Albistea entzun

Nafarroako barometroa. Alderdien erreakzioak

Baikortasuna eta mesfidantza

Aldaketarako nahia ikusi dute EH Bilduk eta Podemosek datuetan.

UPNk, PPk eta PSNk zalantzan jarri dute inkesta, eta maiatzean bestelako emaitzak lortuko dituztela iragarri dute
Zabaleta Aralarkoa, Adanero UPNkoarekin eta Martin PPNkoarekin hizketan, Parlamentuko korridoreetan.
Zabaleta Aralarkoa, Adanero UPNkoarekin eta Martin PPNkoarekin hizketan, Parlamentuko korridoreetan. JESUS DIGES / EFE

Lohizune Amatria -

2014ko azaroak 22 - Iruñea

Navarrometro-aren datuak jakin eta gutxira, harrituta azaldu dira prentsaren aurrera alderdi gehienetako eledunak. Aldaketarako aukera antzeman dute Bildu, Aralar, Ezkerra eta Geroa-Baiko parlamentariek. UPNko, PSNko eta PPko ordezkariek, berriz, zalantzan jarri dituzte datuak. Maiatzean erantzuna bestelakoa izango dela ziur dira horiek. Podemos Ahal Dugu, berriz, pozik da emaitzarekin, lehen indar gisa aurkezten baitu inkestak. Hala ere, ez da konforme.

PATXI ZABALETA

Aralarko parlamentaria

«Gehienen nahia da Nafarroan aldaketa politikoa izatea»

Aldaketarako nahia eta erregimenari zigorra antzeman ditu Patxi Zabaleta Aralarko parlamentariak inkestako datuetan. «Aldaketaren alde dauden alderdiak dira boto maila handiena lortu dutenak», esan du. «Erregimenaren indarrak izan dira, berriz, inkestak gehien zigortu dituenak».

Aldaketa izango da EH Bilduren erronka. «Gehienen nahia da Nafarroan aldaketa politikoa izatea», azaldu du Zabaletak. Ahalbidetzeko, indar politikoen arteko akordioak behar dira, haren ustez: «Nafarrek ez lukete ulertuko aldaketa aurrera eramateko akordiorik ez izatea».

MAIORGA RAMIREZ

Bilduko parlamentaria

«Erregimenaren protagonistak izan dira gehien zigortuak»

Inkestaren datuetatik ondorio garbi bat atera du Bilduk: «Aldaketa badator». Hala azaldu du Maiorga Ramirez parlamentariak: «Ez dago dudarik, aldaketarako nahia eta beharra dagoela erakutsi digu jendarteak». Aldaketa «erreala» da, haren ustez.

Inkestako datuen arabera, EH Bildu izango litzateke bigarren indarra. Eta emaitza UPN eta PSN alderdien aurkako «agerizko» zigorra izan da, Ramirezen esanetan: «Erregimenaren protagonistak izan dira gehien zigortuak». Horregatik, aldaketa gauzatzeko helburuarekin lan egingo dutela argitu du.

JOAN BOSCH

Iruñeko Podemos Ahal Dugu-ko eleduna

«Ez da gure meritua izan; haiena da, hondamena eragin dutelako»

Twitter bidez eman du lehen iritzia Nafarroako Podemosek: «Izugarrizko indarra ematen digu #Navarrometro-ak, baina ez gara konformatzen. Lan galanta hemendik aurrera. Baina benetako aldaketa badator». Hemezortzi eserleku lortuko lituzke alderdiak inkestaren arabera. Lehen indarra izango litzateke.

Gehiago direla uste dute, baina, alderdiko kideek. Hala azaldu du Joan Bosch Iruñeko Podemos alderdiko eledunak: «Oraindik urria da boto intentzioa». Harritu egin du alderdiak babes gehiago lortu ez izana; haren ustez, egoera soziala oso txarra delako. «Ez gara kasualitatez iritsi egungo egoera sozialera». Boschen ustez, gainontzeko alderdiei esker izan dute emaitza: «Ez da gure meritua izan; haiena da, hondamena eragin dutelako». Podemos bide demokratikoa dela argitu du, eta politika egiteko bestelako era baten alde bozkatutako dutela. «Injustiziara eraman gaituzten politika ekonomiko eta sozialen ondorio izan da emaitza».

CARLOS GARCIA ADANERO

UPNko parlamentaria

«Konbentzituta nago, UPN izango da gehien bozkaturiko indarra»

Seguru mintzatu da Carlos Garcia Adanero UPNko eleduna: «Maiatzean bageunde kezkatuko nintzateke, baina azaroa da, eta inkesta bati buruz ari gara». Alderdiak lortuko lukeen emaitza «aztertzeko modukoa» da, eledunaren ustez. UPNk hemeretzi parlamentari ditu, eta inkestaren aurreikuspenak betez gero, zortzi lortuko lituzke.

Maiatzean emaitza ezberdinak nahi ditu Adanerok; eta, horretarako lan egingo dutela esan du: «Gai izan beharko dugu 2011n UPNren alde bozkatu zutenak konbentzitzeko». Bide beretik jarraituko dutela esan du; inkestak ez duela alderdiak zehaztutako bidea aldatuko. Maiatzean boto gehien lortuko dutenak izango direla dio: «Konbentzituta nago, UPN izango da gehien bozkaturiko indarra».

JUAN JOSE LIZARBE

PSNko parlamentaria

«Ez dira nahi ditugun emaitzak, ezta espero genituenak ere»

Ez zituen emaitza horiek espero Juan Jose Lizarbe PSNko parlamentariak: «Ez dira nahi ditugun emaitzak, ezta espero genituenak erez». Bost eserleku aurreikusten ditu inkestak PSNrentzat, 2011n baino lau gutxiago. Datuak «errespetuz» aztertu behar dira, haren hitzetan. Hala ere, ez du «oso sinesgarritzat» jo inkesta. Eskuineko indarrek lortuko lituzketen eserleku kopuruak jarri ditu zalantzan: «Ezin dut sinetsi eskuina hautesleen %10era murriztu izana». Datuek azaltzen dutena baino emaitza «askoz zabalagoa» espero du Lizarbek, eta PSNk egiten ari duen lanaz fio dela argitu du.

MANU AIERDI

Geroa-Baiko parlamentaria

«Azkar eta sakonki aldatu dute nafarrek beren iritzia»

Harritu egin dute emaitzek Geroa Baiko Manu Aierdi: «Azkar eta sakonki aldatu dute nafarrek iritzia». Arraroa da, harentzat, aldaketa hain nabarmena izatea. «Egoera garatuz doa: orain gure alde bozkatu dute, baina hurrengoan baliteke gure alde ez egitea». Halere, ona da, parlamentariak esanetan; «zoragarria».

«Maiatzean dugu erronka nagusia; sei hilabete zirraragarri ditugu aurretik», aitortu du Aierdik. Inkestaren arabera, bi eserleku galduko lituzke Geroa Baik. Baina, emaitza ezberdina izan daitekeela uste du: «Lantaldea badugu, proposamenak ditugu, eta animoa eta gogoa ere bai».

JOSE MIGUEL NUIN

Ezkerrako parlamentaria

«Beste erantzun bat aurreikustea, engainatzea litzateke»

Zazpi urteko krisi ekonomikoaren ondoren, ondorio politikoak ezinbestekoak dira, Jose Miguel Nuin Ezkerrako eledunaren esanetan. «Gizarteari egin zaion mina izugarria da». Navarrometro-ak ondorio horiek erakutsi ditu, haren ustez. «Beste erantzun bat aurreikustea, engainatzea litzateke». Nafarroan aldaketarako «eskaria» oso indartsua dela dio. Alderdi bitasunaren porrota antzeman du datuetan, eta aldaketa bultzatuko duten alderdien gorakada. Inkestaren arabera, eserleku bat galduko luke Ezkerrak.

ANA BELTRAN

PPko parlamentaria

«Podemos babestu dute, baina alderdiak ez du planteamendurik»

Inkesta gai serioa da, Ana Beltran PPko parlamentariaren ustez. Harritu egin dute datuek. Lau eserleku ditu egun PPNk parlamentuan; inkestaren arabera, bakarra lortuko luke. «Ez dira maiatzean hautetsontzietan izango diren datuak».

«Zigortzeko erantzunak» eman dituzte galdetuek, Beltranen ustez: «Podemos babestu dute, baina alderdiak ez du planteamendurik Nafarroan, eta ez du hautagairik aurkeztu». Zalantzan jarri ditu ere beste alderdien datuak: «Arraroa da nafar zentro eskuinak lehen 23 eserleku izatea eta orain 9».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Euskal Hirigune Elkargoko batzarra, joan den abenduan, Baionako Arteen Hirian. ©BOB EDME

Ezinegonak agerian, elkargoko aurrekontuaren eztabaidan

Ekhi Erremundegi Beloki

Martxoaren 4ko batzarrean bozkatuko dute Euskal Hirigune Elkargoko 2023ko aurrekontua. 2026 arte hogei milioi euro emanen dituzte herrientzat. Lurralde desoreka salatu dute hautetsi batzuek

Plaza Hutsan 350 lagun baino gehiago elkartu dira. ©SORTU

«Herrigintza aro berri bat pizteko oinarria» jarri du Sortuk Burlatan

Mikel Elkoroberezibar Beloki

Plaza Hutsa bete dute 350 lagunek baino gehiagok, herrigintzaren eta estrategia independentistaren arteko lotura sakontzeko helburuarekin.

Gregorio Eskuderoren aldeko manifestazioa, gaur, Orion. ©Gorka Rubio / FOKU

Gregorio Eskudero 70 urteko presoa Euskal Herriratzeko eskatu dute Orion

Berria

Eskuderori hirugarren gradua ezartzeko ere eskatu du Sarek. Orain, Dueñaseko (Espainia) kartzelan dago preso, lehen graduan.

 ©JON URBE / FOKU

«Ez genuen espero, identifikazio saioa egitea beti ukatu baitigute»

Xabier Martin

Merinok ez zuen espero, 40 urte pasatuta, segadan parte hartu zuten poliziak identifikatzeko saio batera deituko zutenik. Fisikoki aldatu arren, Merino ziur dago aurpegiez: «Haien eskuetatik pasatu garenok badakigu».

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.