Albistea entzun

A-9ko prozesuagatik lau delitu egotzi dizkio Estatuko Fiskaltzak Artur Masi

Kataluniako presidenteaz gain, Joana Ortega presidenteordea eta Irene Rigau Hezkuntza kontseilaria ere salatu ditu.

«Desobedientzia larria» leporatu die.

Estatuarekiko arrakala handitu egin du kereilak
Artur Mas, Joana Ortega eta Irene Rigau, Kataluniako Parlamentuan.
Artur Mas, Joana Ortega eta Irene Rigau, Kataluniako Parlamentuan. TONI ALBIR / EFE

Xabin Makazaga -

2014ko azaroak 22

Kataluniaren burujabetza aldarrikatzen duten indarren eta Espainiako Estatuaren arteko arrakala erabat zartatzeko zorian jarri du Eduardo Torres-Dulce Estatuko fiskal nagusiak A-9ko prozesu parte-hartzaileagatik atzo aurkeztu zuen kereilak. Desobedientzia larria, prebarikazioa, diru publikoen bidegabeko erabilera eta eginkizunen usurpatzea egotzi dizkie Estatuko Fiskaltzak Artur Mas Kataluniako presidenteari, Joana Ortega presidenteordeari eta Irene Rigau Hezkuntza kontseilariari, Auzitegi Konstituzionalaren debekua aintzat hartu ez eta azaroaren 9ko bozketa antolatzeagatik. Torres-Dulcek behartu du kereila aurkeztea Kataluniako Justizia Auzitegi Nagusian, erakunde horretako fiskalek hala egitea baztertu ostean, eta Jose Maria Romero de Tejada Kataluniako fiskal nagusiaren sinadura darama salaketak.

«Ez dugu izan nahi adierazpen askatasuna sustatzeagatik kereila jartzen duen estatu baten parte». Françesc Homs Kataluniako Presidentetza kontseilariaren adierazpenak ondo islatzen du indar subiranisten artean kereilak eragin duen haserrea. Ildo beretik jo dute alderdi subiranistek, eta ERCko parlamentari Oriol Amorosek antzeko hitzak erabili ditu: «Espainiako estatuak gure estatu izateari utzi dio, eta kontra egiten digun estatu bat bihurtu da».

Hirugarren bidearen aldekoek ere itsukeria egotzi diote Espainiako Gobernuari. «Rajoyk badaki kereilak dena izorratzen duela», esan du Unioko Josep Antoni Duran Lleidak. PSC Kataluniako Sozialisten Alderdiko bozeramaile Maurici Lucenari ere «ulergaitza» egin zaio kereila aurkeztea, elkarrizketa zailtzen duelako; baina egonezin handiagoa agertu du horrek Masi hauteskundeetan mesede egingo bide diolako.

Bezperan, CiU, ERC, ICV-EUiA eta CUPen talde parlamentarioetako bozeramaileek beren burua erruduntzat jo zuten, Estatuko Fiskaltzari igorritako gutun baten bidez, A-9ko prozesuagatik. Kataluniako Parlamentuak agindu baitzion Masen gobernuari independentzia erreferendum bat antolatzeko, horren ondorioak beren gain hartu zituzten Jordi Turull, Marta Rovira, Dolors Camats eta David Fernandezek.

Masi, Ortegari eta Rigauri «jokaera bidegabea» izatea egotzi die Torres-Dulcek, Estatuko Fiskaltzako Juntaren babesarekin, Auzitegi Konstituzionalak A-9a bertan behera utzi ostean debekua ez zutelako aintzat hartu: «Errealitatearen ikuspegi alderdikoiak gain hartu zion beren zeregin administratiboak modu objektiboan eta zuzenbideari jarraituz betetzeko eginkizunari».

Sei milioi botopaper eta hautetsontziak egiteko presoak baliatzea, ikastetxeetako zuzendariekin azaroaren 9an bozkalekuak irekitzeko izaniko bilera eta komunikazioak edo A-9ko emaitzen berri Generalitatearen ezkutu eta sinbolo ofizialen ondoan ematea, Kataluniako Gobernuko hiru ordezkariei desobedientzia egozteko oinarri bihurtu ditu Estatuko Fiskaltzak. Indar gehien ustezko delitu hori eta prebarikazioa argudiatzen egin du Fiskaltzak, baina dirua bide gabe erabili izana ere egotzi die Generalitateko arduradunei, «zuzenbidearen kontrako ekintza batez gain, delitu bat egiteko», A-9aren inguruko antolaketagatik.

Lau delituengatik urtebeteko espetxe zigorra eta 18 urteko inhabilitazioa jaso dezakete, baina defentsarako oinarri sendoak prest dituztela jakinarazi du Generalitateak. JpD Demokraziaren aldeko Epaileen eledun Joaquim Boschek, ordea, zalantzan jarri du desobedientzia delituak aurrera egitea, Auzitegi Konstituzionalak ez zuelako pertsona jakinen kontrako agindurik eman. «Jazarpen politikoa» salatu du CiUk.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Gerald Darmanin Frantziako Barne ministroa eta Gilles Simeoni Korsikako gobernuburua elkarri eskua ematen, iragan uztailean, negoziazioen lehen bilkura amaitu ostean, Parisen ©CHRISTOPHE PETIT TESSON / EFE

Korsikako hautetsien eta Frantziako Gobernuaren arteko negoziazioak, oinarri bila

Ander Perez Zala

Darmaninek atzeratu egin du bihar uhartera egitekoa zuen bisita, «eztabaida bare baterako baldintzarik» ez dagoela argudiatuta. Protestak antolatu dituzten gazte mugimenduek aho batez eskatu dute elkarrizketak hausteko.

Autodeterminazioaren eta Amnistiaren Aldeko Akordio Sozialaren prentsaurrekoa, gaur, Bartzelonan. ©INTERSINDICAL

Kataluniako berrehun udalerri daude amnistiaren eta autodeterminazioaren alde

Mikel Elkoroberezibar Beloki

Hirurehun erakundek eman diote babesa Autodeterminazioaren eta Amnistiaren Aldeko Akordio Sozialari, tartean alderdi politiko independentistak, zenbait sindikatu eta ikasle antolakunde.

Danimarkako lehen ministro Mette Frederiksen, gaur, Kopenhagen egindako agerraldian. ©Liselotte Sabroe / EFE

Danimarkako bozak azaroaren 1era aurreratu ditu lehen ministroak

Mikel O. Iribar

Gobernu sozialdemokrata babesten duten alderdiek behartuta hartu du erabakia Mette Frederiksenek.

Suhiltzaile batzuk, atzo, bonbardaketa batek Kharkiven (Ukraina) txikitutako lantegi batean lanean. ©SERGEY KOZLOV / EFE

Zelenskik berretsi du ez duela Putinekin negoziatzeko asmorik

Igor Susaeta

Errusiako goi ganberak Ukrainan partzialki okupatutako lurrak anexionatzeko itunak onartu ditu. Kremlinen mapek erakusten dute Moskuren indarrek segitzen dutela gerra frontean atzera egiten

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...