Kuba-AEB. Harremanak normaltzen hasteko akordioa. ANALISIA

Kuba-AEBak: aro berri baten hasiera

Jose Miguel Arrugaeta -

2014ko abenduak 19

Pakistanen familia ugari beren umeak lurperatu berri dira, Mexikon desagertutako 43 ikasleek linboan segitzen dute, Estatu Islamikoa aurrera egin eta egin ari da eta bateko eta besteko adierazpenekin ez dute geldiaraziko... Baina Barack Obamak eta Raul Castrok aurreikus zitekeena aldi berean eta elkar hartuta jakinarazi izana da urteko albistea, zalantzarik gabe: Kuba-AEB harremanetan agertokiaren erabateko aldaketa.

Ongi informatuta eta jakinaren gainean zeuden batzuk (eguna, ordua eta tokia ñabardurak besterik ez dira), sorpresa hitza erabiltzea hipokrita ere izan daiteke, beraz. Lehen begiratuan, Gerra Hotzeko eskola zaharreko preso truke bat eman dezake: oraindik ere zigorra betetzen ari ziren hiru agente kubatar —injustuki eta neurriz kanpo kondenatuak— indultatu egin dituzte, CIAko kontratista baten, kubatar jatorriko agente estatubatuar baten —Rolando Sarraff Trujillo izeneko kriptografoa, Newsweek-en arabera— eta AEBetako Gobernuak interes berezia agertu duen beste zenbait presoren truke. Ariketa politiko bera, baina, pentsa daitekeena baino dezente garrantzitsuagoa izan da, eta hilabete asko eskatu ditu.

Funtsezko gaia da harreman diplomatikoen berrezarpena, ekar dezakeen adar askotako elkarrizketagatik. Aro berri bati ekin diote, aro ireki bati, eta nazioartean ondorio ugari izan ditzake.

Idazten ari naizen mementoan, AEBak zalaparta handirik gabe ari dira hartzen beren espioi eta agenteak, eskuin muturreko lobby kubatar-amerikarrari kea dario zulo guztietatik Obama traidoretzat jo eta madarikatu bitartean —John F. Kennedy zenarekin gauza bera egin zuten—. Kuban, berriz, gizartea festan ari da: indultatutako hiru heroiak beso zabalik hartu ditu eta harremanei berrekitearekin blokeoaren amaiera eta auzo-herrien arteko bizikidetza normala etorriko direla du amets —AEBetako erregimen politiko-ekonomikoaren barnean adostasun lortu zailen esku ere badago hori—.

Goi mailako politika, ordea, dirudiena baino dezente bihurriagoa da. Obama laster badoa, eta agur esan aurretik Guantanamoko preso batzuk askatu eta Uruguaira bidali ditu; immigranteak arautzeko dekretuak sinatu ditu; eta Habanako Interesen Bulegoari Enbaxada izena ipini dio. Bete gabeko promesa ugarien akatsa nolabait zuritzearren hartutako erabaki horiek guztiak ez dira finkoak, gero eta indar gehiago baitauka oposizio errepublikanoak.

Kubako Gobernua, berriz, zailtasun eta ezintasun ekonomiko-sozialen artean ari da mugitzen, eguneroko bizitzan eragin gutxi daukaten aldaketak motel eginez. Testuinguru honetan, bakoitzak bere interesak eta lehentasunak ditu, ate ia denak daude irekirik.

Hainbeste urte daramat bizitzen Kuban, kontua jada galdu baitut. Zerbait bereziki nabarmentzeko eskatzen badidazue, Kubako herriaren «itxaropena» aipatuko dizuet. Auzokoek esaldi bakarrarekin laburbilduko lukete ataka hau: «No es fácil, compañero». Eta egia da, etapa hau ez da traza hartu erraza. Ikusteko dago indibiduala eta berekoia ala solidarioa eta subiranoa nagusituko diren. Kubatarren eta estatubatuarren esku egongo da hori, urte bukaeran Kubako eta AEBetako presidenteek ondo koordinatuta oparitu diguten iragarkiaren gainetik.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Santos Indurain kontseilaria prentaurreko batean, artxiboko irudian. ©Jesus Diges/EFE

324 kasu atzeman dituzte Hego Euskal Herrian

Berria

Kasuen beherakada orokorra izan da herrialde guztietan: Araban 44 kasu detektatu dituzte (-31); Bizkaian, 180 (-31); Gipuzkoan, 35 (-29); eta Nafarroan, 59 (-87). Nafarroako Gobernuak ez du neurri orokorrik ezarriko oraingoz. «Atzokoa ez zen alarma guztiak pizteko modukoa, eta gaurkoa ez da kriskitinak jotzekoa», adierazi du Santos Indurain Osasun kontseilariak.

Gizon bat PCR proba egiten, Donostian. ©Gorka Rubio / FOKU

Hogei milioi koronabirus kasu baino gehiago detektatu dituzte mundu osoan

Oihane Puertas Ramirez

COVID-19a 188 herrialdetara iritsi da, eta 736.000 lagun baino gehiago hil ditu.

Zahar etxe bateko egoiliarrak paseoan, artxiboko irudian. ©Marisol Ramirez/FOKU

Donostiako zahar etxe bateko egoiliar batek positibo eman du

Berria

Zahar etxe bereko bi langile ere kutsaturik daude.

Nafarroako osasun langileak PCR probak egiteko prest, artxiboko irudi batean. ©Jagoba Manterola/FOKU

Agerraldi bat detektatu dute Murillo el Fruto eta Zarrakaztelu inguruan

Berria

30 positibo atzeman dituzte; gehienak, laborarien artean.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna