Albistea entzun

Inork gura ez zuen aurkaria

Athletici Bartzelona egokitu zaio Espainiako Kopako final-laurdenetan.

San Mamesen jokatuko dute joanekoa, datorren astean, eta Camp Noun itzulikoa, astebete geroago
Athleticeko eta Bartzelonako jokalariak, Del Cerro Grande epailearekin eztabaidan, ligako lehen jardunaldian, San Mamesen.
Athleticeko eta Bartzelonako jokalariak, Del Cerro Grande epailearekin eztabaidan, ligako lehen jardunaldian, San Mamesen. LUIS TEJIDO / EFE

Haritz Gallastegi -

2016ko urtarrilak 16

Asteazkenean Madrigalen garaipen baliotsua lortu ostean, gauza bakar batean etorri ziren bat zuri-gorriak: Espainiako Kopako final-laurdenetan ez zuten jokatu gura Bartzelonaren aurka. Iazko finala ez zuten errepikatu gura horren goiz. Baten eta bestearen bideak zenbat eta geroago elkartu, orduan eta hobe. Aukeran, topo ez egitea onena. Athleticeko jokalariek eta Kopan jarraitzen duten gainerako sei taldeetako ordezkariek gauza bera pentsatu zuten. Inork ez baitu gogoko onenaren kontra indarrak neurtzea. Bada, eskatzea nahikoa da zozketan kontrakoa gertatzeko: Athletic-Bartzelona. Berriz ere.

Etsipena sortzen du sasoi ahaztezina osatzen ari den talde horren kontra jokatu beharrak. Motibatuta daudenean, garaiezinak dirudite. Munduko jokalaririk onentsuenak batu, eta talde bat egitea lortu dute. Frank Rijkaardek hasi zuen bidea; Pep Guardiolak eraman zuen gorenera; eta Luis Enrique taldea berrasmatzen ari da orain. Hirurek dute eredu Johan Cruyff. Eta, era berean, hirurek izan dute Leo Messi eta haren inguruko jokalari apartak zuzentzeko aukera.

Bada, horrek guztiak etsipena eragiten du aurkariengan. Baina Athleticeko jarraitzaileek badute gainerako ia talde guztietan ikusten ez den dohain bat: hazi egiten dira horrelako partidetan. Ez dute ezinezkorik ikusten. Sekula. Horregatik, atzo ezinezkoa zena gaur gaitza dela pentsatuko dute. Bihar, Superkopan gertatutakoa gogoratuko dute; etzi, kanporaketa bidez erabakitzen diren lehietan talde oso sendoa dela pentsatuko dute; eta, horrela, kanporaketari aurre egiteko eguna ailegatzen denerako, guztiek izango dute argi miraria lor daitekeela; finalerdietara sartzeko aukera badagoela sinetsita joango dira San Mamesera. Bete egingo dute Katedrala, gustukoen duten txapelketan beste gau magiko bat igarotzeko irrikan.

Futbola ilusioa baita. Txikiak handia gainditzea ezinezkoa dela pentsatuz gero, ez luke mereziko pasioz bizitzea. Baina, era berean, hankak lurrean izan behar dira. Ezinezkorik ez dagoen arren, aurrera egiteko dena ondo egin beharko dute bizkaitarrek. «Aurkaririk gaitzena egokitu zaigu. Guztiok gura izaten dugu horrelako erronkei aurre egitea, baina geroago espero genuen», adierazi zuen atzo Ernesto Valverde Athleticeko entrenatzaileak. «Zaleak gogotsu etorriko dira zelaira. Bestalde, eurei ere ez zien grazia handirik egingo gure kontra lehiatu beharko dutela jakiteak».

Athleticek eta Bartzelonak hiru aldiz jokatu beharko dute elkarren aurka hurrengo hamar egunetan. Bihar ligako bigarren itzuliari hasiera emango diote Camp Noun, eta gero etorriko dira Kopako bi lehiak. Askorentzat gaindosia denak antzekotasun handiak ditu abuztuan gertatutakoarekin. Orduan, Espainiako Superkopa eta ligako estreinakoa jokatu zituzten. Eta ez da aurrekari txarra. Izan ere, Athleticek soilik irabazi dio Bartzelonari final bat.

«Lehentasuna da Kopa»

«Bartzelonaren aurka jokatzeak ahalegin handia eskatzen du. Hirutik bi partida ondo jokatu genituen, baina, behera egin genuen. Hala ere, ahalegindu egingo gara». Valverdek azpimarratu zuen «ilusio handia» daukatela erronkari aurre egiteko. «Klubarentzat lehentasuna da Kopa. Gaitza izan arren, ez gara konformatuko final-laurdenak jokatzearekin». Hurrengo asteazkenean jokatuko dute joanekoa, San Mamesen (21:00), eta Luis Suarezek ezin izango du parte hartu, zigortutako dagoelako. Astebete geroago jokatuko dute itzulikoa.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Albiste gehiago

Old Trafford estadioa. ©Laurence Griffiths / POOL / EFE
Mikel Merino, Asier Illarramendi eta Igor Zubeldia Realeko jokalariak, Manchester Unitedeko Marcus Rashfordi baloia kendu nahian, joanekoan. ©A. DI MARCO / EFE

Manchesterren kontra lehiari heltzeko gakoak xehatu ditu Uxue Otxoa psikologoak

Jon Ander De la Hoz

Joanekoan galdu ondoren, Reala suspertu beharrean dago gaur Manchesterren jokatzeko. Iluntzeko lehiari heltzeko gakoak xehatu ditu Uxue Otxoa psikologoak.

Aitor Elizegi Athleticeko presidentea eta Raul Garcia jokalaria, aurrelariaren kontratu berria sinatzeko ekitaldian. ©ATHLETIC

Erronkak, adinaren gainetik

Ainara Arratibel Gascon

Baieztatu da bolo-bolo zebilena: Raul Garciak beste urtebetez luzatu du kontratua Athleticekin. 35 urterekin, taldeari nortasuna eta eskarmentua ematen segitu nahi du, eta, nola ez, golak.

Chris Froome, eskuak altxatzen, Zoncolango helmugan, 2018ko Italiako Giroko 14. etapa irabazi berritan. ©DANIEL DAL ZENNARO / EFE

Azal berdina, mami ezberdina

Eñaut Agirrebengoa

Italiako Giroa maiatzaren 8tik 30era jokatuko da aurten, eta ez du espero zen bezain ibilbide gogorra edukiko, menditsua izan arren. Erlojuaren kontra 38 kilometro egingo dira soilik

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.