Albistea entzun

JIRA

Espainol (II)

Angel Erro -

2017ko martxoak 7

Aspaldian jabetu naiz Espainiaz gaizki esaka aritzeko joera zaharra dagoela espainiarren artean. Hortaz idatzi nuen hemen 2013ko urriaren 20an. Honako hau bigarren zatitzat har daiteke. Ordukoan Quevedok, Sanchez Ferlosiok, Canovas del Castillok, Cernudak eta Sanchez Dragok Espainia edo espainol izatearen aurka eginiko adierazpen gogorrak jasotzen nituen, orduko hartan Albert Plaren kontrako gurutzadaren bidegabekeria eta proportziorik eza azpimarratzeko. Plari nazka ematen zion espainol izateak, mundu guztiari bezala, espero zuen.

Harrezkeroztik, espainola izatearen abantaila nagusitzat horixe izan dut: Espainia lasai iraindu ahal izatea. Beharbada horregatik saihesten dut gaia, umorez jarduteko bada ere. Baina ez zait itzurtzen EiTBko saio baten kontra dihardutenen kontraesana. Euskaldun guztiak (guztiak?) espainoltzat dituzten arren, ez diete beren buru (ustez espainol)az barre egin dezaten uzten. Hots, zertan gelditzen gara? Pla, Rubianes, euskaldunak (bideokoak)... nork botatzen ditu, beraz, espainiartasunetik azken buruan?

Susmo txarra ematen dit beste gauza batek. Bere burua espainoltzat ez duten euskaldunek espainolez barre egiteak ez ote duen nagusikeria edo are arrazismotik ere. Hori ere esan behar dugu. Guk.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.