Albistea entzun

Amaitu da itxaronaldia

ERCrekin akordioa lortu edo ez, Masek aurreratu du heldu den astean argituko dituela Kataluniako prozesu subiranistaren hurrengo urratsak
Artur Mas Kataluniako presidentea, hizlari, atzo, Bartzelonako Udalarekin hitzarmen bat izenpetu berritan.
Artur Mas Kataluniako presidentea, hizlari, atzo, Bartzelonako Udalarekin hitzarmen bat izenpetu berritan. MARTA PEREZ / EFE

Oihan Vitoria -

2015eko urtarrilak 8

Katramilatuta segitzen du oraindik Kataluniako independentziarako bideak. Generalitateko presidente Artur Mas eta ERCko buru Oriol Junquerasen arteko hizketaldiek fruiturik eman ez, eta egoera ez aurrera ez atzera dago. Astiro eta mardul joan dira indar politiko subiranista nagusien arteko negoziazioak; hartu-emanak zertxobait hurreratzea erdietsi dute. Dena den, ekintzetan baino hitzetan eduki dituzte aurrerapenak, eta jarrerak urrutiegi daude. Hala, itxaronaldia gehiegi luzatzea kaltegarria izan daitekeelakoan, Masek hurrengo astean emango du prozesuaren bide orriaren argibideen berri, eta ez du kontuan hartuko ERCrekin ados jartzea lortu duen. Honela iragarri du: «Hilabete bateko negoziazio luzeen ondoren, erabakiak hartzen hasteko istantea da. Itxaronaldia ezin daiteke askoz gehiago luzatu, gaizki-ulertuak egon baitaitezke».

Hasierako asmoa leunduta, zerrenda bereizien aukera aztertzeko «prest» agertu da Mas asteon, baldintza bakarra ezarrita: gizarte zibilaren ordezkariak soilik haren zerrendan biltzea; orain arte independentziaren aldeko indarrak zerrenda bakarrean elkartzea hobetsi du. ERC, edonola ere, ez dator bat. Masen proposamenak ez ditu ERCren eskaerak ase. Junquerasek ez deritzo «justua» haren hautagaitza alderdiko kideekin bakarrik osatzeari. Ez du nahi ordezkari erreferenteak CiUrekin joatea, eta uste du, halaber, independentziaren aldeko boto gehiago pila ditzakeela gizarte zibilaren ordezkariak zerrendan txertatuz. Horrela, hilabeteko elkarrizketen ondotik, desadostasunean trabaturik daude oraindik; bata ez da besteaz fio, eta susmo txarrak dira nagusi. Izoztua dago prozesua.

Urte berriarekin batera hasi da hauteskundeetara deitzeko atzerako kontua, duda-mudaz betea. Baita desadostasunen korapiloa askatzeko ahaleginak ere. Justuki, jomuga hori du Masek, akordioa ahalik eta bizkorren lortzea. Generalitateko presidenteak asteartean egingo du horretarako agerraldia. Azken urteko balantzeaz gain, aurrera begirako urratsak ere xehatuko ditu. Litekeena da elkarrengana gerturatzeko bileraren bat egitea lehenago Masek eta Junquerasek, akordioa ixteko. Tempoa neurtzen ibili dira oraino, baina aurrerantzean ez dute astirik izango luzamendu handitan jarduteko, gainean baitituzte maiatzeko udal hauteskundeak. Independentziaren inguruko bozak aurreratzekotan, martxoaren amaieran egitea espero da, kanpaina batek ez dezan bestea irentsi. Deialdia egiteko azken eguna hilaren 27a du Masek; ultimatuma emana diote ERCk eta ANCk.

Kataluniaren independentziaren bide orrira «hobeto» egokitzen den plangintza hitzartzen ari dela berretsi du Masek. Nolanahi ere, iradoki du Junqueras ez dela «batere malgua» izaten ari. Haren arabera, baina, aukera ezberdinak daude oraindik mahai gainean: «Erabaki zail, eta ez arriskurik gabeak hartzeko unea da».

«Zur eta lur» agertu da Kataluniako Gobernuko burua Junquerasen ezetzaren karietara. «Pixka bat harrituta geratu naiz, bai. Barne zailtasun gutxiago egon beharko lirateke». Masek paradoxikotzat jo du A-9ko «arrakastaren» ondorengo une erabakigarrienetan alderdi subiranisten batasuna «zartatuta» egotea, eta azaldu du prozesua aurrera eramateko trabak inoiz baino agerikoagoak direla: «Sinesgaitza dirudien arren, gaur-gaurkoz, horixe da egoera».

ERCren itxikeria, kritikagai

Bestelako ikuspuntua dauka Junquerasek. Twitter sare sozialean erantzun dio Masi: «ERCk ez die baldintzarik jarriko zerrendetara batzeko hautua egiten duten herritarrei, ez eta gizarte zibileko ordezkariei ere». ERCko buruak ez du itunerako zailtasunik ikusten, eta uste du «laster» adostuko dutela «ahalik eta independentista gehien» elkartuko duen formula.

Kritiko agertu da ERCren jarrerarekin Joana Ortega, Generalitateko presidenteordea. Masen proposamen guztiei «ezetz» esatea egotzi dio Junquerasi, eta ohartarazi «itxikeria etengabeak» ondorio latzak ekar ditzakeela: independentziarako prozesua etetea. Hartara, akordioa lortzeko «eskuzabaltasuna» eta «erantzukizuna» galdegin dizkio ERCri: «Ba al dauka borondaterik behin betiko galdeketa egiteko? Generalitateak, behinik-behin, bai, badu».

ICV-EUiA koalizioaren koordinatzaile nagusi Joan Herrera, ordea, ERCren alde agertu da. «Beren bidetik» joan daitezela eskatu die, «Masekin eta CiUrekin hitzarmena lortzeko zama astunean» erori gabe. «Ez zaigu batere gustatzen egunotan ikusten ari garen antzerkia». PSCko Esther Niubok ere «espektakulutzat» jo ditu Mas eta Junquerasen arteko negoziazioak, eta «hauteskunde kalkuluarekin» aritzea egotzi die. «Ez da denbora galtzen egoteko unea. Bai arazoei heldu, gobernatu eta aurrera egitekoa», esan du Niubok. PPCko presidente Alicia Sanchez Camachok, berriz, salatu du negoziazioek kataluniarren etorkizuna baldintzatzen dutela.

Orotara, bost alditan bildu dira Mas eta Junqueras A-9ko galdeketaz geroztik. Isilpean egiten ari dira; aipatutako alderdiek ez ezik, burujabetzaren aldeko erakunde eta mugimenduek ere hartu dute parte. Printzipioz, begi onez hartu dute Masen proposamena. «Modua bainoago, akordioa axola zaigu, korapiloa askatu eta aurrera egiteko», argitu du Omnium Culturaleko buru Muriel Casalsek.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Gerald Darmanin Frantziako Barne ministroa eta Gilles Simeoni Korsikako gobernuburua elkarri eskua ematen, iragan uztailean, negoziazioen lehen bilkura amaitu ostean, Parisen ©CHRISTOPHE PETIT TESSON / EFE

Korsikako hautetsien eta Frantziako Gobernuaren arteko negoziazioak, oinarri bila

Ander Perez Zala

Darmaninek atzeratu egin du bihar uhartera egitekoa zuen bisita, «eztabaida bare baterako baldintzarik» ez dagoela argudiatuta. Protestak antolatu dituzten gazte mugimenduek aho batez eskatu dute elkarrizketak hausteko.

Autodeterminazioaren eta Amnistiaren Aldeko Akordio Sozialaren prentsaurrekoa, gaur, Bartzelonan. ©INTERSINDICAL

Kataluniako berrehun udalerri daude amnistiaren eta autodeterminazioaren alde

Mikel Elkoroberezibar Beloki

Hirurehun erakundek eman diote babesa Autodeterminazioaren eta Amnistiaren Aldeko Akordio Sozialari, tartean alderdi politiko independentistak, zenbait sindikatu eta ikasle antolakunde.

Danimarkako lehen ministro Mette Frederiksen, gaur, Kopenhagen egindako agerraldian. ©Liselotte Sabroe / EFE

Danimarkako bozak azaroaren 1era aurreratu ditu lehen ministroak

Mikel O. Iribar

Gobernu sozialdemokrata babesten duten alderdiek behartuta hartu du erabakia Mette Frederiksenek.

Suhiltzaile batzuk, atzo, bonbardaketa batek Kharkiven (Ukraina) txikitutako lantegi batean lanean. ©SERGEY KOZLOV / EFE

Zelenskik berretsi du ez duela Putinekin negoziatzeko asmorik

Igor Susaeta

Errusiako goi ganberak Ukrainan partzialki okupatutako lurrak anexionatzeko itunak onartu ditu. Kremlinen mapek erakusten dute Moskuren indarrek segitzen dutela gerra frontean atzera egiten

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Irakurleen babesa ezinbestekoa da kazetaritza independente eta konprometitua egiten jarraitzeko.