Albistea entzun

ATZEKOZ AURRERA. Nekane Juanes. Blogaria

«Kontzientzia soziala dutenek errazago egiten dute bat gurekin»

Errezeta errazak proposatzen ditu Nekane Juanesek 'Beganerrezetak' blogean, betiere osagai begetalak erabiliz. Beganismoaren inguruko kontzientzia ere bultzatu nahi du horrela.
GORKA RUBIO / ARGAZKI PRESS

Julen Aperribai -

2016ko abenduak 27

Errezeta praktikoak bisitariei eskaini eta, aldi berean, begano izateak berekin dakarrena ezagutarazteko, Beganerrezetak bloga jarri du martxan Nekane Juanesek (Oiartzun, Gipuzkoa, 1987). Beganoa da bera, eta Askekintza elkarteko kidea.

Jendea elikadura beganoan murgiltzea da zure asmoa, blogaren aurkezpenean diozunez. Nola?

Blogak bi helburu ditu. Alde batetik, elikadura beganoari nire ekarpena egin eta errezetak jendearen eskura jartzea. Bestetik, kontzientziazio lana egin eta gure borrokaren berri emateko ere balioko du. Beganismora ahalik eta jende gehien erakartzeko ere lagundu behar luke.

Jada begano direnak ez ezik, mugimendu horretara hurbildu daitezkeenak ere jomugan dituzu?

Bai, beste borroka batzuetan aktibo daudenak, batez ere. Kontzientzia soziala dutenek errazago egiten dute bat gurekin eta gure borrokarekin, bestela ere mobilizatzen ez direnek baino. Bestalde, begetarianoak begano izatera ere bultzatu nahi ditugu.

Zergatik erabaki duzu hori blog bidez egitea?

Orain dela urte eta erdi inguru Instagram kontu bat zabaldu nuen, eta han hasi nintzen etxean egiten nituen errezetak zabaltzen. Ez da batere erosoa, ordea. Gainera, banuen gogoa nire bizipenak kontatzeko, eta ikusten nuen Instagram ez zela leku egokiena horretarako. Azken finean, bloga aukera ona da errezetak erraz aurkitzeko, eta baita nire bizipenak kontatzeko ere.

Beste blog edo webguneren bat hartu duzu eredutzat?

Ni mugimenduan parte hartzen hastearekin batera hasi nintzen informatzen ere, era guztietako blog eta bideoetan begira. Hasieran, nahikoa galduta nengoen, inguruan beganoak ez badira ez baita erraza nondik jo jakitea. Pixkanaka, nire burua kokatu, eta saltseatzen hasi nintzen zenbait errezetarekin. Zaila zait erreferentzia garbi bat esatea, baina dokumentazio lana egin nuen.

Zer-nolako harrera izan du orain artean?

Ona, egia esan. Instagramen ia 1.000 jarraitzaile ditut, eta Askekintzako Facebook orrian ere jarri dute; laguntzen dute halakoek. Oro har, interesa sortu du jendearen artean.

Elikadura beganoa izatea garesti ateratzen dela esan izan da. Hala al da?

Topiko bat da. Tofuzko hanburgesa batek hiru euro eta erdi balio duela ikustean pentsatzen dute hori. Haragijaleek, normalean, produktu gehienak ez dituzte eginda erosten: etxean egiten dituzte. Bada, beganoekin ere berdin gertatzen da. Animaliatik datozen produktuak baztertzen ditugu, eta gelditzen zaizkigun produktuak —fruta, barazkiak, haziak, lekaleak eta zerealak— merkeak dira. Denda berezi batean jada egindako produktu bat erosiz gero, orduan igotzen da prezioa; baina, bestela, ez da garestia.

Elikadura begetala eta beganoa plater sofistikatuekin ere lotu izan da. Nolakoak dira zuk proposatzen dituzunak?

Blogetan eta bideoetan begira hasi nintzenean, nik etxean ez nituen osagaiak erabiltzen zituztela konturatu nintzen. Horregatik, saiatzen naiz etxean edonork dituen osagaiak erabiltzen.

Beganismoa mugimendu politiko bat da zuretzat?

Jende askok uste du elikadura kontu batengatik egiten garela begano, baina ez da horrela. Pertsonala politikoa denez, egunerokoan egiten dituzun gauzek eragina dute. Animalienganako esplotazioan parte hartzen da horiek jatean, eta beganismoak esplotazio hori baztertzen du. Gizakia ez dena diskriminatu egiten da, eta beste edozein diskriminaziorekin parekatzen dugu guk. Besteak bezain salagarria da.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

 ©OSKAR MATXIN EDESA / FOKU

«Kritika egingo dugu, tokikotik globalera»

Urtzi Urkizu

Bilboko Seriesland jaialdian 'Zikings' animaziozko websailaren lehen atala proiektatu dute. Abenduan sarean izango dira ikusgai aurreneko bost atalak. Proiektua «monetizatu» egin nahiko lukete.
 ©ARITZ LOIOLA / @FOKU

«Musikan dena dut egiteko»

Gorka Erostarbe Leunda

Pandemiak apenas utzi dion 'Rueda' azken lana behar bezala aurkezten; Bilboko Euskeria abesbatzaz lagunduta kontzertua emango du etzi, Donostiako Viktoria Eugenia antzokian.
Haurrak lurperatzen zituzten eremuaren indusketa, Begoñako hilerrian. ©ARITZ LOIOLA / FOKU

Autopsia hilerri bati

Jakes Goikoetxea

Begoñako hilerria kendu eta parke bat egingo dute Bilbon. Aurretik, ordea, bertako hezurrak ateratzen, aztertzen eta sailkatzen ari da Aranzadi zientzia elkartea. Hilerriko gainerako elementuak ere aztertzen ari da. 'Begoñako Argia' izena du proiektuak.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Julen Aperribai

Informazio osagarria

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.