Albistea entzun

«Blindatze neurriak» nahi ditu LABek, enpresak itxi ez daitezen

Konkurtso-lege prozesuetan erakundeek parte har dezatela eskatu du sindikatuak, «langileen enplegua babesteko». Bideragarritasun plan alternatiboentzat finantzaketa publikoa nahi du LABek
LABeko ordezkariak, atzo, Donostian, enpresetako ordezkariekin.
LABeko ordezkariak, atzo, Donostian, enpresetako ordezkariekin. MONIKA DEL VALLE / ARGAZKI PRESS Tamaina handiagoan ikusi

Xabier Martin -

2017ko uztailak 18 - Donostia

Konkurtso legean dauden enpresen prozesuetan «instituzio publikoen parte hartze aktiboa» egotea nahi du LAB sindikatuak. «Hartzekodunen moduan, etorkizuneko planak bultzatzeko eta likidazio planetan langileen enplegua babesteko» nahi du esku hartze hori sindikatuak, «eta ez zorra lehenesteko».

Eusko Jaurlaritzak larri dauden enpresei begira egin duen Plan Industriala plazaratu baino 24 ordu lehenago ezagutarazi du sindikatu abertzaleak, haren ustez, Lakuaren planaren oinarri beharko lukeen dekalagoa. Aurreko astean, eztabaida politikoaren erdian sartu zen Jaurlaritzaren industria politika, hainbat enpresaren arazo larriak direla eta. Bada, gori-gori dagoen eztabaidak segida izan zuen atzo, LABen ekarpenarekin, eta, gaur, gobernuaren txanda izango da.

Eusko Legebiltzarrean ere bere tokia eskuratu du larri dauden enpresen auziak. EH Bilduk Diputazio Iraunkorra eskatu zuen atzo, «industriaren krisiak eragindako egoera» eztabaidatzeko, baina EAJk eta PSEk atzera bota zuten. Alderdi horiek Legebiltzarraren adierazpen instituzional bat onartu nahi izan zuten enpresa horiez kezkaturik daudela azaltzeko, eta EAJk dio EH Bilduk ekidin zuela «hipokrisia erakutsita».

Enpresetako ordezkariak

LABen lehentasuna gaur egun «ehunka langileren etorkizuna» dela azaldu zuen Jonan Goñi sindikatuko industria ataleko arduradunak, Bilbon. CEL, Ingemar, CNA Edesa, Xey, Bosch, Vicrila eta beste hainbat enpresatako ordezkariekin azaldu zen prentsaren aurrera, langile horien eskubideak defendatzeko «aukera bakarra» borroka dela esateko, «instituzioek bakarrik utzi dituztelako».

LABen dekalagoa azaldu zuen Goñik, euskal industria odolustu ez dadin. Industria plan bat osatzeko benetako eztabaida egiteko eskatu zuen lehenik eta behin; enpresen leku aldatzeei benetako muga jartzea proposatu zuen; «edozein preziotan kanpoko kapitalaren etorrerari bultzada emateari utzi behar zaio». Halaber, I+G gastua Europarekin parekatzeko eskatu zuen, %3an, «euskal industriak teknologia maila ertain-txikia baitu». Gainera, sektore estrategikoetan bultzada publikoa behar-beharrezkotzat jotzen du; «merkatuari bere kabuz funtzionatzen utzi beharrean, sektore publiko indartsua eraiki behar da», esan du sindikatuak, eta Kutxabankek horretan ekarpen handiagoa egitea nahi du, «finantzaketa tresna izan dadin».

Enpresa eredu berriak

Itxieren aurrean blindatze neurriak nahi ditu sindikatu abertzaleak. «Finantzaketa publikoaz enpresen bideragarritasun plan alternatiboak sostengatu behar dira, eta konkurtsoan, instituzio publikoen parte hartze aktiboa hartzekodunen moduan, etorkizuneko planak bultzatzeko eta likidazio planetan langileen enplegua babesteko, eta ez zorra lehenesteko».

Enpresen «demokratizazioa» ere egingarritzat jotzen du LABek. Enpresa eredu berritzaileen «bultzada» aipatzen du dekalagoan; «langileen parte hartzea bultzatu behar da; ez finantzatzeko helburu hutsarekin, eskubide batzuk bermatuz baizik».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

<b>Joseba Madariaga Laboral Kutxako Ikerketa zuzendaria, atzo, Iruñeko Tres Reyes hotelean, egungo egora ekonomikoari buruz azalpenak ematen.</b> ©IÑIGO URIZ / FOKU

Nafarroako ekonomia 2022aren hasieran iritsiko da pandemia aurreko mailara

Joxerra Senar

Laboral Kutxaren arabera, ekonomia %6,4 haziko da aurten, eta 2022an %6,7. Joseba Madariaga ekonomistak ohartarazi du hornidura arazoek luze irauten badute susperraldia baldintzatuko dutela

2010. urteaz geroztiko langabezia tasarik apalena neurtu du Eustatek, %8,9

Irune Lasa

Hirugarren hiruhilekoan 15.900 langabe gutxiago daude bigarrenean baino. Guztira, 9.300 landun gehiago daude
Ignacio Sanchez Galan Iberdrolako burua Unai Rementeria Bizkaiko diputatu nagusiarekin, aurreko eguneko ekitaldi batean. ©LUIS TEJIDO / EFE

LABek salatu du EAJk «lotsagabeki defendatzen dituela» enpresa elektrikoak

Xabier Martin

Iberdrolaren «xantaia» agerikoa dela uste du sindikatu abertzaleak, «eta baita euskal patronalaren lankidetza ere» estrategia horren alde

EHNEko, harategietako eta Jaurlaritzako ordezkariak, gaur, proiektuaren aurkezpenean. ©EHNE

Ekoizle txikien produktuen banaketa errazteko proiektu pilotu bat hasi dute

Julene Frantzesena - Urola Kostako Hitza

Gipuzkoako EHNEk, Ederto harakinen taldeak eta Gipuzkoako hainbat ekoizlek eta harakinek Azpeitian aurkeztu dute egitasmoa gaur, ostirala. Gaurtik aurrera, Gipuzkoako hamabost saltokitan 11 ekoizleren askotariko produktuak eskuratu ahal izango dira.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.