Albistea entzun

ATZEKOZ AURRERA. Ana Garcia. Matematikaria

«Ikasleek gorroto dute ariketa bera behin eta berriro errepikatzea»

Jokoak eta denbora-pasak matematika irakasteko moduan txertatzearen aldekoa da Ana Garcia matematikaria. Metodologia horrekin bat datorren material didaktikoa sortzen eta zabaltzen du.
BERRIA Tamaina handiagoan ikusi

Julen Aperribai -

2017ko urtarrilak 31

Matematikak pisutsuak izan daitezke hainbatentzat, modu tradizionalean irakatsita. Motibazioak interesa eta interesak ulertzea dakarrela sinetsita, matematika irakasteko beste metodologia baten aldekoa da Ana Garcia (Paris, 1948). Irakasle erretiratua da egun, baina irakaskuntzari begira jarraitzen du. Hainbat liburu ditu argitaratuak, eta Juegos y matemáticas bloga elikatzen du. Urtarrilean Beasainen (Gipuzkoa) izan da, Urtarrila, matematikaren bila jardunaldiaren barruan.

Zerk eraman zintuen matematikaren irakaskuntza beste modu batera ulertzera?

Lehen eskolak ematerakoan konturatu nintzen irakaskuntza tradizionalak, guk jaso genuen moduan, ez zuela funtzionatzen gure ikasleekin. Matematikaren irakaskuntza aldatzeko asmotan zebilen Madrilgo Azarquiel didaktika taldearekin bat egin nuen. Kasualitatez, atzerriko hainbat material ludiko eskuratzeko aukera izan nuen, eta ondorioztatu nuen hori dela gure ikasleak motibatzeko modu bat. Motibazioak interesa dakar, eta interesak, gehiago ulertzea.

Hezkuntza formalaren osagarri ala ezaugarri izan behar lukete jokoek eta denbora-pasek?

Hezkuntza formalaren parte izan behar dutela uste dut. Hainbat irakaslek pentsatzen dute oporren aurreko egunetan eta halako egun berezietan egin behar direla jokoak, baina ez da hori nire ustea. Ohiko klasea emateko moduan barneratu behar dira. Adibidez, eskola ordua amaitu aurreko azken hamabost minutuetan, bingo bat egin daiteke zatikiak gehitzeko. Ikasleak animatu egingo dira, irabazteko gogoz eta. Azken batean, beste modu batera eman zenezake irakasgai bera, baina puntu ludiko batekin.

Haurrei bideratuago egon da irakaskuntza mota hori. Ba al da adin mugarik?

Haur txikiekin lotu izan da, batez ere. Bigarren hezkuntza da egokiena halako metodologiak aplikatzeko, baina, kasuren batean, batxilergoko ikasleekin ere erabil daiteke.

Matematika hobeto ulertzen laguntzen al dute jokoek?

Hainbat eratako jokoak daude: klasean azaldutako edukiak indartzeko balio dute batzuek; beste batzuek, ikasleei zalantza batzuk eragiteko, kontzeptu matematiko batzuk uler ditzaten. Matematikako eduki asko dago modu batera edo bestera barneratu beharrekoa. Ariketak behin eta berriro errepikatzeak botatzen ditu atzera ikasleak; ariketa taula tradizionalek, alegia.

Irakasle lanetan zebiltzanean, metodologia mota hau erabiltzen zenuen zure egunerokoan?

Noski, nire ikasle ohiek eta nire lankide izandakoek ondo dakite hori. Jokoen zale sutsua naiz; eskolara etorritako ikuskatzaileek ere badakite hori. Zorte handia izan dut, lortu baitut ia beti ikusaraztea gauzak lortu daitezkeela modu horretan.

Urtarrila matematikaren bila jardunaldian izan zinen. Zer azaldu zenien han elkartutakoei?

Ni gonbidatzeko detailea izan zuten, eta oso polita izan zen. Batzuk haurrekin joan ziren, eta haur horiek erakutsi zieten gainontzekoei metodologia mota honek funtzionatzen duela. Asmakizunak asmatzen eta jokoa irabazten gogo handia jarri zuten, eta esan dezaket gurasoak konbentzitu zituztela.

Gurasoek ondo hartzen al dute irakaskuntza hori umeei aplikatzea?

Zaila da. Didaktikako irakaslea izan naiz urte askoz, eta nire ikasleei azaltzen nien aurre egin behar diotela gizarteak egun duen iritziari. Gizartea aldatzen ari den arren, oraindik kosta egiten zaio horrelako gauzak ulertzea eta onartzea. Nire lankideekin eztabaidatu behar izan dut, eta gurasoekin ere bai. Dena den, guraso batek bere haurraren koadernoan jolas bat ikusten badu, baina hori ebazteko hainbat ekuazio ebatzi behar izan badituzte aurretik, guraso horiek konbentzitu daitezke. Azkenean, materiala bera izan da konbentzitzeko tresnarik onena.

Joko eta denbora-pasez osaturiko lau liburu ere badituzu argitaratuak. Erabilera akademikorik eman zaie?

Hori espero dut. Irakasleentzat eginak daude; eskolak zuzentzeko metodologia azaltzen dut bertan. Lehen liburuak bosgarren argitalpena du; ez dira edizio handiak, baina saltzen dira.

Beste ikasgaietan ere erabili beharko lirateke jokoak?

Hizkuntzak irakasteko oso erabilgarriak izan daitezke. Gaztelera irakasteko, adibidez, topatu ditut sarean antzeko moduak erabiltzen dituzten hainbat adibide. Uste dut atzerriko hizkuntzen irakasleek guk baino denbora gehiago daramatela horrelakoak erabiltzen.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

 ©OSKAR MATXIN EDESA / FOKU

«Kritika egingo dugu, tokikotik globalera»

Urtzi Urkizu

Bilboko Seriesland jaialdian 'Zikings' animaziozko websailaren lehen atala proiektatu dute. Abenduan sarean izango dira ikusgai aurreneko bost atalak. Proiektua «monetizatu» egin nahiko lukete.
 ©ARITZ LOIOLA / @FOKU

«Musikan dena dut egiteko»

Gorka Erostarbe Leunda

Pandemiak apenas utzi dion 'Rueda' azken lana behar bezala aurkezten; Bilboko Euskeria abesbatzaz lagunduta kontzertua emango du etzi, Donostiako Viktoria Eugenia antzokian.
Haurrak lurperatzen zituzten eremuaren indusketa, Begoñako hilerrian. ©ARITZ LOIOLA / FOKU

Autopsia hilerri bati

Jakes Goikoetxea

Begoñako hilerria kendu eta parke bat egingo dute Bilbon. Aurretik, ordea, bertako hezurrak ateratzen, aztertzen eta sailkatzen ari da Aranzadi zientzia elkartea. Hilerriko gainerako elementuak ere aztertzen ari da. 'Begoñako Argia' izena du proiektuak.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Julen Aperribai

Informazio osagarria