Albistea entzun
Emakumeen aurkako indarkeriari ez
Emakumeen aurkako indarkeriari ez
Emakumeen aurkako indarkeriari ez

Lehenengoak egindako azkena

Ekainaren 2an aurkeztuko dute zinemetan Juanba Berasategik zuzendutako azken filma: 'Nur eta Herensugearen tenplua'. Toti Martinez de Lezea idazlearen eleberri batean oinarrituta dago lana
Balio hezitzaileak ardatz hartuta sortu dute <em>Nur eta Herensugearen tenplua</em> filma. Irudian, logika jolasaren aurrean Nur, film luzearen protagonista.
Balio hezitzaileak ardatz hartuta sortu dute Nur eta Herensugearen tenplua filma. Irudian, logika jolasaren aurrean Nur, film luzearen protagonista. LOTURA FILMS Tamaina handiagoan ikusi

Ainhoa Larrabe Arnaiz -

2017ko maiatzak 16 - Bilbo

«Zein da autoak estaltzen duen zenbakia?». Logika jolas baten irudia duen papera atera du Eneko Olasagasti Lotura Films ekoizpen etxeko kideak. Marrazkian, zenbakitutako aparkaleku bat, auto batekin: 16, 06, 68, 88, autoa, eta 98. «'Zein da autoak estaltzen duen zenbakia?', galdetzen zigun Juanbak [Berasategik], ekoizten ari ginen filmaren zatiak erakutsi baino lehen». Berasategiren logika proba horrekin hasten da Nur eta Herensugearen tenplua euskarazko film luzea. «8 urteko haurrek oso erraz asmatzen dute logika jolasaren emaitza, baina helduok, berriz, zailtasunak ditugu. Filma bera irudimen joko bat da. Balio hezitzaileak transmititu nahi ditugu ikus-entzunezkoaren bitartez». Berasategi zinemagileak zuzendutako azken pelikula da Nur eta Herensugearen tenplua, eta Toti de Martinez de Lezea idazlearen eleberri batean oinarrituta dago. Ekainaren 2an aurkeztuko dute zinema aretoetan, eta atzo aurkeztu zuten Bilboko Carlton Hotelean.

Berasategik sortu zuen euskarazko animazioko lehen film luzea, 1985ean: Kalabaza Tripontzia, eta zinemagintzan erreferentea izan da ordutik. Bi urte dira Martinez de Lezea idazlearen Nur ipuin bilduma arrakastatsuaren ale bat aukeratu eta pantailaratzeko erronka hartu zuenetik. Hark zuzendutako azken filma da, hain zuzen, Nur eta Herensugearen tenplua 65 minutuko film luzea, joan den apirilaren 28an hil baitzen zinemagilea, 66 urte zituela, minbizi baten ondorioz. Garai «berezian» estreinatuko dute haren azken lana, horregatik. Olasagastik sortu du filmaren gidoia, eta Joserra Senperenak, berriz, musika. Guztira, 40 lagunek baino gehiagok parte hartu dute ekoizpen etxean, filma sortzeko prozesuan.

Berasategik berak sortu zuen Lotura Films enpresa, 1992an, eta hainbat lan kaleratu dira ekoizpen etxearekin: tartean, Barriola, San Adriango azeria (2008) eta Tormesko itsu mutila (2012), baita Goya sarietako izendapena jaso zuten Ahmed Alhambrako printzea (1997) eta Alhambrako giltza (2003) film luzeak ere. Zinemagileak utzitako bidetik lanean segituko dutela azaldu du Miren Berastegi ekoizpen etxeko eta Nur pelikulako lantaldeko kideak. «Juanba [Berasategi] joan den arren, hark eraikitako bidean lanean jarraitzeko asmoa dugu: ikus-entzunezkoak Euskal Herrian eta euskaraz ekoizten».

Fikzioa eta errealitatea

Bederatzi urte dira Martinez de Lezea idazleak Nur ipuin bildumako lehen alea idatzi zuenetik, eta iragarri berri du kaleratzear duela hamahirugarrena. Idazlearen biloba da Nur, eta Txinara bizitzera joan zenean hasi zen gaztearen abenturak idazten. Baina bilobari emateko liburu bakarra izan behar zena hamabi aleko ipuin sorta arrakastatsua da orain. Horietako bat pantailaratzeko proposatu zion Berasategik. «Sorpresa izan zen niretzat».

Zinemagileak ez zuen ausaz aukeratu Nur ipuin bildumaren hirugarren alea, idazlearen arabera. «Ordurako 11 ale neuzkan idatzita, eta hainbat istorio zituen aukeratzeko, baina berezia da Nur eta Herensugearen tenplua, fantasiaz beterikoa, baina, era berean, erreala. Bertako sinesmenetan agertzen diren dragoiak eta Euskal Herriko mitologiakoak ere nahasten ditut. Horregatik aukeratu zuen ipuin sortaren ale hori Juanbak [Berasategik]».

Filma liburuan oinarrituta badago ere, ezberdinak dira istorioak, idazlearen arabera. «Liburua eta ikus-entzunezkoak bi mundu ezberdin dira. Antzekoak dira istorioak, baina ez berdinak. Horregatik, ikusleari ezaguna egingo zaion arren eta pertsonaiak ezagutuko dituen arren, gauza berriak ikusiko ditu». Martinez de Lezeak ez du oraindik pelikula osorik ikusi, maiatzaren 27an Donostiako Principe zineman aurrestreinaldia egin arte itxarongo baitu berak ere.

Nur ipuin bildumak izan duen harrera ikusita, apustua egin du filmaren alde Lotura Films etxeak, eta sustapen kanpaina zabala egingo dute datozen asteetan, pelikulak ahalik eta arrakasta handiena izan dezan. Herri Urratsen izan ziren herenegun, eta Ibilaldian eta Eskola Publikoen jaian ere izango dira filmari buruzko informazioa ematen.

Balio hezitzaileak

Elkarlanerako ariketa da filma, Olasagastiren ustez. «Gu ezin gara lehiatu Disney eta antzeko ekoizpen etxeekin, eta balio hezitzaileetan jarri dugu arreta horregatik: adiskidetasunean eta elkartasunean, kasurako. Horiek guztiak bultzatu nahi ditu pelikulak; betiere, irudimena oinarri hartuta». Hain zuzen, irudimena behar da Nur eta Herensugearen Tenplua filmean azaltzen den eta Berasategik ekoizpen etxeko lankideei jartzen zien ariketa asmatzeko, ariketa duen orriari buelta eman eta zenbakiak alderantziz irakurtzeko: 91, 90, 89, 88 eta 89 bihurtzen dira 16, 06, 68, 88 eta 98 zirenak. 87a estaltzen du autoak.

Pelikula arrakastatsua izatea nahi dute, eta ekainaren 2tik aurrera Euskal Herriko familia guztiei zinemetara joateko deia egin diete Lotura Filmseko kideek. Gaztelaniazko bertsioa ere sortu dute, eta Espainiako eta Kataluniako zinemetan ere egingo dute estreinaldia, egun berean.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Sinbolo bat baliatzeko moduak

Sinbolo bat baliatzeko moduak

Amaia Igartua Aristondo - Bizkaiko Hitza

‘Gernika’ Gernikara plataformaren iritziz, Picassoren artelana "boterearen menpe" dago gaur egun. Madrilgo Reina Sofia museotik Gernikara lekualdatu dezatela nahi dute, memoria historikoa lantzeko, besteak beste. Mobilizazio bat egingo dute bihar, udalerriko Foruen plazatik, 13:00etan.

Garazi Ansa eta Haizea Barcenilla, atzo, San Telmo museoko <em>Baginen bagara. Emakume artistak: ikusgarritasun(ez)aren logikak</em> erakusketan. ©G. ARANBURU / FOKU

Ikusezintasunaren tripak

Itziar Ugarte Irizar

'Baginen, bagara. Emakume artistak: ikusgarritasun(ez)aren logikak' erakusketa jarri du ikusgai San Telmo museoak, martxoaren 13ra arte. Haizea Barcenilla eta Garazi Ansa izan dira komisarioak

 ©BERRIA

Hegaldiari berriz ekiteko prest

Aitor Biain

Liher taldeak 'Eta hutsa zen helmuga' diskoa argitaratu du. Izurriak eragindako «bidaia emozionala» kontatu dute, 11 kanturen bitartez. Ondarroan aurkeztuko dute lan berria bihar iluntzean

 ©GOTZON ARANBURU / @FOKU

Boterearen gezurraren ondorio zoritxarrekoa

Gorka Arrese

Lander Garrok 'Faith' aurkeztu du, Xabi Ugarte pertsonaiaren bigarren eleberria. Euskal Herriko giro politikotik aldendu nahi luke, baina ezingo du. Bartzelonan girotuta dago, mende hasieran

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.