Albistea entzun

Iragana susmopean dago berriz

Olinpiar Jokoetako atletismo proben ia erdietan, badira hogei urte baino gehiago munduko markak ondu ez direla. Horietako batzuk, gainera, dopinaren itzalpean daude. Horregatik, munduko marka guztiak baliogabetzeko eskatu du Erresuma Batuko Atletismo Federazioak. Nazioarteko Federazioa kontra dago.
Atleta batzuk, ahalegin betean, Glasgowko Hampden Park estadioan, Diamantezko Ligako 5.000 metroko lasterketan.
Atleta batzuk, ahalegin betean, Glasgowko Hampden Park estadioan, Diamantezko Ligako 5.000 metroko lasterketan. ROBERT PERRY / EFE

Julen Etxeberria -

2016ko urtarrilak 26

Olinpiar Jokoetako atletismoko probetako munduko marken zerrendari erreparatuta, zerbaitek atentzioa ematen du: bertan ageri diren marka asko aspaldi lortutakoak dira. Hain zuzen ere, olinpiar probetatik ia erdietan, orain dela hogei urte baino gehiago ezarri ziren munduko markak: 47tik 22tan (%46,8). Berez nahikoa esanguratsua den batez besteko horrek, gainera, gora egiten du emakumezkoen probak bakarrik kontuan hartuta: 23tik hamahirutan dauka munduko markak gutxienez hogei urte (%56,5). Gizonezkoetan, ordea, apalagoa da batez bestekoa, 24tik bederatzitan (%37,5). Beste datu esanguratsu bat hau da: 1988a da munduko marken taulan gehien errepikatzen den urtea, zazpi aldiz, hain zuzen ere. Hau da, duela 28 urte luze lortutakoak dira gehiengo.

Gero eta gertuago al dago muga? Ala azken urteetatik hona dopinaren aurkako borrokan eman diren pausoak eragina izaten ari dira? Hor dago koska. Ziurrenik, ez da baten edo bestearen ondorio, bien arteko nahasketa baizik. Batetik, agerikoa da gero eta zailagoa dela munduko markak ontzea. Gero eta gertuago dago muga, eta, horregatik, tantaka iristen dira munduko markak. Azterketak ere egon badaude diotenak hemendik urte batzuetara ez direla munduko marka gehiago hobetuko. Hego Koreako Politika Publikoen Eskolak egindako ikerketa da guztietan ezkorrena. Horren arabera, 2022rako gizakiak muga joko du atletismoan. Badira beste ikerketa baikorragoak, baina guztiak bat datoz: gizakia mugara iristen ari da.

Bestetik, agerikoa da azken urteetan dopinaren aurkako borrokan eman diren pausoek izango zutela eraginik markak lortzeko. Ez litzateke justua izango aspaldiko marka horiek guztiak susmopean jartzea, baina horien artean badira batzuk zalantzagarriak. Gainera, atletismoaren inguruko azken eskandaluek, Errusiari eta Nazioarteko Atletismo Federazioari (IAAF) lotutako horiek, susmo txarrak areagotu dituzte. Horrenbesteraino, Erresuma Batuko Atletismo Federazioak ezohiko proposamena egin berri du: egun indarrean dauden munduko marka guztiak baliogabetzea, hain zuzen. «Hori da bidea», esan du Ed Warnerrek, Erresuma Batuko Federazioko presidenteak. Arazo bakarra aurreikusi dio neurri hori hartzeari. «Zailena litzateke zehaztea zein marka diren faltsuak eta zeintzuk ez. Adibidez, Florence Griffith-Joynerrek ez zuen inoiz positibo eman. Baina badira munduko marka asko pentsaezinak direnak egungo irizpideak kontuan hartuta».

Ez da halako eskaera egiten den lehen aldia. 2003an, Europa iparraldeko hainbat herrialdek IAAFi eskatu zioten 2000 baino lehen lortutako munduko marka guztiak baliogabetzea, dopinarekin nahastuta zeudelakoan. IAAF horren kontra azaldu zen orduko hartan, eta baita orain ere. «Tentagarria da hori egitea, badirelako marka batzuk benetako hormak direla. Emakumezkoetan, adibidez, duela 30 eta 40 urte lortutako markak, ziurrenik, ez ziren legez egin. Baina, aldi berean, ez litzateke justua izango munduko marka guztiak baliogabetzea, hori eginda atleta garbiak zikinduko genituzkeelako», aitortu du Sebastian Coek, Erresuma Batuko atleta ospetsu izan eta egun IAAFeko presidente denak.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

 ©BENFICA

«Asko ikasi dut hilabete hauetan, halako heldutasun bat nabari dut»

Iñaki Berastegi

Benfica taldean eta Lisboa hirian «gustura» dago Ander Izquierdo: «Beste esperientzia bat bizi nahi nuen». Sasoia min hartuta hasi ostean, «pixkanaka» tokia egin du taldean.
Fem van Empel eta Mathieu van der Poel, garaipena ospatzen, Munduko Txapelketan. ©UCI-BAS CZERWINSKI / EFE

Etxean bezala, inon ez

Eñaut Agirrebengoa

Fem van Empelek eta Mathieu van der Poelek ziklo-kroseko Munduko Txapelketa irabazi dute, etxeko zaleen gozamenerako; aurrenekoz gailendu da Van Empel, eta bosgarrenez Van der Poel.
Eskalatzaile bat, aldapan gora, pioletak eta kranpoiak lagun dituela. ©XABIER MUJIKA

Iraule: Nardasakon kanala

Xabier Mujika

Aizkorriko kanalen artean, Nardasakon da errazenetako bat. Aproposa da pioletekin eta kranpoiekin hasiberriak direnentzat.
Haur bat eskalatzen, atzean laguntza daukala, Donostiako The Factory Boulderren. ©MAIALEN ANDRES / FOKU

Modaren sokatik zintzilik

Beñat Mujika Telleria

Azken urteetan gorakada nabarmena izan du rokodromoko eskaladak. Garai batean mendira eskalatzera joaten zirenak noiznahi presta zitezen sortu ziren, baina, gaur egun, geroz eta bereiziago daude bata bestetik. Kirol osoa da, mugimendu asko lantzeko aukera ematen baitu.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.