Atxagak irabazi du Euskadi saria, 'Nevadako egunak' eleberriagatik

Iñigo Roquek jaso du itzulpengintzako Euskadi saria, Lobo Antunesen 'Gauzen ordena naturala' liburuan egindako lanagatik, eta Idoia Estornes idazleak jaso du gaztelerazko literaturakoa
Iñigo Roque, Idoia Estornes eta Bernardo Atxaga, bakoitza Euskadi saria irabazi duen lana eskutan, atzo Bilbon egindako ekitaldian.
Iñigo Roque, Idoia Estornes eta Bernardo Atxaga, bakoitza Euskadi saria irabazi duen lana eskutan, atzo Bilbon egindako ekitaldian. MONIKA DEL VALLE / ARGAZKI PRESS

Iñigo Astiz -

2014ko urriak 9
«Hau da gure sari nazionala». Hitz horiekin nabarmendu zuen atzo Euskadi sarien garrantzia Joxean Muñoz Eusko Jaurlaritzako Kultura kontseilariordeak. Aurten ez da nazionalago, baina bai sariago. 2010az geroztik idazleak edo argitaletxeak aurkeztu behar izaten zuen bere lana sariketara, baina aurten iazko produkzio osoa kontuan hartuz aukeratu ahal izan du lanik onena epaimahaiak. Eta egin dute hautua: Bernardo Atxagak idatzitako Nevadako egunak (Pamiela) hibridoa izan da 2013ko libururik onena. Idazleak AEBetan egindako egonaldia du abiapuntu lanak, eta memoria, ametsa eta fikzioa uztartu ditu. Arrazoitu du epaimahaiak erabakia: «Hitzaren magia dario Bernardo Atxagaren prosari liburu honetan». Iñigo Roque itzultzaileak eraman du itzulpengintzako Euskadi saria, eta Idoia Estornes idazleak jaso du gaztelerazko literaturarena.

Antonio Lobo Antunes idazle portugaldarraren Gauzen ordena naturala lanagatik jaso du saria Roquek. Epaimahaiaren hitzetan zergatia: «Jatorrizko testua bihurri halakoa da, zailtasun formalak izan badira, erronka handia izan du itzultzaileak eta ederto gainditu du [...], hartu behar diren arrisku eta libertateak erabiliz». Literatura unibertsala sailean argitaratu dute lana, Alberdania-Erein eta Igela argitaletxeen elkarlanez.

Cómo pudo pasarnos esto liburuagatik eraman du Estornesek gaztelerazko libururik onenaren saria (Erein). Memoria liburu bat da funtsean. «Liburu garrantzitsua, zorrotza eta aurreiritzirik gabea», epaimahaiaren hitzetan.

18.000 euro jasoko ditu saritu bakoitzak, eta sorkuntza lanek 4.000 euroko laguntza izango dute beste hizkuntzetara itzultzen badira. Hurrengo ostegunean jakinaraziko dute zein diren gainontzeko Euskadi sarien irabazleak, eta azaroaren 10ean banatuko dituzte sariak.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna