Askok jokatu, baina gutxiri tokatu

Urteko estropadarik bereziena izango da gaur Donostian: Kontxako Banderan aritzeko sailkatze estropada. Berezia da motibo askogatik. Kontxakoa izanik denboraldiko estropada handiena arraun munduan, bertan aritzeko aukera eman eta kentzen duen lehiak ezinbestean izan behar du berezia. Dirurik banatu gabe, sari handiena banatzen duen estropada ere bada: urteko lehia nagusian aritzeko pagotxa. Horretarako, ordea, lan handia egin beharko dute arraunlariek, galbahe zorrotza pasatzen duelako sailkatze estropada horrek. Emakumezkoetan, lau ontzirentzat bakarrik dago lekua hurrengo bi igandeetan, eta zazpi izango dira gizonezkoetan. Gaurko parte hartzaile kopurua handiagoa da: zortzi emakumezkoetan, hogeita lau gizonezkoetan. Ez da matematiketan oso trebea izan behar hau ondorioztatzeko: gehienak kanpoan geratuko dira; edo, bestela esanda, oso gutxiri tokatuko zaie sari handia, askok jokatu arren.

Urduri, inoiz baino urduriago egoten dira arraunlariak, entrenatzaileak eta klubetako ordezkariak. Baita zaleak ere. 18:00etan (ETB1) ekingo zaio gizonezkoen probari, erlojuaren aurka, eta kirioak dantzan izango dira orduan. A multzoan ariko dira San Miguel ligako hamabi ontziak, eta B multzoan KAE ligetekoak eta Galiziako Ligako hiru ordezkariak. Zozketak zehaztuko du zein multzo aterako den lehendabizi, eta modu berean erabakiko da multzo bakoitzaren barruan irteera hurrenkera zein izango den.

Zazpi leku, eta sartzeko hautagai asko. Eta itsasoaren iragarpena, gaizto samarra aukeran: haizea dago emanda, ipar-mendebaldekoa, eta estropada jokatzen den ordurako ufada bortitzak iragarri dira. Metro erdi eta metro bitarteko olatuak daude emanda, eta haizeak narrastu egin dezake itsasoa. Betetzen bada iragarpena, olatu garbia ez da azalduko, eta horren ondorioa gardena da: faboritoei ez zaie gustatuko egoera hori. Lau daude pronostikoetan guztien gainetik: Hondarribia, Orio, Urdaibai eta Kaiku. Udako lanak ikusita, barruan behar lukete.

Gero dator saltsa, eta handia, gainera. Itsasoa iragarri bezala badago, San Juanek aukera ederra dauka barruan izateko, erakutsi baitu ondo moldatzen dela baldintza horietan. Cabo da Cruz ere sartzeko moduan egon daiteke, oso denboraldi bikaina ari delako egiten eta askotan sartu delako aurreneko zazpien artean San Miguel ligan. Beste hauek ere aukera dute: San Pedro bikain aritu da azken bi asteetan, eta, lan bera eginez gero gaur, kontuz pasaitarrekin. Portugaletek ere aukera dauka, nahiz eta denboraldian ez duen erakutsi gauza handirik; baina, hain talde indartsua izanda, aukerak eman egin behar. Tiranek ere baditu bereak, distirarik gabeko uda egiten ari den arren. Galiziatik indartsu datorrena hango ligako garailea da: Meira. Aukera izango du horrek ere.

KAE ligako ontziei dagokienez, lan ona egin dezakete ligan goian ibili diren Getaria, Zumaia, Isuntza eta Ondarroak, baina sailkatzea ezuste handia litzateke.

Emakumezkoetan ere, estu

Gizonezkoena baino ordu erdi lehenago hasiko da emakumezkoen sailkatze estropada (17:30, ETB1). Hiru dira sailkatzeko faborito argiak: San Juan, Hibaika eta Zumaia. Hirurek erakutsi dute udan hiru onenak direla. Laugarren lekurako aurreikusten da lehia estua. Oriok lan politak egin ditu azkeneko estropadetan, eta ikusi egin beharko da Meira gainditzeko gai izango den. Cabo da Cruzek eman dezakeenaz ezin da ziurtasunez hitz egin, eta oso-oso aukera gutxi dutenak ondorengo bi ontzi hauek dira: Getaria-Zarautz eta Santoña.