Albistea entzun

Irria munduan egoteko jarrera bat da

Euskal Herriko haurren aisialdian euskarak zuen hutsunea betetzeko, Irrien Lagunak egitasmoa jarri zuten abian BERRIAk, Elkar argitaletxeak eta Katxiporreta pailazo taldeak. Gaur bost urte bete ditu, eta euskalgintzan eta bizikidetzan diharduten eragileekin sareak osatzen jarraitzeko asmoa dute.
ANDONI CANELLADA / ARGAZKI PRESS

Ihintza Elustondo -

2015eko azaroak 18

Noizean behin aurpegian marrazten den hortzen puzzleaz gain, zerbait gehiago ere bada irria. Momentu jakin batetik harago, bada jarrera bat bizitzan egotekoa, bizitzan aritzekoa. «Jarrera eraikitzaile, baikor eta aktibo bat da, amets partekatu bat aurrera ateratzeko», Jose Mari Agirretxeren arabera. Irrien Lagunak proiektuak bost urte bete ditu gaur, eta egitasmoan murgilduta dabil hasieratik. Bide onetik doazela uste badu ere, urrats gehiago egiten jarraitzeko asmoa dute.

Katxiporreta pailazo taldeak, BERRIAk eta Elkar argitaletxeak gabezia bat zegoela antzeman zuten Euskal Herriko haurren aisialdian. Mundu globalizatuaren eraginez, euskarazkoak ez diren ikus-entzunezko produktuak iristen zaizkie haurrei. Kanpoko eraginen aurrean mugak jartzea ezinezkoa dela eta, hiru elkarteak bat eginda jarri zuten abian Irrien Lagunak kluba. Euskaraz, alaitasunez eta balioetan oinarritutako proiektu komunikatibo bat. «Bizikidetza, errespetua eta onarpena lortu nahi ditugu, herriarekiko, albokoarekiko, eta nork bere buruarekiko», azaldu du Anabel Arraiza Irrien Lagunak klubeko komertzialak eta Ane Pirata irudikatzen duen aktoreak.

Irrien Lagunak egitasmoak aurrera egin dezan, egunak joan egunak etorri bulegoan lanean aritzen direnak hiru pertsona baino ez dira: Arraiza, Iñigo Arandia eta Nerea Gartzia. Joxi Oiarbide izan zen egitasmoaren bultzatzaile nagusia, baina egun, hirurek jarraitzen dute hark hasitako bidea. BERRIA, Elkar eta Katxiporreta hainbat batzordetan banatuta aritzen dira lanean; baita musikariak, aktoreak, margolariak, kolaboratzaileak eta idazleak ere.

Irria aldizkaria da gaur-gaurkoz egitasmoaren sostengu nagusia. Hutsune bat betetzeko sortu zuten hura ere. Izan ere, duela urte batzuk Ipurbeltz eta Txirrista aldizkariak zeuden, besteak beste, baina haiek desagertuta, euskarazko aldizkaririk gabe gelditu ziren haurrak. Urtean hamar zenbaki kaleratzen dituzte, eta bakoitzak gai bat jorratzen du. «Punta-puntako idazle eta ilustratzaileek parte hartzen dute, eta kalitate handikoa da», Arandiak azaldu duenez. 3 eta 8 urte bitartean dituzten haurrentzako produktua da,eta 5.000 harpidedun baino gehiago ditu egun. «Bost urteren bueltan hainbeste harpidedun biltzea klub baten inguruan ekarpen interesgarria da», dio Olatz Osa Elkar argitaletxeko arduradunak.

Nerea Gartzia aritzen da hilero aldizkaria prestatzen, eta, haren arabera, ondo pasatzeko aldizkari bat da, eta helburu hori lortu dutelakoan dago: «Guraso batzuek esan izan didate umeek egunero galdetzen dutela ea aldizkaria buzoian dagoen». Baina, entretenitzea ez ezik, gai askoren inguruan pista batzuk ematea ere badu jomuga: heriotza, sentimenduak, gorputza...

BERRIAk badu haurrentzako Mantangorri gehigarria. Baina, horrez gain, Irrien Lagunak egitasmoa sustatzea beharrezkoa dela uste du Ainara Lasa BERRIAko Marketin arduradunak. «Gure helburua, egunkari bat egiteaz gain, euskarazko komunikazio esparrua osatzea ere bada». Gainera, Irria aldizkariaren bidez hedabideak ematen duen ikuspegia haurrengan txertatzeari garrantzitsua deritzo: «Gure balioak: ingurugiroa, euskara, hemengo kultura...».

Dena den, BERRIA, Elkar eta Katxiporretaren elkarlanaz harago doa Irrien Lagunak. «Beste eragileekin elkarlanean, aisialditik abiatuta, beste Euskal Herri bat irudikatzea da gure bokazioa». Demokraziaren inguruan hausnarketa egitea ere bada egitasmoaren helburua. «Nola nahi dugu herri hau aurrera atera? Denon parte hartzearekin bada, askoz ere aberatsagoa izango da. Eta denontzat izango da».

Beste bizimodu bat sortzeko, hezkuntzako sektore guztiekin eta instituzioekin elkarlanean dihardute; 96 ikastetxerekin eta 60 udal ingururekin daude saretuta. Gainera, 30 elkarterekin elkarlanean dihardute: familia eredu ezberdinen ingurukoak, nazioarteko gaiak lantzen dituztenak, gaixotasunen ingurukoak, integrazioa eta inklusibotasuna lantzen dituztenak...

Elkartasuna sustatzeko, Bizipoza Auzolan egitasmoa jarri zuten abian, hainbat elkarterekin; eta herrigintzaren arlotik, aisialditik eta euskaratik parte hartzea bultzatzea ardatz duen Oinerri egitasmoaren parte ere badira.

«Bost urte daramatzagu. Beste bost urte barru nahiko genuke bizirik jarraitzea, indar handiagoarekin, eta sektore gehiago batuta, egitasmo berriak martxan jarrita, munduko gerrak desagertuta eta gure herriak munduko mapan bere lekua izanda», gehitu du Agirretxek.

Sareko BERRIAzalea:

Udazkenean, BERRIAlagun egiteko pausoa eman dezazun, eskaintza bat egin nahi dizu BERRIAk. Herri baten kulturaren plaza da BERRIA. Kultur egitasmo, dinamika eta ekitaldi anitzen erakustoki. Euskal kulturaren inguruko informazioaren plaza handia. Azaroan eta abenduan, Euskaraldiak, Bertsolari Txapelketa Nagusiak eta Durangoko azokak hartuko dituzte, besteak beste, BERRIAren orrietako asko, paperean eta webgunean.

Albiste asko irakurriko dituzu, segur aski webgune honetan bertan. Eta eskari bat egin nahi dizugu: har ezazu konpromisoa irakurtzen duzunarekin. Irakurleen babes ekonomikoa funtsezkoa da BERRIAren etorkizuna ziurtatzeko.

Albiste gehiago

Gliese 486b planeta nolakoa izan daitekeen erakusten duen irudi artistiko bat. ©RenderArea / José Caballero / Max-Planck-Instituts für Astronomie

Planeta bati eta haren izarrari 'Su' eta 'Gar' izenak jartzea proposatu du astronomo talde batek

Edu Lartzanguren

NBEren Hizkuntza Indigenen Hamarkadaren harira, Astronomoen Nazioarteko Batasunak eskatu du izenak proposatzeko 20 planetarentzat

Baionako Merkatu plaza ©Berria

Iparraldeko euskal hedabideek saio berezia egingo dute larunbatean

Urtzi Urkizu

Euskara, hedabideetatik karriketara! izenburupean, hainbat gonbidatu izanen dituzte Merkatu plazan, 11:00etatik 12:00etara.

Ezkudia-Altuna finala ©Aritz Loiola / Foku

ETB2k %7,7ko ikusle kuota izan du azaroan, 2019ko udatik lortutako txikiena

Urtzi Urkizu

ETB1en, lau eta erdikoaren finalak %24,5eko ikusle kuota lortu zuen, eta %1,9ko batezbestekoa izan du azaroan. ETB3k %0,2ko ikusle kuota du.

 ©RAUL BOGAJO / FOKU

«Erlojuak berebiziko garrantzia du gizartean»

Unai Etxenausia

Erlojugilearen ogibidea galtzear dago. Sueskunen ustez, ordua emateko baino askoz gehiagorako balio du erlojuak, eta «arma boteretsu bat» ere izan daiteke batzuetan.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...