Albistea entzun
Emakumeen aurkako indarkeriari ez
Emakumeen aurkako indarkeriari ez
Emakumeen aurkako indarkeriari ez

Nafarroako Gobernua. Barcinaren agurra

Banca Civica kiebra jotzear zen

Kontuz-en datu berriek diotenez, Caixabankek 2012an egindako ikuskaritza azterketaren arabera bankuaren ondarea negatiboa zen, eta azken faktura 5.000 milioi kostatu zaio
Kontuz-eko Patxi Zamora, Banca Civica eta CANi buruzko agiriak erakusten, atzoko agerraldian.
Kontuz-eko Patxi Zamora, Banca Civica eta CANi buruzko agiriak erakusten, atzoko agerraldian. IÑIGO URIZ / ARGAZKI PRESS

Joxerra Senar -

2014ko azaroak 18 - Iruñea

Ezer ez da musu truk, eta are gutxiago bankuen munduan. 2012ko martxoaren 26an Caixabankek Banca Civica talde osoa 977 milioi euroren truke erosi zuenean, operazio merkea zirudien. Gerora jakin da, ordea, hasierako prezio horri milaka milioi gehitu behar izan zizkiola kontu liburuetan gordeta zeuzkan galerei aurre egiteko. Azken faktura 5.000 milioi eurotik gorakoa izan zen. Hala ere, Banca Civica erosi aurretik 2012 hasieran egindako due diligence azterketari esker, jakinaren gainean zegoen Caixabank. Are gehiago: azterketa horren arabera, Banca Civicak ondare negatiboa zuen orduan. Laburbilduz, kiebraren atarian zegoen: «Estatuak esku hartzera kondenatuta zegoen, beste erakunde handi batek xurgatu ez balu kiebra joko lukeelako», azaldu zuen Patxi Zamora Kontuz-eko kideak, atzo.

Datu berriak eman zituen ezagutzera atzo Kontuz elkarteak, eta Auzitegi Nazionalak iragan astean hartutako erabakiaren balorazioa ere egin zuen. Kontuz-en arabera, balorazioa «oso ona» da, ikerketa «abiapuntura itzultzen delako» eta orain arteko informazio gabeziari aurre egiteko borondatea adierazten duelako Auzitegi Nazionalak. Ikertu nahi diren gaien artean, aurre-erretiro prozesuak, CANen inbertsio polemikoak eta bulegoen zabaltzeak daude. Jarraian, Kontuz-ek atzo jakinarazitako datu berriak:

NOEL PROIEKTUA

Caixabankek Deloitte etxeari eman zion due diligence ikuskaritza egiteko enkargua, eta operazio hari Noel proiektua izena eman zioten. Isidro Faine Caixabankeko presidenteak ez zuen nahi haren edukia zabaltzea, eta oso pertsona gutxik zuten haren berri erakunde barruan.

Azterketa horrek aditzera ematen du Banca Civicaren kontu liburuek gozoki pozoitsuak zituztela barruan. Nahiz eta taldeak kontu liburuetan 2.735 milioi euroren baliabide propioak aitortu, Deloittek etorkizuneko galeren proiekzioa egiten zuen. Banatutako kredituak, irentsitako higiezin operazioak, beste enpresetan egindako inbertsioak eta bestelako inbertsioak gehituz gero, 2.373 milioi euroren galera garbiak aurreikusten zituen. Hala, baliabide propioak 363 milioira murrizten ziren. Banca Civicari balio bat —eta, ondorioz, prezio bat— ematean, dibidendu fluxuen metodoa erabili zuten, eta «351 milioi eta 97 milioi euro arteko» ondare negatiboa zuela ondorioztatu zuten.

Hala ere, Banca Civicak uste zuen merezi zuela. Kapitalean 3.400 milioi jarri behar zuela kalkulatu arren, 2012 eta 2014 artean 1.376 milioi euro aurreztea espero zuen. Hala, ondare negatiboari aurrezkiaren kalkulua gehituta atera zuen erosteko prezioa: 977 milioi euro. Azkenean, kapital doikuntzetan beste 3.850 milioi jarri zituen —berez, Deloittek 3.400 milioi euro aurreikusi zuen—, eta FROBi 979 milioi euroak itzuli zizkion. Hartara, azken faktura 5.000 milioi eurotik gorakoa izan zen.

WASHINGTONGO BULEGOA

Zifrak abstraktuak izan daitezke, baina jarri behar izan diren milaka milioi euroetan gaizki ateratako negozio ugari daude. Horietako bat izan zen Washingtongo bulegoa. Nafarroako Kutxaren ekimenez eta Estatu Batuetan bankan aritzeko baimenik izan gabe, arrandia handiz, 2010eko ekainean bulego handi bat inauguratu zuten. Egoitza Pennsylvania etorbidean zegoen, Etxe Zuritik 800 metrora eta Nazioarteko Diru Funtsaren egoitzatik gertu. CANeko agintariek gerora arrazoitu zuten iraun zuen bi urteetan 1,5 milioi euro kostatu zela.

Alta, Kontuz-ek bertsio hori gezurtatu du. AEBetako bulegoaz Conciban USA enpresa arduratzen zen, eta, haren zorrak ordaintzeko eta galerak estaltzeko, Banca Civicak 20 milioi dolar jarri behar zituen (16,13 milioi euro). Iraun zuen bi urteetan, ez zuen jardueratik izan; alokairu garestia zuen, eta enpresak langile baino kontseilari gehiago zituen.

ORDAINSARIAK

Nahiz eta Banca Civica hondamendiaren ertzean izan, Nafarroako Kutxako kontseilariek dieta oparoak jaso zituzten azken unera arte. Diru gehien CANeko presidente ohi eta Nafarroako presidenteorde ohi Jose Antonio Asiainek jaso zuen: 37.000 euro Banca Civicako kontseilari gisa, eta beste 21.000 euro CANeko presidente moduan. CANeko kontseilari Juan Cruz Allik, Jose Maria Zarranzek, Ricardo Marti Fluxak eta Jose Luis Errok 17.400 euro jaso zituzten bakoitzak, sei hilabetean.

Nafarroako Kutxaren galeraren arduradun nagusiari, Enrique Goñiri, ez zihoakion batere gaizki. CANeko administrazio kontseiluak kontratua blindatu zion 2005ean. 2005etik 2010era arteko epean, soldata bikoiztu egin zioten: urtean 500.000 euro irabazten zuen hasieran, eta, gero, milioi bat euro. 2010etik aurrera, Banca Civicako presidente moduan zituen beste osagarriak gehituta, urtean 1,9 milioi euro irabazten zituen. 1,2 milioi euroko pentsio funtsa zuen, gainera.

Horrekin guztiarekin zein orain arte ezagutzen zenarekin, berriro ikerketa batzordea irekitzea proposatu dute. Era berean, elkarteak bat egin du abenduaren 13an aldaketa sozialaren alde egitekoa den manifestazioarekin.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

EAJren burukideak, BECeko Batzar Nagusian ©Monika del Valle / Foku

«Entzute aktiboko» prozesu bat abian jarriko du EAJk datozen hilabeteetan

Gotzon Hermosilla

Jeltzaleak VIII. Batzar Nagusia egiten ari dira Barakaldoko BECen.

Igandean egin ziren kontzejuetako hauteskundeak. Irudian, Añuako herritarrak botoa ematen. ©ARABAKO KONTZEJUEN ELKARTEA

Arabako kontzejuen %24k izango dute emakume bat lehendakari

Edurne Begiristain

Kontzejuetako administrazio batzarretako ordezkariak aukeratu dituzte. Finantzaketa, digitalizazioa, emakumeen parte hartzea eta despopulazioa izango dituzte erronka nagusi

Maddalen Iriarte EH Bilduko bozeramailea, atzo, Eusko Legebiltzarrean. ©JAIZKI FONTANEDA / FOKU

«Aukera bat» aurrekontuei

Jon O. Urain

EH Bilduk ez dio osoko zuzenketarik jarri Jaurlaritzaren aurrekontu proiektuari, «elkarrizketarako borondate zintzoa» erakusteko. Eskertuta erantzun du Urkulluk: «Bide berri bat irekitzen da»

Olatz Garamendi Gobernantza Publiko eta Autogobernu sailburua ©Raul Bogajo / FOKU

Garamendik ez du parte hartuko Autonomia Erkidegoetako Presidenteen Konferentzian

Oihane Puertas Ramirez

Adierazi du Espainiako Gobernua hitzartutako «aldebiko akordioak behin eta berriz ukatzen» ari dela, eta Sanchezen Gobernuari eskatu dio bete dezala Eusko Jaurlaritzarekin «hitzartutakoa». Garamendik nabarmendu du ez dutela onartuko «Eusko Jaurlaritza gutxiestea».

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.