Albistea entzun

«Maitagarria izan da»

Pablo Berasaluzek, agurreko partida jokatu, eta irabazi egin du Bilboko Bizkaia pilotalekuan. Zaletuz bete dira harmailak. Bukaeran omenaldia egin diote.
Pablo Berasaluze Bizkaia pilotalekuan bildutako zaleei eskerrak ematen. Partidaren ondoren omenaldi beroa jaso zuen.
Pablo Berasaluze Bizkaia pilotalekuan bildutako zaleei eskerrak ematen. Partidaren ondoren omenaldi beroa jaso zuen. MONIKA DEL VALLE / ARGAZKI PRESS Tamaina handiagoan ikusi

Ibai Maruri Bilbao -

2016ko urriak 2 - Bilbo

Bizkaia pilotalekua oso gutxigatik ez zen lepo bete, eta, jokoan txapelik ez egon arren, ezohiko giroa nabaritu zen atzo arratsaldean. «Jaun-andreok, arratsalde on. Iurretako Olaburu pilota eskolako gaztetxoek ohorezko bidea irekiko diote pilotari omenduari eta gainontzeko pilotariei», aurkeztu zuten bozgorailuetatik. Azkena sartu zen omendua, eta frontoi osoa zutik ipini zen, txaloka, «Pablo, Pablo, Pablo», oihuka. Ibilbide oso bat saritzea zen jaialdiaren helburua. Pablo Berasaluzek agurreko partida zen. «Eskerrik asko frontoietan utzi duzun artearengatik», irakur zitekeen, gaztelaniaz, pankarta batean. Eta ikusleetako askok «Pablo, eskerrik asko» idatzia zuten elastiko berdez bete zituzten Miribillako harmailak.

Eta pilotariak ere eskertu zuen zaleen berotasuna. Partida osteko ekitaldian, mikrofonoa hartu zuen berriztarrak: «Maitagarria izan da. Nire ibilbidean beti bultzatu nauzue. Eskerrik asko hemen zaudeten guztioi eta etxeetan zaudetenoi».

Pozik zegoen eginiko partidarekin, bildutako zale mordoagatik... Aitortu zuen aita izan zuela gogoan, bere ibilbidean garrantzitsuena izan den pertsona. Eta hunkitu zen. Hunkitu, halaber, Ibai Zabala Asegarceko pilotari eta herrikideak banangoa dantzatu eta besarkada eman zionean. Hunkitu, hiru ilobek lore sortak eskaini zizkiotenean, edota Karmelo Ariznabarreta Bizkaiko pilota federazioko presidenteak oroigarri bat ematean. Ekitaldi laburra baina sentitua izan zen agurrekoa.

Beste bizkaitar bat izan zuen bikotekide azken partidan: Mikel Urrutikoetxea zaratamoztarra. Bizkaiko pilota «sasoiko» dagoen seinale da hori, Jose Rodriguez basauriarrarentzat. Telebistako pilota emanaldi bakar bat ere ez du galtzen, baina ez da egundo egon Bizkaia pilotalekuan. Atzo izan zuen estreinako aldia. Alabarekin joan zen, alabak oparitutako sarrerekin. «Urrutikoetxea ezagutzen dugu, eta haren jarraitzaile itzelak gara. Berasaluzeren agur partida ere bada. Eta biek elkarrekin jokatuko dute. Lehen aldiz etortzeko aitzakia hoberik ez genuen aurkitu». Pilotazalea ere hunkitu zen hitz egitean.

«Ikustekoa». Berba horrekin definitu zuen Santos Urkidik Berasaluzeren ibilbidea. Elkarrekin pilotan jokatutakoak dira, eta lagun mina du omendua. Horregatik, harentzat ere arratsalde hunkigarria izan zen. Adiskidea sekula txapelik jantzi barik ikusi izanak ez du bereziki penatu Urkidi: «Egin duen ibilbide osoa izan da txapel bat baino handiagoa». Iruditzen zaio, jokatu dituen partida guztiak, «saria» izan direla Berasaluzerentzat eta zaleentzat. «Frontoian sekulako ikuskizuna eskaintzen du. Berak gozatu egiten du, eta ikustera goazenoi ere gozarazi egiten digu». Hala ere, zerbait nabarmentzekotan, Berasaluzek txokoan utzitako dejada aukeratu du: «polita dauka».

Neurri batean, Jokin Armendariz durangarra ados dago Urkidik esandakoarekin, baina ez luke mugatuko Berasaluzeren trebetasuna: «Joko miragarria dauka. Mugitzeko modu berezia dauka, beste inork ez daukan modukoa». Horregatik du gustuko berak. «Begira nola lortu duen frontoi osoa zoratzea», esan zuen Berasaluzek eta Urrutikoetxeak 16. eta 17. tantoak segidan lortu zituztenean. Miribillan egundoko astrapala sortu zen.

Azken tantoa, txokoan

Partida hasieran epel antzean egon zen frontoia, baina azken tantoetan gogoz berotu zen giroa. Azken biak zutik ikusi zituzten harmailetan zeudenek. «Horrelako emozioa sortzeko gaitasuna pilotari gutxik dute, eta horietako bat da Pablo». Javier Martinek gogoangarria izan dela uste du. 22 eta 18 gailendu zitzaizkien Berasaluze II.a eta Urrutikoetxea Olaizola II.ari eta Larunberi. Berasaluzek 17 tanto egin zituen, eta azkenekoa etxeko berezitasuna izan zen, txokoan goxo utzitako dejada.

Mila partidatik gora jokatu ditu Berasaluzek 1998ko otsailean Bergaran debuta egin zuenetik. Gaurtik aurrera ere pilotari lotuta jarraituko du, Asegarcen teknikari hasiko baita. Pilotari gazteei zer erakutsia badauka.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Realeko jokalariak Take Kuboren gola ospatzen, gaur, Cadizen (Espainia). ©Roman Rios / EFE

Realak Kuboren gol bati esker irabazi du Cadizen

Paulo Ostolaza

Txuri-urdinek gogor lan egin behar izan dute, baina japoniarrak 24. minutuan sartutako golak balio izan die. Debuta egin dute Brais Mendezek eta Momo Chok ere.

Orioko arraunlariak garaipena ospatzen, atzo, Ondarroan (Bizkaia). ©Aritz Loiola / Foku

Oriok hirugarren aldiz irabazi du Euskotren Liga

Berria

Hamalau ehuneneko eskasegatik irabazi du gaur Castro Urdialesen, eta denboraldiko hamargarren bandera astindu du. 

 ©ARITZ LOIOLA / FOKU

«Denboraldi hau niretzat azkena balitz bezala gozatuko dut»

Pettan Uralde

Hamalaugarren denboraldia du De Marcosek Athleticen, eta egunez egun gozatzeko ideiarekin ekin dio sasoi berriari. Guardiako jokalariak Europan kokatu du taldearen helburua, eta lortuko dutelakoan dago.
Hondarribia garaipen bat ospatzen, artxiboko irudi batean. ©Oskar Matxin Edesa / Foku

Hondarribiak irabazi du Castro Urdialesen, eta sailkapena estutu du

Berria

Pasa den asteburuko kolpeari buelta eman dio Ama Guadalupekoa-k. Urdaibaik bigarren amaitu du, eta ondo eutsi dio lidergoari.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...