Departamenduetako bozen bigarren itzuliak ez du ezusteko handirik utzi Zuberoan, Lapurdin eta Baxenabarren. Izan ere, lehen itzulian EH Bai bortz kantonamendutan lehen bi indarren artean kokatu baldin bazen ere, eskuina nagusitu zitzaien igandean lautan, eta, beraz, espero bezala, UMP-Force64 akordioa izanen da berriro agintean. Fronte Nazionalak ez du kontseilari kargurik lortu, eta sozialistek, berriz, hiru eremutan irabazi dute. Pirinio Atlantikoetan, oro har, hamar kantonamendutan gailentzea lortu dute sozialistek, baina hori ez dute aski izanen 2011n lortu zuten gehiengoari eusteko. Hain zuzen, departamenduan hamasei kantonamendutan nagusitu dira eskuineko eta zentroko hautagaiak, eta, hala, Pauera (Okzitania) ezkerra iritsi aitzin izandako 200 urteko agintaldiari jarraipena ematen ahalko diete.

ABSTENTZIO BERTSUA

Lehenbiziko itzulian bezala, bigarrenean ere ia bi hautesletik bat ez da joan bozkatzera Lapurdin, Zuberoan eta Baxenabarren. Abstentzioa, hain zuzen, %48,7koa izan da, hots, lehen itzulian baino doi bat handiagoa: %48,6koa zen martxoaren 22an. Kantonamendu batetik bertzera aldeak daude, halere. Miarritzen izan da abstentziorik handiena: hautesleen %56,29 gelditu dira etxean. Bidaxune aldean, Amikuze eta Oztibarren, aldiz, abstentzioa %38,60koa izan da. Kantonamendu horretan izan da parte hartzerik handiena, proportzioan, eta ondotik Mendialdean, %40,3ko abstentzioa izan baitute.

ESKUINA, URRUNDIK LEHEN

Eskuinak eta zentroak egindako akordioak gehiengo osoa lortu du Ipar Euskal Herrian zein Biarnon, eta, hartara, Pirinio Atlantikoetako departamenduko 27 kantonamenduetatik hamasei eskuratu ditu. Hori dela eta, ez du zailtasunik izanen Departamendu Kontseiluan agintzeko. Ipar Euskal Herrian zortzi kantonamendutan nagusitu da: lautan irabazi dio EH Bairi, eta hirutan PSko edo ezkerreko hautagaiei. Baigura eta Mondarrainen derrigorrean irabazi behar zuen, bigarren itzulira bi eskuineko bikote pasatu baitziren. Isabelle Pargade eta Vincent Bruk irabazi dute, baina ez uste bezain modu errazean: bozen %57,3 lortu dituzte, eta Beñat Intxauspe eta Frantxa Etxeberri-Cachau aurkariek, berriz, botoen %42,69.

Miarritzen, Maider Aroztegi eta Max Brissonek irabazi dute, bozen %54,96rekin, eta Angelun Nicole Darrasse eta Patrick Chasseriaudek, %56,84 lortuta. Ezkerreko Guy Mondorgek ezin izanen du, beraz, kontseilari izaten segitu. Baiona 1en ere eskuinekoak izan dira lehenbiziko indarra: Florence Lasserre-David eta Claude Olivek bozen %66,22 lortu dituzte. Angeluko auzapeza da azken hori, eta kantonamendua bera ere, herri berekoa, ia erabat: kantonamenduaren eremuaren %20 soilik da Baiona hirikoa.

SOZIALISTEN PORROTA

PSk behera egin arren, salbatu ditu Euskal Herriko zenbait eremu: ia Baiona osoa eta Hendaia. Bokale ere barne hartzen duen Baiona 2 kantonamenduan, konparazio baterako, Juliette Muller eta Christophe Martin sozialistek bozen %55,31 eskuratu dituzte. Hendaian aski estua izan da bigarren itzulia: %52,85ekin lortu dute Chantal Kehrig Cottenconek eta Kotte Ezenarrok kontseilari gisa Paueko eserlekua lortzea. Baiona 3koa zen, nolanahi ere, zalantzarik handieneko gunea: lehen itzulian eskuineko Yves Ugalde eta Christine Lauque nagusitu ziren, baina Marie Christine Aragon eta Henri Etxeto sozialistek 336 boz eskasengatik lortu dute bigarren itzulian irabaztea. Baliteke, beraz, abertzale zenbaiten boza haiengana joan izana.

Biarnon emaitza hobeak lortu ditu ezkerrak—zazpi kantonamendutan nagusitu da—, baina gutxiengora itzulita, lau urteko parentesiari bukaera eman beharko dio azkenean.

EH BAI, MUGAN

Bortz kantonamendutan lortu zuen EH Baik bigarren itzulirako sailkatzea, baina horietako bakarrean kokatu da lehen indar gisa. Errobi-Aturriko Fabienne Aiensak eta Alain Iriartek lortu dituzte, hain zuzen, Pirinio Atlantikoetako kontseilari karguak. EH Bai-k kontseilari bakarra izanen du Departamendu Kontseiluan, dena den, Aiensa ez baita koalizio subiranistaren parte —independente gisa aurkeztu zen—. Alde handiz irabazi diote Fronte Nazionalari: bozen %78 lortuta, eta orotara 7.437 bozekin (lehen itzulian baino 3.752 boto gehiago).

EH Baik bertze lau kantonamenduetan irabazi ez baldin badu ere, garaipena hurbil izan du Donibane Lohizunen eta Uztaritze-Errobiko ibarrak-Urdazurin. Kostako kantonamenduan, adibidez, eskuineko Philippe Juzan eta Isabelle Dubarbier 946 bozeko aldearekin baizik ez zaizkie gailendu Peio Etxeberri Aintxart eta Leire Larrasari —10.292 lagunek bozkatu dute guztira—. Uztaritzeko kantonamenduan ere antzekoa izan da indar harremana: Joana Urbistondo eta Santiago Kapendegi abertzaleek bozen %44,4 lortu dituzte, eta Philippe Etxeberriak eta Benedicte Luberriagak %55,6. Aldea 1.189 bozekoa da, kasu horretan.

Mendialdean errazago irabazi diete Pepela Mirande eta Annyck Trounday eskuinekoek Leonie Agergarai eta Antton Kurutxarri abertzaleei, 1.637 bozen aldearekin. Ezberdintasuna nabari da, halere, Baxenabarre eta Zuberoaren artean: EH Bai lehen indarra izan da Baxenabarreko herri ugaritan; Zuberoan, alderantziz.

Bidaxune aldea, Amikuze eta Oztibarren Anne-Marie Bruthe eta Jean Jacques Lasserrek aise irabazi diete EH Baiko Anita Lopepe eta Xabi Larralderi: bozen %61,86 eta orotara 2.210 gehiago lortu dituzte. Abertzaleen alde bozkatu dute anitzek, halere: lehen itzulian baino 1.555 gehiagok.