sartu nahi nizkion». Banakoaren erritmoa hartzen du, eta notak bere makinakoak ditu.

Hots, sukaldeko gau hartatik kolektiboak bere ametsak aitzinarazten ditu, bere baitako artistek berak aitzinatzen diren neurrian. Dozena bat lagun ditu elkartzen kolektiboak. Artisten arteko trukaketak erraztea izan du xede jatorritik, duela zortzi urte kolektiboa sortu zutelarik, Baleapop jaialdiko koordinatzaile Jeanne Boulartek zehaztu duenez. Batzuk musikariak, besteak margolariak, grafistak edo argazkilariak: «Bakoitzak egiten zekiena gehituz, zerbait ona egin genezakeela ohartu ginen. Beti lan egin dugu ezker eta eskuin, dela gaztetxeetan edo beste. Elkarteen mundua ezagutzen genuela gutxi gorabehera, gure nortasunarekin zerbait egin nahi genuen». Berez, musikari dagokionez, musika elektronikoan murgiltzen da kolektiboa, nahiz eta Baleapop jaialdiarekin ateak beste estilo batzuei ireki nahian dabiltzan. Sinpleki kolektiboko Matthys, Sanpantzar, Elorn, Martouf, Odei eta, beraz, Panda Valium, guztiak musika elektronikoan murgilduak direlako.

Hori bai, elektro edo beste, usaiako bide komertzialetatik kanpo nahi dute beren nortasuna, baina, aldi berean, ahal bezain eskuragarri: «Adibidez, euskal dantzak makinekin nahasiz, jendearen erreakzioak bikainak izan ziren ostiralean. Jendarteko batzuk ohartu dira musika elektronikoa maita dezaketela», azaldu du Boulartek pozez.

Arte plastikoetako artistei dagokienez, musikariek beren labela gauzatu ahal izan duten bezala, edizioaren munduan sartzeko desioa dute haiek, arte liburuak ateratzeko. Izan ere, gustukoa dutena egin, eta indarrak batu horretarako, hori dute motorra: «Egia da ohartu garela musika independenteak ez duela erakusleiho anitz Euskal Herrian. Usu, euskal musika euskal rocka dela bakarrik, beste gauza anitz badelarik... baina ez gara abiatu eskas baten betetzeko, baizik eta gogo batekin».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Ahomentan: Agertoki berri baterako lanak

Agertoki berri baterako lanak

Itziar Ugarte Irizar

Badira zenbait auzi behin eta berriz agertzen direnak kulturgileen ahotan, maiz urgentzia forman; dela sortzaileen prekaritatea, dela euskal kulturaren bazterreko egoera. Epe motzean horiek beste leku batean ezartzeko mugimenduak bidean dira, baina badira askatu gabeko eztabaidak ere.

Joxean Muñoz Otaegi eta Amagoia Gurrutxaga Uranga, Donostian. ©Maialen Andres, FOKU

Agertoki berri baterako lanak

Itziar Ugarte Irizar

Badira zenbait auzi behin eta berriz agertzen direnak kulturgileen ahotan, maiz urgentzia forman; dela sortzaileen prekaritatea, dela euskal kulturaren bazterreko egoera. Epe motzean horiek beste leku batean ezartzeko mugimenduak bidean dira, baina badira askatu gabeko eztabaidak ere.

Hazia musikaleko dantzariak, entseatzen, Errenteriako Dantzagunean (Gipuzkoa). ©ANDONI CANELLADA / FOKU

Kooperatiben aitzindariaren fruitua

Andoni Imaz

Gontzal Mendibil musikariak Jose Maria Arizmendiarrieta kooperatiben sustatzailearen bizitza kantu bihurtu du, 'Hazia' musikala sortzeko. Datorren irailaren 17an estreinatuko dute, Arrasaten.

'Orelhas' irudia. ©Alex Rozados.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...