Noiz sortua: 2016-11-11 00:30:00

Une bakoitzari begira kantuan

Garik zortzigarren diskoa kaleratu du: 'Estutu'. Oraingoan, Maldanbera talde bilbotarrarekin lan egin du. Rock estilotik aldendutako hizkera «malenkoniatsu» baina «baikorra» darabil
Gari, disko berriko kanta bat abesten, atzo Bilboko Arte Ederren Museoan egindako aurkezpenean.
Gari, disko berriko kanta bat abesten, atzo Bilboko Arte Ederren Museoan egindako aurkezpenean. LUIS JAUREGIALTZO/ ARGAZKI PRESS

Alaitz Armendariz -

2016ko azaroak 11

«Naizena eta nintzena». Lelo hori kantatzen du Iñaki Igon Garitaonandiak Garik bere lan berriko abesti batean, eta ongi islatuko luke bere azken diskoaren edukia. Bilboko Arte Ederren Museoa aukeratu du musikariak Estutu aurkezteko (Elkar), bere zortzigarren diskoa. Zazpi abesti bildu ditu Maldanbera taldearekin batera egindako lanean. Hogeita hamar urteko ibilbidearen ondoren, «bestelako sonoritateak» bilatzen saiatu dela adierazi du abeslari gipuzkoarrak. «Rock estilotik aldentzeko gogoa nuen». Hori dela eta, diskoan rockaren hizkera «desagertu» dela onartu du Garik; orain, «malenkoniatsua da, baina oso baikorra».

Aurreko lanekin alderatuta, Garik disko «sendoagoa eta homogeneoagoa» eratu duela nabarmendu du. «Zer ginen eta zer garen aztertu dugu, eta ez dugu inolako arazorik izan horretaz barre egiteko». Diskoan bizitzaren inguruko hausnarketa egin duela adierazi du, betiere «bizitasunez» beteta. «Azken hamarkadan jolasten ibili gara, eta disko hau horren emaitza da».

Garik «betidanik» eskaini ditu kantu ederrak, Anjel Valdes Elkar argitaletxeko ordezkariaren esanetan. Oraingoan bildu dituen kantak, baina, «kantu ederrak baino gehiago» direla uste du, eta bere disko «pertsonalena» osatu du haiekin. «Garik bere bizitzan oinarritutako kantuak sortu ditu: bere pozak, tristurak, ilusioak...». Bi garairen arteko zubi baten emaitza da lan hau, Valdesen arabera: Gari & Maldanberari hasiera ematen dion proiektua. Estutu-n, Gariren estiloan pisutsuak izan diren bi ezaugarri mantendu direla dio: ahotsaren beroa eta abesti hurbilak.

Maldanbera taldearekin egindako lana hainbat «gorabeheren» ondorio dela adierazi du Garik. Halere, lantaldean aritzea «oso erraza» izan da, haren irudiko. «Zer eta nola nahi genuen ulertu dugu denok». Natxo Beltran, Miguel Moyano eta Oier Aldekoarekin batera grabatu du diskoa, martxotik abuztura bitarte. «Kimika baino gehiago, gure artean heldutasuna nabaritu da». Eta gustura bera horrekin. «Miguel [Moyano] eta biok sormen jolasean ibili gara azken urteetan, eta ondorio batzuetara heldu gara». Eta, dioenez, ateratako ondorio horiekin egin dituzte diskoko kantak.

Presarik gabe

Bere proiektu «bilbotarrena» dela ere nabarmendu du Garik. Osorik grabatu eta ekoitzi dutelako Bilbon. Azaldu duenez, proiektuarekin «oso gogotsu» aritu dira. «Bizitzaren inguruko hausnarketa egin dugu. Bizitza estutu beharra dago bizitzari probetxua ateratzeko», argitu du, diskoaren izenburuaz galdetuta. Momentuak duen garrantziaz ere aritu da: «Bizitzako momentu honetaz gozatu nahi dut, inolako presarik gabe».

Xumetasunaren aldeko apustua egin dute berak eta Maldanbera taldeko kideek, «buelta gehiegirik» eman gabe. «Ez naiz portu bat jaisten ari; badut gelditu eta uneez gozatzeko denbora». Maldanberarekin aritzea apustu «iraunkorra» izango dela adierazi du Hertzainak taldeko abeslari ohiak. «Banda formatuaren alde borrokatu dugu: gauza gutxirekin musika duina egiten saiatu gara».

Denboraren iragatea ere bada diskoaren ardatzetariko bat, eta Berlin izeneko kantua aipatu du Garik. «Hertzainak-en Alemaniako bira hasi genuenean, duela 30 urte, Ex deitzen zen taberna batean egon ginen. Egun Clash du izena». Eta hain justu, horri egiten dio erreferentzia abestiaren hurrengo pasarteak: «Iragan oker batetik nator,/ eta gaur nor nintzen ez dakit./ Kreuzbergera itzuli naiz/ orduko areto hartara./ Den-dena aldatzen da izenez,/dena; ni izan ezik». Duela hiru urte Berlinen zegoela Lou Reed artista hil zela gogoratu du Garik, harentzat «erreferente» bat izandakoa. Gainera, 1980ko hamarkadan Andy Warhol margolariarekin egon zen argazkilari batekin egoteko aukera eduki zuen han, eta nolabaiteko jai bat antolatu zuten, «denboraren iragatearen» inguruan hausnarketa bat egiteko. «Non geunden eta non gauden pentsatu genuen , eta zer izan garen eta zer garen orain».

Diskoaren ekoizpen artistiko eta grabazioaz Jon Agirrezabalaga arduratu da, eta haren ekarpena «oso garrantzitsua» izan dela gogoratu du Garik. Grabatzeko musika tresna «garaikideak» erabili dituzte. Bilboko Arte Ederren Museoan egindako aurkezpenean, esaterako, bi teklatu erabili dituzte. Xumea da abestien funtsa, halere: berak konposatu ditu etxean, gitarra akustikoarekin. «Egiten dakiguna ahalik eta modu duinenean egiten saiatzen gara». Oro har, bizitza beste «perspektiba» batetik begiratzen aritu dela azaldu du.

Zuzeneko emanaldiak

Oraingoz, bi zuzeneko prestatu dituzte hurrengo asteetarako. Lehena azaroaren 26an izango da, Garesko Vinculo etxean (Nafarroa). Nafarroan aritzeak «ilusio handia» egiten diola esan du Garik. «Gero eta musika espazio txikiagoetan mugitzen gara, baina sortzen dugun ikuskizunaren duintasuna mantenduko dugu». Abenduaren 26an ere zuzenean arituko da Donostiako Viktoria Eugenia antzokian, 20:00etan.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Ekainaren 2an eguneratua, 19:00etan. ©BERRIA

Koronabirusaren azken datuak

Berria

Azkeneko 24 orduetan hamar lagun hil dira COVID-19 gaitzaren eraginez. Zortzi positibo atzeman dituzte PCR probekin, eta bost gaixo ospitaleratu dituzte. Euskal Herrian 29.491 gaixok eman dute positibo guztira, koronabirusa atzemateko probaren bat eginda. Horietatik 2.078 hil dira. Grafikoak, albiste barruan.

Aritxulegiko gaina, Nafarroa eta Gipuzkoa artean. ©

Nafarroako Gobernuak «jarrera zuhurra» du lurraldeen arteko joan-etorriekin

Berria

«Autonomia erkidego guztiek dute lurralde mugakideen artean mugitzeko helburu bera, baina litekeena da erritmoa berbera ez izatea», esan du Javier Remirez gobernuko bozeramaileak. Salvador Illa Espainiako Osasun ministroak atzo esan zuen hirugarren fasea bukatu arte ezingo dela autonomia erkidego batetik bestera bidaiatu. 

Heriotza kopurua asteka, Araban, Bizkaian eta Gipuzkoan. ©INE

Nabarmen goratu da izurriak eragindako heriotzen kurba

Edu Lartzanguren

Espainiako Estatistika Institutuak grafiko bat argitaratu du, erakusteko izurriak nola eragin duen heriotza tasan.

Pedro Sanchez Espainiako presidentea, gaurko lehen agerraldian, Kongresuan. ©J. J. Guillen / EFE

Espainiako Kongresuak larrialdi egoeraren seigarren luzapena onartuko du gaur

Paulo Ostolaza

Ekainaren 21 arte luzatuko dute; printzipioz, azken aldiz. Sanchezek iragarri duenez, «hirugarren fasean sartzen diren autonomia erkidegoetan hango presidenteak erabakiko du nolakoa izango den fase hori».

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna