Albistea entzun

Jaurlaritzaren diru laguntzak. Euskal hedabideak

BERRIAri kalte egiteko arriskuaz ohartarazi zuen aholkularitza batek Jaurlaritza

Irizpide aldaketak egitean BERRIAren kasua «oso kontuan» izan behar dela azaldu zuen LKSk.

«Irismena» lehenbizikoz da irizpide, eta giltzarria da: puntuen %70 zehazten ditu
Euskaltegi bateko ikasleak, BERRIA irakurtzen. Artxiboko irudia.
Euskaltegi bateko ikasleak, BERRIA irakurtzen. Artxiboko irudia. IMANOL OTEGI / ARP

Garikoitz Goikoetxea -

2014ko urriak 23

Jakinaren gainean zegoen Eusko Jaurlaritza: euskarazko komunikabideei diru laguntzak emateko irizpideak bere kabuz aldatuta kalte handia egingo ziola BERRIAri. Ez zion euskarazko egunkariak berak soilik ohartarazi. Laguntzetako irizpideak aldatzeko, aholkularitza enpresa bati txostena eskatu zion gobernuak, eta ohartarazpen argia egin zion: «Aldaketak egitean, BERRIAren kasua oso kontuan izan behar da». Oso izaera desberdineko hedabideak elkarren parean jartzea ekarri du aldaketak, eta horrek euskarazko kazeta nazionala okerrago utz zezakeela adierazi zuen LKS enpresak lan txostenetako batean. Hori ikusita, iradokizun bat egin zion Hizkuntza Politikarako Sailburuordetzari: BERRIAri beste laguntza bat ematea, deialditik at utzita.

Jaitsiera handia jasan du euskarazko kazeta nazionalak aurtengo laguntzetan: kolpetik, %14 gutxiago. 210.000 euroko eskastea. 1,3 milioi euro jasoko ditu denera: BERRIA sortu zutenetik jasotako kopururik apalena da —Euskaldunon Egunkaria-k ere, 2002an, laguntza handiagoa izan zuen—. Ez da kasu bakarra BERRIArena: beste hedabide batzuek ere babes apalagoa jasoko dute; Elhuyar aldizkariak eta Hamaika telebistak, esaterako. Tokiko komunikabide batzuek, berriz, diru gehiago eskuratuko dute aurten. Iazko berbera da diru saila: 4.875.000 euro.

Testuingurua kontuan hartzekoa da. Batetik, noiz iritsi den erabakia: urrian, urtea amaitzear dagoela. Urteko diru kontuak taxutzeko arazo handia da laguntzen egonkortasunik eza; are gehiago BERRIAren kasuan, 210.000 euroko jaitsiera jasan baitu aurten. Bestetik, nola iritsi den: sektorearekin adostasunik egin gabe, gobernuak bere kabuz aldatu ditu laguntzak banatzeko irizpideak.

Kontzeptu berria, nagusia

«Irismena» da kontzeptu giltzarria. Orain arteko deialdietan ez zen ageri irizpide hori; aurten sartu dute, eta huraxe bihurtu dute irizpide nagusi: puntuen %70 dira horren araberakoak. Finean, hau neurtu dute: hedabideak hartzen duen esparruan dauden euskaldunen artean, proportzioan zenbatek kontsumitzen duten. BERRIAren kasuan, Euskal Herri osoa duenez esparru, Euskal Herriko elebidun guztietatik zenbatek irakurtzen duten. Kalkulu matematiko hori eginez, zaku berean sartu dituzte hedabideak oro: nazionalak eta tokikoak, doakoak eta ordainpekoak.

Bi aldeetan pairatu du kaltea egunkari nazionalak: eremuari dagokionez, euskaldunagoak eta erdaldunagoak ditu esparru, irismen handikoak eta txikikoak; diru aldetik, kontsumitzaileek ordaindu egin behar izaten dute.

Beste irizpide batzuek ez dute batere pisurik izango. Deialdian, esate baterako, «kalitatea» kontzeptua aipatu ere ez du egiten Hizkuntza Politikarako Sailburuordetzak, nahiz eta Patxi Baztarrika sailburuordeak adierazi zuen aintzat hartuko zutela hori.

Aldaketak egin aurretik, txosten bat egiteko eskatu zion sailburuordetzak LSK aholkularitza enpresari. Hark lan dokumentu batean azaldu zion zein izan zitekeen irizpide aldaketaren eragina; BERRIA aipatu zuen, zer gertatuko zen aurreratuz: «Demagun irizpide berriekin ez zaiola orain arteko neurriko laguntza egokitzen. Jasangarria al da? Defendagarria? Aldizkari nazionala euskaraz, ez al da berez helburua?».

Irismenaren irizpidearekin guztiak zaku berean sartzearen ondorioa azaldu zuen: «Hedabideak, denak bat izango balira bezala tratatuko dira». Oharra: «BERRIAren kasua oso kontuan izan behar da». Beste behin ere bai, erdarazko hedabideei laguntzak emateko asmoa : «Erne, berriro ere, BERRIAren emaitzekin».

Babesa, sinaduren bidez

Jaurlaritzak aurrera jarraitu du asmo horiekin, nolanahi ere. Helegitea jartzea aztertzen ari da BERRIA. Bien bitartean, babes eske, sinadurak biltzeari ekin dio webgunean; 7.500 baino gehiago jasoak ditu dagoeneko. Sare sozialetan ere nabari dira BERRIAren aldeko mezuak, #babestuberria traolarekin. Beste komunikabide batzuek ere egin diote lekua Jaurlaritzaren kolpeari. Katalunian, adibidez, Vilaweb atariak azaldu du BERRIAri kalte egin diola Jaurlaritzak laguntza politika aldatuta.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Elkartearen itxiera salatzeko manifestazioa egin zuten joan den ostegunean, Gasteizen. ©JAIZKI FONTANEDA / FOKU

«Hutsunea» utziko du hirian

Edurne Begiristain

Adra gobernuz kanpoko erakundearen Gasteizko egoitzak ateak itxiko ditu, finantzaketa faltagatik. Migrante asko «babesik gabe» geratuko direla salatu dute.
Suizidioari buruz aritu dira EHUko Udako Ikastaroetan, <em>Izena duena: suizidioa</em> jardunaldian. ©GORKA RUBIO / FOKU

Suizidioa zaurgarritasunean

Oihane Puertas Ramirez

LGTBI kolektiboko kideen eta adineko pertsonen suizidio tasa handiagoa dela adierazi dute EHUko Udako Ikastaroetan suizidioari aurre egiteko tresnei buruz aritzean.
Nafarroako Ospitale Gunea, artxiboko irudi batean. ©FOKU

Hilabetean %42 egin dute gora COVID-19agatik ospitaleratuek

Isabel Jaurena

647 paziente daude koronabirusak eraginda ospitaleetan Hegoaldean. Osasun agintariek zuhur jokatzeko eskatu diote gizarteari

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...