Bermeora bidean da bandera

Osagai asko izaten ditu estropada batek. Batzuk arraunlarien eta entrenatzaileen kontrolpean egoten dira; beste zenbait, ez: eguraldia eta itsasoaren egoera, kasurako. Kontxako Banderaren bigarren eguneko estropadan ere (12:00) hainbat osagai daude lapikoan sartuta, eta, oker handirik ezean, estropada ondorengo jakiak Urdaibaiko zaporea izango du. Osagai guztiak edo ia guztiak alde dauzkalako.

Hasteko, joan zen igandean lortutako errenta. Sekulako erakustaldia eman zuen Jon Salsamendiren taldeak, eta alde handiak dauzka jada. Kaiku hamar segundo eta 54 ehunenera dauka; Hondarribiari 11,54 segundo ateratzen dizkio; eta Oriori, 19,74 segundo. Hiru horiek izango ditu alboan ohorezko txandan.

Eguraldiaren eta itsasoaren osagaia ere aldeko du Urdaibaik. Ona baino hobea dago emanda: haizerik apenas, eta dagoena hego puntukoa; olatuak ere, hutsaren hurrengo. Kezkatzeko batere motiborik ez die ematen eguraldiak eta itsasoak Urdaibairi, eta asko esan nahi du horrek. Kezka handi bat gutxiago. Dauzkan aldeak edukita, kontrarioek itsaso txarra nahiko zuten Urdaibai menderatzeko aukera izateko, baina gaur ez zaie halakorik egokituko.

Urdaibairen beraren sasoi puntua da oso alde duen beste osagaietako bat. Nahiz eta uda osoan jo eta su ibili beharra izan San Miguel ligan jaitsierako kanporaketari ihes egiteko, Salsamendiren arraunlariak sasoi betean heldu dira Donostiako estropadetara. Izango dute horretan eraginik entrenatzaileak estropada batetik bestera egin izan dituen aldaketek. Eta, jakina, osagairik sendoena, indartsuena eta konfiantza gehien ematen duena falta da: Urdaibaik duen talde puska. Hain zuzen, talde ona izatea nabarmendu da estropadatik estropadara aldaketak egin eta emaitza onak lortze horretan. Sekulakoa da arraunlari multzoa, handik eta hemendik hartutakoak, bana-banakoak kasi.

Urdaibaik alde duen beste osagaia iragana da. Iaz gertatua gaurko leku berean. Uretan bandera irabazi, eta uretatik kanpo epaileek kendu. Ezinbestean eragin behar du horrek min handia, eta antzeman zaie estropada bakoitzean, irabazteko gose eta grina izugarria erakutsi dutelako Gorka Aranberri patroi handiaren agindupean. «Bandera, bandera!», zenbat bider ez ote zaio entzun patroiari, arraunlarien akuilu bezala.

Osagaien zerrendarekin amaitzeko, beste bat ere oso kontuan hartzekoa izango da, eta hori ere, nola ez, Urdaibairen aldekoa da: denboraldiko azkeneko estropada du taldeak; gaur bertan amaituko zaie lehiaketa. Hurrengo asteburuan ez dira ariko San Miguel ligako azken bi jardunaldietan, lehen zortzietan ez direlako sailkatu. Jarri arraunlarien buruan, eta hasi pentsatzen zer sentitu behar duten gaur, jakinik azkena dela. Indarrak erabat husteko aukera dute, motibazioa eta bizipoza uztartuz.

Osagai horiek guztiak aipatu eta gero, ez da duda askorik: gaur ere besteen aurretik ibiltzeko hautagai sendoa da Urdaibai. Ikusi egin beharko da estropadaren bilakaera zein den, baina aurrea hartzen badu hasieratik edo uneren batean, ez du ematen besteei aukera laurdenik ere emango dienik. Bermeon dira banderaren hiru laurdenak, eta falta zaion beste laurdena azkar eramatera aterako da gaur talde bikain hori.

Aurkarien arteko lehiak

Batek daki zer izango den Urdaibairen aurkarien buruan, baina zaila dutela barneratuta egongo dira. Hori hala izanik ere, dena eman beharrean dira, eta emango dute. Gainera, lehen lekuaz gain, badira beste lehia batzuk ere. Esaterako, Kaikuren eta Hondarribiaren artean 96 ehunen bakarrik daude. Orio ez dute urruti, eta nahiko dute oriotarrek zerbait erakutsi. Txanda bera irabaztea ere polita litzateke hiru horientzat.

Aurreneko txandan ere badute zer jokatu. Portugalete, San Juan eta Cabo da Cruz zortzi segundoan daude, eta horientzat lorpen polita litzateke bosgarren geratzea. Eta Portugaletek ez du urruti Orio, laugarren sailkatua, zortzi segundo eskasera. Lehia handia edo lehia txikiak, polita dator Kontxako bigarren eguna, beti bezala.