Albistea entzun

«Lema kolpea»: Mendoza badoa

Dimisioa aurkeztu dio Barkos presidenteari Nafarroako Gobernuko Hezkuntza kontseilari Jose Luis Mendozak, eta kargua utziko du. Maria Solana ariko da ordezko, gobernuko eleduna; gaur bertan hartuko du ardura berria
JAGOBA MANTEROLA / ARGAZKI PRESS Tamaina handiagoan ikusi

Arantxa Iraola -

2017ko apirilak 12

«Politikaren munduan, aldaketak zigor edo lema kolpe gisa ulertzen dituzte askok, eta ez da hori gure interpretazioa, inondik inora». Era horretan solastatu zen Nafarroako Gobernuko Hezkuntza kontseilari Jose Luis Mendoza (Carcar, Nafarroa, 1954) BERRIAn joan den urteko irailaren 18an eskaini zuen elkarrizketan, departamenduko bi zuzendari nagusiren kargu gabetzeaz argibideak emateko garaian. Atzo albiste izan zen «lema kolpeak» ekarri zuen, berriz, berak kargua uztea: Nafarroako Gobernuko presidente Uxue Barkosi dimisioa aurkeztu ziola jakin zen arratsaldean, hark onartu egin diola, eta gaur Nafarroako Gobernuko eledun Maria Solanak hartuko duela Hezkuntza kontseilari kargua. Hedabideak tituluz bete dituen agintaldi baten amaiera dakar albisteak. Mendozak zuzendutako departamendua albiste iturri izan da zenbaitetan sailean hartutako erabakien ondorioz gobernu barruan desadostasunak agerian geratu direlako —hezkuntzarako antolatutako lan eskaintza publikoaren harira, esaterako, laukoan hizkuntza gaietan dauden pitzadurak gordin biluztu ziren—, beste askotan oposizioak hezkuntza gaietan ere hortzak zorrotz eta aseezin erakutsi dituelako, eta hainbatetan sektore barruan ongi ulertu ez diren erabakiak hartu direlako. Mendozak ez du zehaztu, hala ere, zein izan den orain lema uztera eraman duen zioa.

Atzo politikariek egin zituzten adierazpenek agerian utzi zuten Mendozaren agintaldi malkartsua. Lauko gobernuko taldeek ere hizpide izan zuten haren jardun gorabeheratsua. Horra Ezkerrako Maria de Simon: «Hainbat polemika eta interpretazio oker eragin ditu». Edo EH Bilduko ordezkari Miren Aranoa: «Erabaki asko hartu behar izan ditu: zenbaitetan zuzen, eta beste hainbatetan, ez». PPNn eta UPNn, agerikoa poza. Horra PPNko Ana Beltran eleduna: «Oso albiste ona da hezkuntzarentzat». Eta UPNko Javier Esparza: «Berandu dator, hezkuntza egoera kaotiko batera eramanda». Ekarri dituen «aldaketak» nabarmendu zituen Geroa Baik, eta agintaldi osoan «kritika» latzen aurrean jardun behar izan duela gogorarazi zuen.

Zalantzarik gabe, Mendozaren jardun polemikoenen artean hezkuntzarako deitutako lan eskaintza publikoa dago; aurrena harrabotsa ozendu zen hizkuntz eskakizunengatik: 320 lanpostu eskaini zituzten, 228 euskaraz eta 92 gaztelaniaz. Euskaltzaletasunetik urrunen daudenen kritikak entzun ziren orduan. Gero jakin zen Madrilen helegite baten harira, kolokan zegoela lan eskaintza hori, eta, azkenean, onartu zen euskarazko 120 lanpostu kenduta. Sektore euskaltzaleenak aztoratu ziren orduan. Alde guztietatik jaso ditu kritikak Mendozak.

D eredua zabaltzen

D eredua eremu ez-euskaldunean dauden eskola publikoetara eramatea ere egokitu zaio; erronka handia izan da eredua eskaintzen duten ikastetxeak ugaritzen joatea, eta horretarako komunikazio kanpaina egokiak egin diren auzitan jarri da hainbatetan. PAI ereduaren ebaluazioa egiteko asmoa ere hasieratik adierazi zuen. Eta aski kritiko azaldu zuen iritzia: «PAI ezarri zen aurreikuspenik eta planifikaziorik gabe». Izan dira gehiago; 2015ko urrian, esate baterako, departamenduak atzera egin zuen hizkuntza eskolen buruzagitzarako egindako izendapenean: Imanol Haranburu euskara irakaslea hautatu zuen kargurako, baina ETAko kide ohia zela-eta UPNren inguruko sektoreetan sorturiko kritiken harira, atzera egin zuen. «Ahulezia hori erakutsi duen gobernuarentzat ez dut lan egin nahi», salatu zuen Haranburuk.

Batetik, arbuioa; bestetik, kritikak. Testuliburuetatik Euskal Herria kentzeko araua baliogabetu zenean, esaterako, UPN oldartu zitzaion; unibertsitateko beken deialdia aldatu zenean—sistema publikoa lehenesteko—atzera bota behar izan zuen gero baldintzetako bat, kritiken ondorioz. Polemiketako baten zurrunbiloan halaxe mintzatu zen: «Departamenduan gaude berriak ateratzeko, ez berria izateko». Usu berri izanda doa, ordea, etxera.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Elhadji Ndiaye omentzeko ekitaldia, Iruñeko Arrotxapea auzoan, iaz. ©JESUS DIGES / EFE

ESPALOIAN ITOTAKO BIZITZA

Ion Orzaiz

Duela bost urte, 2016ko urriaren 25ean, Elhadji Ndiaye senegaldarra zendu zen, Espainiako Poliziaren zaintzapean, Iruñean. Atxiloketa bortitz baten ostean konfirmatu zuten hila zela. Poliziaren jokabide arrazisten ondorio dela uste dute Ndiayeren lagunek eta gobernuz kanpoko erakundeek.
Egonkorrak bilakatu dira Ipar eta Hego Euskal Herriaren artean Frantziako indar armatuek egiten dituzten kontrolak. ©BOB EDME

Sistemaren belauna lepoan

Oihana Teyseyre Koskarat - Jone Arruabarrena - Ion Orzaiz -Javi West Larrañaga

Migratzaileen aurkako jazarpena fenomeno orokortua da Euskal Herrian. Adituek eta gobernuz kanpoko erakundeek salatu dute Poliziak «sistematikoki» erabiltzen duela bortxa pertsona arrazializatuen aurka.
 ©BERRIA

«Polizia, nahitaez, giltzarri da gizarte arrazista iraunarazteko»

Maite Asensio Lozano

Segurtasunaren zein mehatxuen inguruan zabaltzen diren ideiak «eraikuntza politikotzat» dauzka Douhaibik; horrekin lotu ditu kolektibo arrazializatuen aurkako kriminalizazioa eta jazarpen poliziala.
 ©BERRIA

«Behartu nahi gaituzte Poliziaren aurrean behera begiratzera»

Ion Orzaiz

Modou Faye, 'Beltxa'. Senegal atzean utzita, Iruñera iritsi zen duela urte asko. Paperak ditu orain, Africa United elkarteko burua da, baina horrek ez du Poliziaren jazarpenetik libratu.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.