Albistea entzun

19. Korrika

Lorea lore truk, lanaren esker onez

Lekeitiotik pasatzean, Korrikako furgonetan jagole aritzen den taldeko kideek omenaldia egin diote Edurne Brouard Korrikako arduradun izandakoari. Loreen bidez adierazi diote esker ona.
Edurne Brouard, Korrikako jagole taldeko kide baten lorea jasotzen.
Edurne Brouard, Korrikako jagole taldeko kide baten lorea jasotzen. A. ARROITA

Gotzon Hermosilla -

2015eko martxoak 25 - Lekeitio

Lotara joan ahal izatea, beldurrik izan gabe goizaldeko ordu txikietan telefonoak joko ote duen. Besteak beste, aldaketa hori ekarri dio 19. Korrikak Edurne Brouardi. Korrikaren arduradun nagusia izan da sei lasterketatan, 13. Korrikatik 18.enera, 2003tik 2013ra. Orain, ardura hori lagata, askoz lasaiago dagoela dio. Beste modu batez bizi du Korrikaren zurrunbilo eroa. Eta aspalditik egiten ez zituen zenbait kontu egiteko aukera ematen dio egoera berriak: esate baterako, bere herrian, Lekeition (Bizkaia), euskararen aldeko lasterketan parte hartu ahal izatea.

3. Korrika Bilbon amaitu zen, 1983an. Garai hartan, Edurne Brouard zen Bilboko AEKren arduraduna, eta, hortaz, buru-belarri aritu behar izan zuen azken festa antolatzen. Geroztik, 2013ra arte, beti egon da euskararen aldeko lasterketari lotua: lehen lerroan nazio ardura egokitu zaionean, bigarrenean bestela. Baina lehen mailako ardurarik izan ez duenetan ere, AEKn beti jakin dute Korrikarekin zerikusia duen zalantzaren bat izatekotan Brouardi iritzia galdetzea dela onena, gutxik ezagutzen baitituzte hark bezain ongi ekitaldi erraldoiaren barrunbeak.

Aspalditik, Korrikaren hasieraren bezperetan, lankide ohi batek lore sorta bat bidali ohi dio Edurne Brouardi. Normalean, loreak Korrikaren hasiera ekitaldira eramaten ditu Brouardek, haiekin sorta bi egin, eta ematen dizkie lasterketa osoan Korrika jagoten egoten diren bi taldeei, furgonetetan paratzeko. Han egoten dira Korrika amaitu arte. Aurten, taldeetako batek erabaki du Brouardi omenaldi txiki bat egitea Lekeitiotik pasatzean, eta loreen bidez adieraztea esker ona Korrikako arduradun izandakoari, 30 urteotako lanagatik.

Jendetzaren erdian bila

Astelehen buruzuria eta gauerdia izanagatik ere, jende andana bildu da Lekeitioko kaleetan Korrikari ongietorri egiteko. Horien artean zegoen Brouard, Klara Astondoa Korrikako bigarren arduradunarekin eta AEK-ko beste zenbait kiderekin batera.

Suziek lagunduta sartu da Korrika Lekeitiora, 01:07an, eta atoan egin dute harekin bat espaloietan zain zeuden dozenaka lagunek. Furgonetatik, ezker-eskuin begiratu dute Korrika taldekoek, urduri, jendetzaren erdian Brouard topatu nahian. Eta, azkenean, ikusi egin dute.

Furgonetako bozgorailuetatik bertso baten doinua entzun da: «Arduraduna zintugun Korrikan azken alditan, irakasle hasi zinen pentsatu gabe birritan». Orduantxe jakin du Brouardek taldekoek omenaldia prestatua ziotela. Eta emozioak gainezka egin dio.

Banan-banan, furgonetatik jaitsi dira taldekideak, lore bana eskuan. «Haziak erneaz doaz AEKn baratz berritan, loreak zabaltzen gabiltz euskal herri eta hiritan; zuk emandako pausotan jarraitzen dugu Korrikan». Besarkadak, musuak, negarra. Zirrara.

Korrika pasatutakoan, jende asko hurbildu da Brouardengana, zorionak ematera. Eta Brouardek jasotako loreak banatu dizkie, ohi bezain eskuzabal.

Sareko BERRIAzalea:

Udazkenean, BERRIAlagun egiteko pausoa eman dezazun, eskaintza bat egin nahi dizu BERRIAk. Herri baten kulturaren plaza da BERRIA. Kultur egitasmo, dinamika eta ekitaldi anitzen erakustoki. Euskal kulturaren inguruko informazioaren plaza handia. Azaroan eta abenduan, Euskaraldiak, Bertsolari Txapelketa Nagusiak eta Durangoko azokak hartuko dituzte, besteak beste, BERRIAren orrietako asko, paperean eta webgunean.

Albiste asko irakurriko dituzu, segur aski webgune honetan bertan. Eta eskari bat egin nahi dizugu: har ezazu konpromisoa irakurtzen duzunarekin. Irakurleen babes ekonomikoa funtsezkoa da BERRIAren etorkizuna ziurtatzeko.

Albiste gehiago

«Euskarak izan behar du hezkuntza sistemako hizkuntza normalizatua»

«Euskarak izan behar du hezkuntza sistemako hizkuntza normalizatua»

Imanol Magro Eizmendi - Arantxa Iraola

Euskalgintzako eta kulturgintzako pertsona ezagunak batu ditu Euskalgintzaren Kontseiluak eta aldarrikatu dute euskara eta euskal kultura ardatz izan behar dituela Araba, Bizkai eta Gipuzkoarako ontzen ari diren Hezkuntza Legeak

Eusk Jaurlaritzak, foru aldundiek eta Bilbo, Donostia eta Gasteizko Udalek Euskararen Eguna ospatu dute Gasteizen ©Irekia

Euskararen alde adostasunak josteko aldarria, aho batez

Edurne Begiristain

Euskararen Nazioarteko Eguna da gaur, eta hura ospatzeko ekitaldi eta adierazpen ugari egin dituzte instituzioek, alderdiek eta eragileek. Eusko Jaurlaritzak, foru aldundiek eta Bilbo, Donostia eta Gasteizko alkateek duela 40 urte Euskararen Legeak lortutako adostasuna goratu dute. EH Bilduk esan du euskararen alde «adostasun berriak» eraikitzeko unea dela.

Euskal Hedabideen emankizuna, goizean, Baionan. ©Kanaldude

Euskalgintzaren prekaritateari aurre egitea «zaila» izanen da energiaren kariotze garaian, Kurutxarriren ustez

Oihana Teyseyre Koskarat

Ipar Euskal Herriko Euskal Hedabideek emankizun berezia egin dute goizean, Baionan. Euskaraldiaren biharamunean, bilana egin dute, eta euskalgintzaren prekaritatea ere izan dute aipagai.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...