Albistea entzun

Eusko Jaurlaritzak bertan behera utzi ditu jaialdietarako laguntzak

Urtebetekoa izango da etena, Kultura Sailak dioenez, baina, jaialdiei abisurik pasatu ez dietenez, dena antolatua dutela jaso dute albistea hainbat antolatzailek, eta kolokan ikusten dute aurrera egitea
Ezpalak jaialdia egin ostean jakin dute antolatzaileek laguntzak bertan behera gelditu direla.
Ezpalak jaialdia egin ostean jakin dute antolatzaileek laguntzak bertan behera gelditu direla. EIBARKO KLUB DEPORTIBOA

Iñigo Astiz -

2016ko ekainak 28

Jaialdientzako diru laguntza deialdia bertan behera utzi du Eusko Jaurlaritzak, baina, erabakia hartzean abisurik eman ez zuenez, jaialdi askok orain jakin dute laguntza jasotzeko aukerarik gabe geratu direla. Kolokan jarri ditu horrek hainbat ekitaldi ertain eta txiki. Zeharka edo errebotez garaiz jakin duten jaialdiak nolabait moldatu dira dirua lortzeko, beste deialdi batzuen bidez edo hitzarmen zuzenen bidez, baina beste askok behin jaialdia bukatu ostean jakin dute ezingo dutela laguntzarik eskatu. Kultura Sailak dioenez, urtebetekoa baino ez da etena, eta deialdia hobeki antolatuta bueltatuko da hurrengo urteetan. Haserre eta kezkatuta daude antolatzaileak, erabakiak kolokan jarri dituelako hainbat ekitaldi ertain eta txiki.

Berez, aurrekontuak onartzean hartu zuten diru saila bertan behera uzteko erabakia, eta aldizkari ofizialean jada ez zen diru sail hori ageri, baina, horrez gain, ez dute bestelako abisurik eman. «Damua» aitortu du horregatik Joxean Muñoz Eusko Jaurlaritzako Kultura sailburu ordeak. Dioenez, laguntza deialdia irekia izateak ekarri du komunikazio arazoa; izan ere, eskariak jaso arte ezin da aurreikusi nor aurkeztuko den, eta, beraz, ezin baita aurreikusi laguntza bertan behera uzteak nori egin diezaiokeen kalte. Ez zegoen zertan abisurik eman, baina aipatu du damua. «Zenbait pertsona sustoa hartuta eta minduta egon daitezke. Jendeak deitu ahala eta bestelako bileretan gaia atera ahala, askorekin hitz egin dugu, baina ez guztiekin. Deialdi ireki bat da, eta horrek esan nahi du onuradunik ez dagoela aldez aurretik, eta ezin genuela batzuengana joan, eta ez besteengana. Baina egia da ez dudala asmatu nola egin».

Urtebetekoa bakarrik izango da etena, Muñozek azaldu duenez: deialdia egiteko modua aztertu nahi dute aurten, eta era ordenatuagoan antolatu hurrengo urteetarako; orain arteko deialdian, alor, zabalpen eta mota guztietako jaialdiek izan baitute eskaria egiteko aukera, berdin erakunde publikoek zein elkarte pribatuek, eta hori guztia ordenatu nahi luke Eusko Jaurlaritzak. «Ikusten genuen anabasa bat sortzen ari zitzaigula», azaldu du Muñozek. «Txukun antolatu nahi genuen deialdia, baina, aurrekontuak ikusirik, ohartu ginen ezinezkoa izango zitzaigula deialdia mantendu eta aldi berean hura ordenatzea». Alorrez alor antolatu nahi lukete etorkizuneko deialdia, azaldu duenez, eta lurraldetasuna orekatzea ere badarabilte buruan. Autofinantzaketa maila altuak ere saritu nahi dituzte, eta euskararen erabilera lehenetsi. Etorkizunean zenbait eragilerekin bi-hiru urteko hitzarmenak sinatzeko asmoa ere badute, baina, oraingoz, deialdirik ez da egingo aurten.

25. urteurrena jarri dio zalantzan Jaurlaritzaren erabakiak Bilbaina Jazz Club elkarteari. Prest du urtebeterako kontzertu programa, baina Gorka Reino programatzaileak ez daki laguntzarik gabe urtea bukatu ahalko duten ere. «Amildegiaren ertzean geunden, eta oso egoera larrian gelditu gara», dio. «Musika Bulegoko bilkura batean eman ziguten albistearen berri Eusko Jaurlaritzako ordezkariek orain egun batzuk. Harrituta gelditu ginen han geunden guztiok: urte pila zeramatzan diru laguntza bat pikutara bidali dute inorekin hitz egin gabe eta inori kontsultatu gabe. Eta, ezer jakin gabe, sei hilabete daramatzagu ja kontzertuak antolatzen, sei hilabete!».

Soluzio partikularrak

Aurten murrizketari murrizketa gehitu zaiola dio Reinok, eta etsita mintzo da horregatik. «Hau amaitzen ari da». Oso kritikoa da, gainera, diru publikoz bultzatzen diren jaialdi handien ereduarekin. «Kultura egiten ari direnak babestu beharrean, sare guztia suntsitzen ari dira, eta, bitartean, herrian ezer uzten ez duten jaialditzar publiko artifizialak antolatzen. Danimarka eta ongi funtzionatzen duten Europako beste herrialdeetan egiten denaren kontrakoa, alegia».

Kulturaren Euskal Kontseiluko kide da Oier Araolaza Ezpalak dantza jaialdiko antolatzailea, eta, beraz, badu harremanik Eusko Jaurlaritzako Kultura Sailarekin; kazetari ere aritzen da, gainera, eta, beraz, erreparatzen die kultur politiken inguruko albisteei, eta, halere, Facebook bidez izan zuen Eusko Jaurlaritzaren erabakiaren berri. «Dantza Hirian jaialdiko zuzendariaren ohar bat irakurri nuen, deitu nion Jaurlaritzako kultur teknikariari, eta baietz esan zidan, kendu egin zituztela laguntzak». Orain hilabete egin zuten Ezpalak dantza jaialdia Iruñean eta Eibarren (Gipuzkoa), eta jaialdia egin ostean jakin du laguntza eskaerarik ere ezingo duela egin. 27.000 euro ingurukoa da jaialdiaren aurrekontu osoa, eta 2.000 edo 3.000 euroren bueltakoa izan da orain arte jaso izan duten laguntza. «Ez gaude laguntza horren menpe, baina ez dauzkagu 3.000 euro», azaldu du. «Jaialdi handiek badituzte hitzarmen zuzenak Jaurlaritzarekin, baina gurearen moduko jaialdi ertain eta txikiek, ez. Eta hori da hainbestetan aipatzen den kultur sarea: portzentaje batean erabat amateurra, eta lan eta esfortzu handi baina aurrekontu txikikoa».

Errebotez jakin zuten Eusko Jaurlaritzaren erabakia Asparrenako Udalean ere (Araba). «Gure kultur teknikariari Arabako Foru Aldundiko teknikari batek eman zion abisua». Eusko Jaurlaritzako kultura teknikariei deitu, eta haiek, baietz, egia zela. 10.396 euro jaso zituzten iazko deialdian, eta, Txelo Auzmendi alkateak azaldu duenez, antzeko kopurua espero zuten aurten ere. Baina ez, eta kolokan utzi zuen horrek Araia-Asparrenako Umore Antzerki Jaialdiaren 23. aldia. «Aho bete hortz gelditu ginen», dio. «Udal txiki bat gara, eta, laguntza horiek gabe, ezinezkoa da jaialdiarekin aurrera segitzea».

Arriskua ikusirik, aurtengo aldiari buruz hitz egiteko eta etorkizunerako konponbide bat bilatzeko eskaria egin zion udalak Jaurlaritzari, eta diru kopuru paretsukoa jasotzea lortu dute azkenean. «Pozik gaude salbatu dugulako aurtengoa, eta eskertzekoa da hori, baina maiatza urduri pasatu dugu, eta beldurra dugu etorkizunera begira».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Annie Ernaux. / ©Nobel Sariak, @NobelPrize

Annie Ernauxek irabazi du Literaturako Nobel saria

Iñigo Astiz

Stokholmen eman du sarituaren berri Suediako Akademiak, eta literatura fikzioaz harago zabaltzeko egindako lana laudatu dio idazleari. Iaz Abdulrazak Gurnah eleberrigileak irabazi zuen saria.

'Denboraz', Txakur Gorria proiektuaren azken lana

Unean uneko argazkiei beste arnasaldi bat

Ainhoa Sarasola

Denboraz, galde-erantzunen bilduma liburua eman du Txakur Gorriak. BERRIAn idatzitako zutabeen txatalak testu eta ilustrazio berriekin josiz, denboraren joanaz gogoeta egin dute. Txakur Gorriaren webgunean, BERRIAren online dendan eta Durangoko 57.  Azokan egongo da eskuragarri.

Aingeru Epaltza, 'Erretzaile damutuen konpainia' liburua eskuan duela, gaur goizean, Donostian. ©Maialen Andres / Foku

Aingeru Epaltzaren 'Erretzaile damutuen konpainia': kolore askotako nobela beltza

Andoni Imaz

Aingeru Epaltzak Edu Saragueta pertsonaia «berpiztu» du 'Erretzaile damutuen konpainia' nobelan, 'Rock'n'roll' idatzi eta 22 urtera. Haren bidez begiratu dio «Iruñea multietnikoari».

Nafarroako Orkestra Sinfonikoak Luis de Pabloren —argazkian, erdian— eta beste hainbat konpositoreren lanak interpretatuko ditu gaur. ©BERRIA

1972ko Iruñea harritu zuten doinuak akordura

Uxue Rey Gorraiz

Gaur hasiko dira 72-22 Topaketak Iruñean. Urriaren 18ra bitarte, eta orain dela 50 urtekoak gogoan, askotariko jarduerek eta emanaldiek artez jantziko dute hiria. Musika berebizikoa da gaur: Teresa Catalanen eta Tomas Marcoren solasaldi bat aurrena, eta Nafarroako Orkestra Sinfonikoaren kontzertua ondotik.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iñigo Astiz

Informazio osagarria

Iruzkinak kargatzen...