Albistea entzun

Ofizialtasuna zabaltzeari atea ireki dio Ezkerrak, lege berria aipaturik

Euskararen Legea aldatu dute Nafarroan: zona ez-euskaldunetik mistora igaro dira 44 herri; bat, mistotik euskaldunera. Lege berria egiteko prest da Ezkerra, baldintzak adostuz gero
Geroa Baiko eta EH Bilduko ordezkariak, atzoko saioan, Euskararen Legea aldatzea onartu ondoren.
Geroa Baiko eta EH Bilduko ordezkariak, atzoko saioan, Euskararen Legea aldatzea onartu ondoren. IDOIA ZABALETA / ARGAZKI PRESS Tamaina handiagoan ikusi

Garikoitz Goikoetxea -

2017ko ekainak 23

Aldaketa bat egin dute legean, eta legea bera aldatzeko atea ireki da. Keinu bat bai behintzat. Nafarroako Parlamentuak baietza eman dio Euskararen Legea aldatzeari: 45 herrik babes handiagoa izango dute euskarari dagokionez. Haietatik 44 eremu ez-euskaldunetik mistora pasatu dira, eta bat, mistotik euskaldunera. Atetz da herri hori, eta, hain justu, herri horretan ofizialtasuna hartuko du euskarak. Eremu euskaldunean soilik baitu euskarak lege maila hori. Euskalgintzaren urteetako aldarrikapena da ofizialtasuna Nafarroa osora hedatzea, zonifikazioa gainditzea. Atzoko eztabaidan ate bat ireki zuen Ezkerrak —hark jarri du traba gehien lege berria egiteko—: azaldu zuen prest dagoela ofizialtasuna herrialde osora zabaltzeko, lege berria egiteko, baldin eta aurrez zehazten bada horrek «zer obligazio» sortuko dituen. Ofizialtasunak zer dakarren.

Hilabeteetako tramitazioa atzo bukatu zuen Euskararen Legearen aldaketak. Udaletatik oldean iritsitako eskarien ostean hartu dute erabakia parlamentuan. Herri txikiak dira asko, baina badira herri handi batzuk ere: Tafalla, Zangoza eta Erriberri, adibidez. Euskarak ez du ofizialtasunik eremu mistoan, baina bai ez-euskaldunean baino babes handiagoa: herritarrek aukera dute euskaraz jotzeko administraziora, eta pisu gehiago du lanpostu publikoetan.

Bi alde: laukoa eta hirukoa

Gobernuari eusten dion laukoak onartu du legea aldatzea: Geroa Baik, EH Bilduk, Ahal Dugu-k eta Ezkerrak. Eskubideak bermatzeko pausotzat jo dute. Oposizioko hiru taldeek —UPN, PSN eta PP— aurka jo dute, «inposizio» hotsez.

Oposizioak ez du justifikaziorik ikusten udalerriak eremu mistora sartzeko. «Gehienek ez dute euskara ikasi nahi. Minoria gehiengo gisa agertu nahi duzue», adierazi du PSNko ordezkari Inma Juriok. «Milaka euro, inork hitz egiten ez duen hizkuntza bat bultzatzeko», erantsi du Ana Beltran PPko eledunak. «Sektarismoa», UPNko kide Carlos Garcia Adaneroren ustetan.

Laukoak, berriz, pausotzat jo du aldaketa. «Boluntarioa izan da, ez inposizioa», esan du Unai Hualde Geroa Baiko parlamentariak. «Aldaketa koherentea», Ezkerrako parlamentari Jose Miguel Nuinen arabera: «Zona mistoak ez die udalei politika zehatzik ezartzen: haiek zehaztuko dute».

Zonifikazioa gainditu

Udalek mozioak onartu dituzte eremu aldaketak eskatzeko. Ez da eskari bakarra izan: zonifikazioa bertan behera uztea eskatu dute, eta ofizialtasuna zabaltzea. Horretarako pausoak eskatu dituzte EH Bilduk eta Ahal Dugu-k. «Legeak ez ditu asetzen udal eta herritar askoren nahiak», adierazi du Dabid Anaut EH Bilduko legebiltzarkideak. «Urrunago joan nahi dugu». Bide beretik, Laura Perez, Ahal Dugu-ko ordezkaria: «Sakoneko arazoa zonifikazioa da: fikziozko mugak jartzen ditu».

Zonifikazioa bertan behera uzteko adostasunik ez dute egin laukoan orain arte. Ezkerra izan da eragozle nagusia. Hain justu, postura aldaketa bat iradoki du Nuin parlamentariak: «Irekita gaude beste lege bat negoziatzeko, Nafarroa osoan ofizialtasuna ezarriko lukeen lege bat». Edukia adostu nahi dute. «Nafarroan dagoen aniztasun soziolinguistiko horretan, zertan zehazten den ofizialtasuna eta administrazioari zer betebehar ekarriko dizkion». Ari dira hizketan. Adierazgarri da, adibidez, Perez Ahal Dugu-ko kideak Nuinen aurretik esandakoa: «Ofizialtasuna ezartzeak ez dio zertan aurka egin toki bakoitzera egokitutako planifikazio bati».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Bilboko ertzain etxea. / ©Irekia

Bilbon 45 urteko gizon bat atxilotu dute, etxekidea labana batekin erasotzea leporatuta

Berria

Deklarazioa hartu ondoren, espetxeratzea agindu du epaileak.

Hizkuntza eragileetako ordezkariak, atzo goizean, Baionan. ©GUILLAUME FAUVEAU

Eragileak «baikor» dira Parisek murgiltzeaz eginiko zirkularra dela eta

Ekhi Erremundegi Beloki

Aste honetan bilkurak egin dituzte Frantziako Hezkuntza Ministerioko teknikariekin Parisen, eta lehen zirriborro bat aurkeztu diete
Ibaetan duela hilabete batzuk egindako manifestazioa. ©GORKA RUBIO / FOKU

EHUko irakasle batek Ibaetan egindako eraso sexista salatu dute ikasleek

Erredakzioa

Arkitektura Fakultateko irakasle batek ikasleei eraso sexista bat egin ziela salatu dute UIB Unibertsitateko Indar Batasunak eta Arrakalak
Arabako, Bizkaiko eta Gipuzkoako erakundeetako arduradunak izan ziren atzo BECen, estrategia soziosanitarioaren aurkezpenean. ©ARITZ LOIOLA / FOKU

Zaharrak etxean zaintzea sustatu nahi dute instituzioek

Edurne Begiristain

Estrategia soziosanitario berria aurkeztu dute Araba, Bizkai eta Gipuzkoako erakunde nagusiek

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.