Albistea entzun

Bira

Problema

Idurre Eskisabel -

2013ko azaroak 24

Alabak konbentzituko ditugu ez dezaten printzesa mozorrorik jantzi eskolako festan. Irakasleek ere laster egingo dute balantze kezkagarria: «Ene, hau da hau! Aurten ere gelako bost neska printzesa jantzita!». Eta mespretxua isuriko zaigu printzesa ahoskatzerakoan, izaterik hutsalenaren gorpuztea baita. Baina barregarria irudituko zaigu gelako 9 mutikoetatik 7 Spiderman jantzita etortzea, eta elkar egurtzen ibiltzea: «Hain dira mutikoak!», harrotuko gara. Halaber, txalotu egingo dugu Spidermanez edo futbolariz mozorrotu den neskatoa: nortasun handikoa dela iritziko diogu. Ama maitagarriz jantzita etorri den mutikoa ere babestuko dugu; hau da, egurrean ari zaizkion spidermantxo saldoari esango diogu besteak errespetatu egin behar direla. Baina gure baitan pentsatuko dugu mutil horrek arazo bat duela.

Problema emakumeengan, edo, zehatzago, feminitatean, ezartzen baitugu. Maskulinitate hegemonikoa, aldiz, indarkeriaren ohoratzaile izan arren, bizitzarako eta jendarterako tresna eztabaidaezinen aldarean gurtzen.

Eta bihar xingola ubela jantziko dugu, eta harritu egingo gara berriz, oraindik orain, hainbeste kanpaina eta ekimenen ondoren, hala ere, ez delako apaltzen andrazkoen kontrako bortxa, edo, beste era batera esanda, agresibitatez jokatzen duten gizonezkoen kopurua.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Irizpidea duzulako. Giroan zabiltzalako.

Zuk badakizulako.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.