Albistea entzun

Txirrindularitza. Euskal Herriko Itzulia: pasioaren izenean

«Ezinbestekoa da kontzentrazioa»

Metroka-metroka hasitako burutazioa muturreraino eramanda, Markel Uriarte aretxabaletarrak gurpil bakarraren gainean igo zuen Tourmalet erraldoia iazko abuztuan. Erronka batek beste bat dakarrela jakitun, Angliru igotzea edo Done Jakue bidea egitea dauzka buruan orain.
Markel Uriarte, erronkei aurre egiten dien bezala, gurpil bakarraren gainean.
Markel Uriarte, erronkei aurre egiten dien bezala, gurpil bakarraren gainean. GORKA RUBIO / ARGAZKI PRESS

Unai Zubeldia -

2015eko apirilak 11 - Aretxabaleta

Giharrek asko sufritzen dute postura behartu horretan». Sufrituko ez dute, bada! «Gogor-gogor eginda geratzen dira denak». Mugimendu txikienik ere egin ezinaren ondorioak dira horiek. «Ordubetetik aurrera, eskuak lo hartzen hasten dira, ipurtaldean mina sentitzen da, bizkarrean ere bai... Ezinbestekoa da kontzentrazioa, nekea iristen denean nahikoa delako huts txiki bat egitea oreka galdu eta aurreko gurpilak lurra ukitzeko».

Bizikleta erostera joan, eta bi gurpil gehitxo direla iruditzen zaio beti Markel Uriarteri (Aretxabaleta, Gipuzkoa, 1991). Zerbaitegatik sortu zen, ordea, orekaren jokoa, eta aretxabaletarrak berak egiten du dendan eskaini ezin diotena. Gurpil bakarreko bizikleta ezin diotela eskaini? Bada, aurreko gurpila altxatu, eta aurrera. «Betidanik eduki izan dut gurpil bakarraren gainean ibiltzeko zaletasuna». Uriartek irribarre txiki batekin hasi du kontaketa. «Oso gaztetan hasi nintzen lehian, zazpi urterekin-edo, trialean». Teknika ona esan nahi du horrek. «Iaioa nintzela ikusi nuen berehala; gustatu egin zitzaidan, eta orduan hasi nintzen neure buruarekin erronkan».

Metro bat egingo ote zuen lehenengo, bi metro gero, hiru... Umetan balantzaka hasitako bidea Tourmaleten gora amaitu zen joan den urtean, abuztuaren 25ean eta 26an. Dena zailtzea gustatzen zaiolako gipuzkoarrari. Bi gurpil gehitxo, eta egun bakarra gutxitxo. «Igoera ona egin nuen lehen egunean, haizerik gabe eta giro onarekin, baina, igoera grabatuz, hurrengo egunean berriz saiatzea erabaki nuen». Youtuben dago ikusgai bigarren eguneko igoera, oso-osorik.

Baina nola iristen da txirrindulari gazte bat gehienek bi gurpilen gainean lanak izaten dituzten lekuan bakarraren gainean erronkan hastera? «Lankide batzuen kontua izan zen dena». Euskal Herrian oso ohikoa den moduan... «Bazkari giroan hasi ginen berotzen, Arrasateko Udala auzora bizikletan bizkorren nor igoko ote zen elkarri erronkan». Bi gurpilen gainean lankidea, eta bakarraren gainean Uriarte. Eta bai, Uriartek irabazi zuen. «Ondoren iritsi zen Tourmaleteko erronka. Aspalditik nerabilen buruan, eta iaz iritsi zen momentua. Entrenatu, eta abuztu amaieran joan ginen hara».

Zer-nolako entrenamendua egin behar izaten da, ordea, bizikletan gurpil bakarraren gainean ibiltzeko? «Gerria, besoa, hankak, burua... Dena da garrantzitsua, baina kilometroak egitea, beste sekreturik ez dago». Kilometro bateko saioekin hasi, eta 30ekoak eginez amaitu zuen Uriartek Tourmalet aldera joan aurretik. Esatea errazagoa da, «baina gorputzarekin jolastea da gakoa». Oreka jokoan ibiltzen direnek eskuak zabalduta egiten duten mugimendu berbera egin behar izaten du Uriartek hankekin. «Zabalduz eta itxiz. Oreka jokoa da dena».

Mendiko bizikletan lehian

Orbea taldearekin mendiko bizikletan ibiltzen da Uriarte lehian, enduro modalitatean. «Eta, horregatik, pixka bat baztertuta daukat gurpil bakarreko erronken bidea». Industria Ingeniaritza ikasi zuen, eta masterreko proiektua amaitu nahian dabil orain buru-belarri, erabat lanpetuta. «Amaitzeko gogo ederra daukat». Baina buruan dauzka hurrengo pausoak. «Angliru igotzea da aukeretako bat, eta Done Jakue bidea egitea bestea». Arazo bat dauka, ordea, azken erronka horrek. «Egun asko behar ditudala. Hamar bat etapa behar ditut, haizeagatik geldirik igaro beharreko denbora kontuan hartu gabe». Egun asko dira azkenerako. «Hamabost-hogei bai, segurtasunez egiteko». Eta, gaur-gaurkoz, ezinezkoa du erronka horri heltzea. «Burua lehiaketan sartuta daukadalako erabat».

Uriartek beldurtuta dauzka lagunak. «Lehen erronka botatzea erraza delako, baina hori nik irabazi ondoren, orain jada zailagoa delako». Entzun nahi duenarentzat, erronka itxura zeukan horrek.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Adnan Januzaj eta Alexander Sorloth, elkar besarkatzen, Realeko atzoko bi golegileak, Anoetan. ©JON URBE / FOKU

Nagusitasunez irabazita egin du aurrera

Jon Ander De la Hoz

Realak Atletico Madrili irabazi dio, eta Espainiako Kopako final-laurdenetan ariko da. Txuri-urdinek neurketa osoa jokatu dute, eta arazorik gabe lortu dute gailentzea

Iñaki Williams eta Iker Muniain Athleticeko jokalariak. ©Julio Muñoz / EFE

Athleticek Kopan sendatu nahi du Superkopako zauria

Ainara Arratibel Gascon

Zuri-gorriek final-zortzirenetako kanporaketa jokatuko dute gaur, Bartzelonaren kontra. Marcelinok aldaketak iragarri ditu hamaikakoan

Budimir eta Moncayola Osasunako jokalariak, burumakur, atzo, Celtaren aurkako partidan, Balaidosen. ©SALVADOR SAS / EFE

Zalantzati segitzen du oraindik

Eñaut Agirrebengoa

Osasuna bigunegi aritu da Celtaren zelaian, eta esku hutsik gelditu. Ongi ekin dio lehiari, baina ez da gai izan Mallo eta Minaren golei erantzuteko

Fausto Mota kopilotua, eskuinean, haren taldekide Rui Oliveirarekin, Dakar rallyan. ©FAUSTO MOTA

«Orientazio sena izan behar du kopilotuak»

Mikel O. Iribar

Mota kopilotu gisa aritu da lehendabizikoz Dakar rallyan, aurretik motoetan sei alditan parte hartu eta gero. Hamaseigarren amaitu du, haren taldekidearekin batera, T4 kategorian. «Asko gozatu dut», aitortu du.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.