Albistea entzun

Arraunlariek ukatu egin dute

Urdaibain aritutako arraunlari eta patroiek epailearen aurrean deklaratu dute ez zirela inoiz dopatu.

Medikuak bitamina suspergarriak ziztatzen zizkiela onartu dute, baina sekula ere ez zainetatik
Iñigo Aldai Urdaibaiko arraunlari izandakoa, epailearen aurrean deklaratzen, atzo.
Iñigo Aldai Urdaibaiko arraunlari izandakoa, epailearen aurrean deklaratzen, atzo. LUS TEJIDO / EFE

Pello A. Zuazo -

2015eko azaroak 4 - Bilbo

2009-2010ko denboraldian Urdaibai taldean aritu ziren hamabi arraunlarik eta bi patroiek ukatu egin zuten atzo dopatzeko produktuak hartu zituztenik. Urdaibaiko arraunlarien ustezko dopatze auziaren bigarren saioa egin zen atzo Bilboko Zigor Auzitegian, eta han deklaratu zuten denek. Borja Garai taldeko orduko medikuak «suspertzeko bitaminak» injektatzen zizkiela esan zuten, ez besterik. «Sorbaldan, ipurdian eta tripan» hartzen zituzten ziztadak, baina ez, ordea, zainetatik. Izan ere, osasun agintaritzak guztiz debekatzen du metodo hau erabiltzea kirol jardueretan. Halere, arraunlari guztiek onartu zuten ez zekitela zehazki zer substantzia mota erabiltzen zuen, eta galdetu ere ez zutela egiten, medikuarengan konfiantza osoa zutelako. «Gure lana entrenatzea eta lehiatzea zela esaten zigun medikuak, beste guztia bere ardura zela eta berataz fidatzeko», esan zuen Miguel Angel Millaresek. Hark, gainera, adierazi zuen egon den «klub guztietan» ziztatu dutela.

Fiskaltzak eta akusazio partikularrak proposaturikoak izan ziren atzo deklaratu zuten lekuko guztiak. Asteleheneko lehen saioan, aldiz, hamar akusatuek deklaratu zuten, euren artean, Josu Zabalondo klubeko lehendakariak, Borja Garai medikuak, Jose Manuel Francisco entrenatzaileak eta Marcos Maynar, ustez dopatzeko substantziak kudeatzeaz arduratzen zen medikuak.

Urdaibaiko arraunlari izandako lekuko babestu batek ere hitz egin zuen lehen saio horretan. Estropadetara joaten zirenean bi furgoneta eramaten zituztela, eta iritsi aurretik, zerbitzugune batean gelditu, eta furgonetetako batean ziztatzen zituztela salatu zuen. Gaurko lekuko guztiek, ordea, aho batez ukatu dute furgonetetan injekziorik hartu izana, baita hozkailu-motxila bat bazenik ere. Bakar batek adierazi du estropada baten ostean «zerbait» ziztatu ziotela furgoneta barruan.

Ziztada horiek lehiatu aurretik eta ondoren hartzen zituzten, baita astebarruko entrenamenduetan ere. Dena den, ez zela beti horrela egiten esan dute; «estropadaren edo arraunlari bakoitzaren errendimenduaren eta egoera fisikoaren araberakoak» zirela. Baina gehienek onartu egin dute dosiak maiztu egin zirela udan, eta Kontxako Bandera hurbilduz zihoan heinean.

Fiskaltzak lekuko guztiei galdetu zien ziztadak ematen zizkieten klubeko erizain gelan makina bat ote zegoen. Baietz esan zuten arraunlari guztiek, baina «ergometria probak» egiteko zela. Proba horietan, «belarritik edota atzamarretik odol tanta batzuk» ateratzen zizkieten, horrela laktato neurtu eta errendimendu fisikoa aztertzeko.

Denboraldi bikain hura

Odol analisiei dagokienez, lekuko batzuek «hilabetero» egiten zituztela aipatu zuten, eta beste batzuek bi hilero. «Analitika asko egiten zizkidaten, inoiz ez dizkidate hainbeste egin» nabarmendu zuen Mikel Ojedak.

Analitika horiek jende desberdinak egiten zizkietela esan zuten; batzuetan, klubean bertan bertako mediku edo erizainaren bitartez, besteetan klubarekin zerikusirik ez zuen jendeak egiten zizkiela, edota Bilboko Virgen Blanca klinikara joaten zirela.

Denboraldian zehar, egin zizkieten dopin kontrol guztietan «negatibo» eman zutela azpimarratu zuten denek. Marcos Maynar ustez dopatzeko botikak kudeatzeaz arduratzen zen medikuarekin harremanik eduki izana ere ukatu zuten. Bermeon ikusi zutela bai, baina ez zutela pertsonalki ezagutu. Soilik batek onartu zuen hitzaldi bat entzun ziola.

2010ean sasoi paregabea egin zuen Urdaibaik. Kontxako Bandera irabazi ez arren, erregularrenak izan ziren: TKE liga irabazi zuten. Arraunlarien esanetan, «denboraldia hasi bezain laster, emaitza onak lortu genituen. Maynarren etorrerak, denboraldi erdialdera, ez zuen inolako zerikusirik izan gure errendimenduaren hobekuntzan».

Javier Polok, berriz, aitortu zuen,«urte batzuk lehenago», Castron zebilenean, «zainetatik» ziztatzen zituztela, Jose Luis Korta entrenatzaile zela. Hain zuzen, Kortaren salaketa batzuk direla-eta jarri da abian auzibide hau.

Fiskaltzak eta akusazio partikularrak lekuko berriak proposatu nahi izan zituen, baina epaileak ez zituen onartu, jada epaiketa hasita dagoelako eta legetik kanpo jokatzea litzatekeelako. Gaur, arraunlari gehiagok eta operazioan parte hartu zuten guardia zibilek deklaratuko dute.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

 ©JAIZKI FONTANEDA / FOKU

«Giro onak lagundu digu prestatzen eta gozatzen»

Jon Ander De la Hoz

Azurmendik eta Alberdik irabazi dute Sherpa Airen binakako txapela. Biei «ilusioa» egin die elkarrekin gailentzeak. Finalean egindako lan ona azpimarratu dute.
Teresa Errandonea atleta Donostiako belodromoan. Bertan entrenatzen da eguraldi txarra dagoenean. ©JAGOBA MANTEROLA / FOKU

Erori, zutitu, eta jauzi egin

Beñat Mujika Telleria

Min hartuta egotea zaila izaten da kirolarientzat, baina soleoan izandako lesioa atzean utzita, sasoiko itzuli da Teresa Errandonea hamar hilabeteren ostean.
<b>Realeko jokalariak igandean sartutako goletako bat ospatzen.</b> ©LA LIGA

Balio handiko partida

Ainara Arratibel Gascon

Realak atzeratutako liga partida jokatu du gaur Real Madrilen zelaian. Txuri-urdinek segida eman nahi diote igandean lortutako garaipenari

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...