Noiz sortua: 2016-07-20 00:30:00

Euskara lehenetsiko dute Kutxabankek eta Laboral Kutxak Uemako herrietan

Akordioa sinatu dute Uemak eta bi finantza erakundeek, 38 herritan dauzkaten bulegoetan euskara bultzatzeko. Langileak elebidunak izango dira. Erdaraz egin nahi dutenen eskubideak beteko dituzte
Uemako, udaletako, Kutxabankeko eta Laboral Kutxako ordezkariak, atzo, akordioa aurkezten.
Uemako, udaletako, Kutxabankeko eta Laboral Kutxako ordezkariak, atzo, akordioa aurkezten. GORKA RUBIO / ARGAZKI PRESS

Garikoitz Goikoetxea -

2016ko uztailak 20
Lehenetsitako hizkuntza euskara izango dute Kutxabankek eta Laboral Kutxak 38 herritan. Uema Udalerri Euskaldunen Mankomunitatearekin hitzarmena sinatu dute, elkartean dauden herrietan euskara bultzatzeko. Finean, euskaraz aritzeko eskubidea bermatuko diete euskaldunei, langile elebidunak jarriko baitituzte, eta euskararen erabilera handitzeko neurriak hartuko dituzte, lehen hitza euskaraz eginda adibidez. Erdaldunen eskubideei ez diete kalterik egingo neurri horiek.

Hitzarmena atzo sinatu zuten Uemako lehendakari Josu Labakak, Kutxabankeko eta Laboral Kutxako ordezkariek, eta bi entitateen bulegoak dituzten herrietako hautetsiek. Aurrerapausotzat jo zuten lankidetza akordioa. Labakaren iritziz, arnasguneek izaera berezia dutela aitortu dute bi entitateek, eta bere egin dituzte hizkuntza eskubideak bermatzeko eta euskararen erabilera bultzatzeko irizpideak. «Erakunde publiko guztiek hartu beharko lituzketen konpromisoak dira. Alde horretatik, jarrera eredugarria da finantza entitateek hartutakoa».

Kalitatearekin lotu dute euskaraz zerbitzua ematea Kutxabankeko eta Laboral Kutxako arduradunek. «Ezinbestekoa da bezeroek nahi duten hizkuntzan jasotzea zerbitzua», esan du Kutxabankeko ordezkari Eduardo Ruiz de Gordejuelak. Bide bereko, Laboral Kutxako kide Marije Etxanizek azaldu du «maila bereko tratamendua» jaso behar dutela bezero guztiek, euskaldun edo erdaldun izan. Pausoak emateko asmoa agertu dute biek: bulegoak «erdal eremu» ez izatea aipatu du Kutxabankek; normalizazioan «aktibo» aritzea Laboral Kutxak.

Bost urterako hitzarmena da, eta beste bost urtez luzatuko da printzipioz, non eta aldeetako bat horren kontra agertzen ez den. Jarraipen batzorde bat sortu dute.

Beste batzuen bidetik

Hartuko dituzten neurriei begiratuta, finantza entitateek hartutako konpromisoek badute tankera Uemako udalerri batzuetan eta Gipuzkoako Foru Aldundian indarrean dauden euskara planekin —gogoan izatekoa da, bidenabar, aldundiaren plana salatu zuela Madrilgo gobernuak, eta Baztangoa atzera bota duela auzitegiak—.

Hitzarmenean azaldu dute euskara «desorekan» dagoela gaztelaniarekin konparatuta, eta, beraz, neurriak hartu behar direla hura sustatzeko, «euskara zabaltzeko eta sendotzeko». Horretarako, «modu argi eta garbian» sinatu dute bezeroek eskubidea dutela zerbitzua euskaraz jasotzeko.

Horretarako lehen urratsa da finantza erakundeetako bulegoetan lanean ari direnek euskaraz jakitea. Hori bermatu dute bi entitateek, udalerri euskaldunetara langile elebidunak bidaliko dituztela, baita behin-behinekoak badira ere. Bigarrenik, sustapeneko neurriak daude: lehen hitza euskaraz egitea, bezeroak kontrakorik adierazi ezean euskaraz egitea agiriak, karteletan euskarari lehentasuna ematea... Gazteekin beste bide bat urratzeko asmoa ageri da, ikusita ezagutza ia erabatekoa dela: 30 urtetik beherakoei euskaraz soilik igorriko dizkiete agiriak bost urte baino lehen.

Neurri horiek ez diete kalterik egingo erdaldunei. Bezeroek eskatzen badute harremanak euskaraz ez izatea, aukera edukiko dute gaztelaniaz egiteko. Kasu horretan, bi eletan bidaliko dizkiete paperak, euskara lehenetsiz.

Albiste gehiago

Martxoaren 29an eguneratua, 14:00etan. ©BERRIA

Koronabirusaren azken datuak

Berria

Euskal Herrian 7.773 gaixok eman dute positibo koronabirusaren proba eginda, administrazioen arabera. 350 hil dira. COVID-19 gaitza izandako 1.528 pertsonari eman diete alta. Grafikoak, albiste barruan.

Urkullu, atxiboko irudi batean. ©Juanan Ruiz / Foku

Madrilek entzungor egin dio Urkulluren eskaerari

Berria

Eusko Jaurlaritzako lehendakariak gutun bat bidali zion atzo Pedro Sanchez Espainiako presidenteari, eta eskatu zion autonomia erkidego bakoitzak erabaki ahal izatea zeintzuk diren jarduera kritikorako lagungarriak eta beharrezkoak diren jarduerak eta enpresak. Maria Jesus Montero eledunak erantzun dio Madrilek ezin dituela "desberdintasunik egin" erkidego autonomoen arabera.

Kaleak hutsik atzo, igandez. ©Jaizki Fontaneda / Foku

Espainiako Gobernuak 24 orduko luzamendua eman die enpresei, itxialdira egokitzeko

Jon O. Urain

Sanchezen gobernuak igande gauez argitaratu du funtsezkoak ez diren jarduerak eteteko dekretua. 25 sektore zerrendatu ditu.

Mapa: koronabirusaren zabalpena herriz herri

Mapa interaktiboak: koronabirusaren zabalpena herriz herri

Berria

Koronabirusak Hego Euskal Herrian zer nolako zabalpena duen ikus liteke administrazioek emandako datuekin BERRIAk sortu duen mapa honetan. COVID-19aren bilakaera grafikoetan.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna
Garikoitz Goikoetxea

Informazio osagarria