Albistea entzun

Abel Barriola. Aspeko pilotaria

«Zirkulu bat itxi dudala sentitzen dut»

Azken bi egunak emozio uholdea izan dira, baina ondo ospatu du binakako txapela. Pozik dago, balio handia ematen baitio hiru txapelketetako garaikur bana pilatzeari.
MARISOL RAMIREZ / ARGAZKI PRESS

Imanol Magro Eizmendi -

2014ko maiatzak 6

«Astelehen pixka bat dut», abisua eman du telefonoa hartu bezain laster. Ahots ona du bada Abel Barriolak (Leitza, Nafarroa, 1978), eta umore hobea. Mezu eta dei artean egun osoa telefonotik eskegita pasatu du, baina ez zaio astuna egin. «Polita da jendea zurekin oroitzen dela ikustea».

Zer moduz joan da ospakizuna?

Oso ongi, herriko elkarte batean egin genuen. 90-100 bat pertsona elkartu ginen...

100 pertsona? Afaria bainoago, hori ezkontza bat da!

Leitzar bat finalen batera iritsi den aldiro bildu izan gara jende asko. Oso ondo pasatu genuen; egia esan, irabazteak beste puntu bat ematen dio afariari.

Alde handia azkenekoekin? Gutiziaren bat izan al zenuen?

Bildu garenerako goizaldea zen, baina, tira, merezi zuen. Gutizia eginiko barreak izan ziren, berez ez baitizkiot gutiziak ukatzen neure buruari. Egia da ezberdina izan zela, hainbeste urteetan txapela jantzi ezinda... Ez nekien berriz ere finalen bat jokatuko nuen, berriz ere txapelen bat irabaztera iritsiko nintzen. Hamabi urte ziren... tarte horretan buruari buelta asko eman dizkiot. Jokatzen jakin behar da, eta, irabazten denean, ospatzen ere bai.

Ilusio gehien egin dizun txapela da?

Ni ez nago halakoetara ohituta. Niretzat berezia da txapel bat irabaztea. Azkenekoa duela hamabi urte izan zen... Hamabi urte gogor lanean, maila altuan jokatzen, baina egia da eginiko lan horri txapel bat gehitzea berezia dela.

Hitz egin al duzu Irujorekin?

Ez. Tira, bai, finalaren ondoren aldagelan. Oso hunkituta nengoen. Neure burua ezagutzen dut, malko errazekoa naiz, eta banekien kostatuko zitzaidala negarrari eustea. Irujo ohituta dago, eta, hala ere, hunkituta zegoen. Gorriak ikusi ditu txapelketa honetan.

Egunkariak ikusi al dituzu? Badirudi zuk bakarrik jokatu zenuela?

Bai, Joxerra Leitzako paper dendako lagunak gorde dizkit egunkariak. Eta, tira, hemen txapela biok irabazi dugu. Badakit partida ona egin nuela, eta Juanek ere bai. Izarrak aurrelariak ziren, eta bere aurrelaria jokoan sartzea lortzen zuen bikoteak asko zuen irabazia. Baina, tira, esan bezala, izarrak haiek dira, eta haiek izango dira bereziki gogoratuak.

Barriola ez da izango gogoratua?

Argi dut lortu dudana handia dela, hiru txapelak irabaztea oso gutxiren esku dago, eta ohore bat da. Baina bi horiena beste historia bat da.

Finaleko zein irudi datorkizu burura?

22. tantoa lortu genuenekoa. Nahi baduzu lasaitasuna deitu, baina hogeita bira iristea ibilbidea borobiltzea zela sentitu nuen. Aurrerantzean lehiatzen jarraituko dut, ez naiz erlaxatuko, baina epe motzeko helburuak jarriko dizkiot neure bururi.

Bakean zaude orduan?

Bada... bai. Ni ez naiz filosofiazalea. Niri pilotak ez zidan ezer zor, baina sentitu dut gauza bat itxi banu bezala... Zirkulu bat itxi banu bezala. Hiru txapelak, azkenekoa hamabi urte geroago... atal bat bukatzea izan da.

Partidako bideoa ikusteko asmorik?

Bai, eta ikusten gozatzekoa.

Estrategia ondo hitz eginda zenuten, eta ondo irten zen.

Ondo jokatu genuen, bakoitza bere tokian egon zen. Nik pazientzia nabarmenduko nuke; Olaizolak eta Aretxabaletak defentsa handia dute, biak plazagizonak dira, eta bagenekien irabazteko ez genuela presarik izan behar.

Inor ez zen oroitu Irujoren ezker eskuarekin.

Irujok badaki nola zuen eskua eta zenbat sufritu duen. Beste modu batera jokatu behar genuen, eta uste dut Irujori mesede eta guzti egin diezaiokeela. Pilotari buruz dakitenek beti diote zergatik ez duen eskuin hori gehiago zukutzen, duen distira horrekin... lesioa, agian, onerako izan daiteke.

BERRIAko elkarrizketan agian plazagizona ez zinela zenioen... bada, finalean ondo eutsi zenion presioari.

Hori ezin da prestatu. Aste osoan lasai egon zaitezke, eta finalean, zopa eginda, edota alderantziz. Nik nabaritu nuen tentsioa, baina ondo sumatu nuen burua. Nire ustez, garrantzitsua izan zen ondo hastea.

Mikel Olazabalekin ere oroitu zinen eskaintzetan. Erantzun al dizu?

Ez, baina egingo dugu topo. Pentsatua nuen berarekin oroitzea. Harreman estua dugu, eta hark pilotarekin sufritu eta gozatu egin du. Asko gozatu du, eta bere ametsa profesionaletan txapel bat lortzea zen. Pilotari fin eta saiaturik badago, hura da, eredu bat kantxa gainean eta barruan, eta bera goratu nuenean hori nabarmendu nahi nuen: eredu bat izateko ez dela derrigorrez txapeldun izan behar.

Aspen lehia dago atzelarien artean. Orain indartsuago sentitzen zara?

Irabazi ez banu ere gazteen aurka ondo lehiatu naizela uste dut. Batzuetan galdu, beste batzuetan irabazi, baina haien mailan nago. Badakit gero eta zailagoa izango dela hor mantentzea, baina uste dut borroka horretan nagoela.

Manomanista dator orain...

Gozatzeko. Prestatzeko denbora askorik ez dut izango, baina ez da aitzakia. Jakina da oso gustuko dudala. Oporrak ondoren, behar ditut, binakakoaren azken txanpak asko higatu nau.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Nerea Nevado baloiarekin, atzo, Levanteren aurka. ©Athletic

Denboraldiko lehen porrota Athleticentzat

Berria

Levantek kontrolatu du neurketa, eta Redondoren eta Mayra Rodriguezen golei esker lortu ditu hiru puntuak. 

Nerea Arruti, garaipena ospatzen. ©Idoia Zabaleta / FOKU

Nerea Arrutik eta Andoni Iruretagoienak irabazi dute Euskal Pentatloia

Edu Lartzanguren

Iruretagoiena bigarren urtez nagusitu da. Iazko irabazle Karmele Gisasola bigarren geratu da.

 ©UNAI ZABALETA

«Eibarrekin Lehen Mailara igotzea baino ez daukat buruan»

Iñaki Berastegi

Etxean bikain abiatu du sasoia Eibarrek, baina etxetik kanpo, nahi eta ezin. Arbillaren ustez, partida guztiak irabazteko «gosea» izan behar du taldeak igoeragatik borrokatzeko.
Evenepoel, bakarrik helmugaratzen. ©DEAN LEWINS / EFE

Evenepoelek irabazi du Munduko Txapelketa, modu ikusgarrian

Berria

25 kilometroz bera bakarrik aritu da ihes eginda. 2018an ere irabazi zuen lasterketa.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...