Albistea entzun

Udaberrian murgilduta

Eusko Alkartasunetik sortutako Gazte Abertzaleak erakundeak 25 urte bete ditu. Bihar ospatuko du urteurrena Galdakaon, erakunde gisa loraldian dela.
EAko egungo zenbait buruzagi —Maiorga Ramirez argazki nagusian, eta Pello Urizar txikietako lehenengoan—, Gazte Abertzaleetako kide zirenean.
EAko egungo zenbait buruzagi —Maiorga Ramirez argazki nagusian, eta Pello Urizar txikietako lehenengoan—, Gazte Abertzaleetako kide zirenean. BERRIA

Aitziber Laskibar Lizarribar -

2015eko urtarrilak 2

Loraldian da Gazte Abertzaleak. 25 urte bete ditu, eta erakunde gisa «udaberrian» dela dio. Bizi-bizi dagoela, loratzen, eta eraldatzeko gogoz. Lanerako indartsu dago, eta egindakoa erakusteko irrikan. Gazte Abertzaleetako kideak harro daude direnarekin, eta bere erakundeak bete dituen 25 urteekin. Horixe irudikatu nahi dute bihar egingo duten ospakizunean.

Galdakaon (Bizkaia) ospatuko du mende laurdena Eusko Alkartasunaren erraietan sortu zen gazte erakundeak. Hain justu, idazkari nagusi hautatu berri duten Ibon Garciaren herrian. 18 urte ditu Gazte Abertzaleen koordinatzaile berriak, eta larunbatean bertan aurkeztuko du taldeak jendaurrean.

Sortu zenean bezala gaur egun ere erakundearen helburu nagusiak «askapen nazionala eta soziala» direla azaldu du Garciak. Eta, helburu horiek lortzeari begira, lan ideologikoa egitea dela gazte erakundearen zeregina. Hain zuzen, xede nagusia ez dela lortu agerikoa den arren, ideien gizarteratzean aurrerapausoak egin dituela uste du, eta pozik dago horregatik. Azken urteetan erakundeak egindako aldaketari zor zaio hori, idazkari nagusiaren esanetan. «Beti egon izan gara itzalean-edo, baina azken urteetan kalera atera gara; presentzia dugu kalean, pankartetan eta karteletan agertzen gara...». Garcia bera ere lanpetuta ibili da azkenaldian, eta herria «kartelez josi» ondoren erantzun die BERRIAren galderei.

Kaleratze nahi horri lotuta egingo dute biharko jaia ere. Gazte erakundeak 20. urteurrena bete zuenean, ospakizuna leku itxi batean egin zuen; orain, berriz, kalean egitea erabaki du. Zer den ikusarazteko, bere lana gizarteratzeko, parte hartzaileago bilakatzeko eta guztiei erabat irekia izateko. Garciak azaldu duenez, horregatik eskainiko dituzte dohainik iluntzeko kontzertuak ere. «Bertaratu nahi duen guztia joan dadin».

Apustu berezia izan da kontzertuena. Duela urte batzuk pentsaezina izango zatekeen Gazte Abertzaleen ekitaldi batean halako taldeek jotzea, baina gaur egun baiezkoa eman dute; Su Ta Gar eta Itziarren Semeak arituko dira EAren gazte erakundearen ospakizunean. Halako apustua egiteko «beldur» ere izan zirela aitortu du Garciak. Baina egitarau indartsua osatu nahi zuten; erakargarria. Lortu dute, eta horrek zerbait erakusten du, idazkari nagusiaren ustez: «Iraganeko garai batzuk atzean geratu dira. Aldatu gara eta aurrera egiten ari gara erakunde gisa». Pozarren dago horregatik. Baina dena ez da horren erraza ere. «Izan dira ezetz esan diguten taldeak».

Nolanahi ere, lortutakoak eta ospatzeko gogoak aurrera begira lanean jarraitzeko indarra eman die gazteei. Gainera, festa nagusiaren bezperan, bi urteroko Biltzar Nagusia egin dute, eta aurrera begirako lan ildoak zehaztu dituzte. Jarduna biziagotzea eta bai kalean bai instituzioetan gehiago eragitea jarri dituzte helburu; azken urteetako bidean sakontzea, alegia.

Bide horrekin militanteak gehitu ditu erakundeak azken urteetan. Egun, biltzarretan 50 bat lagun biltzen ditu. «Kopuru handia da beste herrialde batzuetako gazte erakundeekin alderatuta».

Instituzioetako lana ere ez da txikiagoa, Garciaren hitzetan. «EH Bildun badu parlamentari gazte bat EAk, eta hura arduratzen da gazte politikez». Gazte erakundeen ekarpen eta proposamenak oinarri hartzen dituela nabarmendu du.

Etorkizuna, bermatuta

Gazte Abertzaleen lehen urteetan erakundeko kide izan zen eta egun Eusko Alkartasuneko idazkari den Pello Urizarrek «ondo» ikusten du egungo taldea; «oso ondo». Gazte konprometituak direla dio; lan egiteko gogoz daudenak. Eta modu autonomoan jarduten direla nabarmendu du. Garciak ere azpimarratu ditu antolaketa eredu horren bertuteak. «Gure erreferentzia EA da, bertan jarduten dugu, baina era autonomoan, haren menpe egon gabe. Finantzaketa ere gure kasa egiten dugu». Horrek, erabakitzeko askatasuna ematen diela azaldu du, eta ados ez dauden erabakiekiko desadostasuna azaltzeko aukera dutela.

Edozein kasutan, Gazte Abertzaleen idazkari nagusiak EAren Nazio Batzorde Eragilean parte hartzen duela azaldu du Urizarrek, eta gazteek horrela egiten dituztela ekarpenak alderdian.

Gazteen «errebeldia puntu hori» atsegin du EAren idazkari nagusiak; «gauzak egiteko beste modu hori eta oztopoen aurrean ez beldurtze hori». Halakoak gizartearentzat berarentzat onuragarri direlakoan dago.

Bestetik, gazte erakundeetan militatzeak pertsonari berari ematen dion aberastasuna goratu du. Formakuntza aipatu du. Talde lanean jarduten ikastearen balioa. Auzolanarena. Gizartea antolatu eta ekarpenak egitearena.

Eta Gazte Abertzaleen jarduna ikusita etorkizuna bermatua dagoela dio. «Ziurtasuna» ematen duela bertako kideekin lan egiteak. Hartara, hurbiltasunagatik, Galdakaon izango da Urizar, «betigazte moduan».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Nikolas Blain eta Anita Lopepe, Baionan egin duten agerraldian ©Bob Edme

Eskaintza politiko berri bat eratu nahi du EH Baik

Ekhi Erremundegi Beloki

Lehen kongresua eginen du azaroaren 26an. Txosten politikoa eta organizatiboa eztabaidatzen hasiko da ondoko egunetan

Miren Etxebeste eta Victor Lana, Donostian. ©Ahal Dugu.

Miren Etxebestek iragarri du aurkeztuko dela Gipuzkoako Ahal Dugu-ren hautagai izateko primarioetan

Uxue Rey Gorraiz

 Donostiako alkategai izateko, Victor Lasak ere aurkeztu du hautagaitza.

Pello Otxandiano, atzo, Donostian. ©ARITZ LOIOLA / FOKU

Egiturazko neurriak sustatzeko hitzarmen bat proposatu du EH Bilduk

Iosu Alberdi

Ongizate Hitzarmenak hamar neurri jaso ditu: bost «ongizatearen oinarri materialak bermatzeko», eta beste horrenbeste aberastasuna banatzeko

Frantziako armadan sartzera deitzeko publizitate bat, Baionako autobus geltoki batean. ©GUILLAUME FAUVEAU

Egun bat Frantziako armadan, nahi eta nahi ez

Oihana Teyseyre Koskarat

Iparraldeko 16 eta 25 urteko gazte guziak behartuak dira Frantziako armadarekin edo Jendarmeriarekin egun bat pasatzera. Euskaldunen kontrako diskriminazioa pairatu dute anitzek, «propaganda» egunean.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...