Albistea entzun

Barruan libre daukate bidea

Aralarreko VI. biltzarrean afiliatuen %13k babestu dute estatutu berrien aurkako osoko zuzenketa
Ainhoa Beola, Patxi Zabaleta eta Maite Iturre, atzo, Bilbon, Aralarren VI. biltzarreko lehen saioan.
Ainhoa Beola, Patxi Zabaleta eta Maite Iturre, atzo, Bilbon, Aralarren VI. biltzarreko lehen saioan. ARITZ LOIOLA / ARGAZKI PRESS

Enekoitz Esnaola -

2014ko azaroak 9

Datorren larunbatean ikusiko da Aralarren zuzendaritzak nolako babesa daukan, orduan bozkatuko dituztelako estatutu berrien, txosten politikoaren eta zuzendaritza osaketaren proposamenak, baina, atzokoa aintzat hartuz gero, aurreikus daiteke babes zabala jasoko duela. Atzo, VI. biltzarraren lehen jardunaldian, estatutu berrien proposamenaren aurkako osoko zuzenketa bat zuten mahai gainean, Nafarroako Aralarreko afiliatu batzuek aurkeztutakoa, eta, bozketan ondo atera zen zuzendaritza, zuzenketaren proposamenak %13,88ko sostengua baizik ez zuelako jaso.

Txentxo Jimenez, Pablo Azkona, Mikel Azkona, Mikel Nuin, Felix Esparza, Floren Luki, Arantxa Elkarte, Pedro Huarte, Zutoia Toral eta Inma del Riok aurkeztu zuten ofizialki osoko zuzenketa, estatutu berriekin Nafarroako Aralarren erabaki eskubidea desagertu egingo litzatekeela iritzita. «Planteatzen da Nafarroako arazo politiko funtsezkoetan erabaki ahal izateko eskubidea kentzea Nafarroako alderdiari, eta erabakiak Hegoaldean hartzea». Idatzian aipatu zuten Aralarrek «bi antolaketa eremu edukitzeari utzi» egingo diola —Nafarroakoa eta EAEkoari—, eta zuzendaritzak «kontrol politikoa handitu» nahi duela. Gainera, uste dute alderdiko arduradunek estatutuak aldatzeko prozedura ez dutela ongi bete, eta, oraingoz, 2011ko kongresuan onartutakoekin segitzeko eskatu zuten.

Atzoko saioan osoko zuzenketaren eztabaidarekin pasatu zuten denbora gehien. Afiliatuen %13,88 Jimenezen-eta proposamenaren alde azaldu ez ezik, kontra ere bozkatu zuten %65,74k; abstentzioa %20,37 izan zen.

Ekosozialismoa eta independentzia izeneko txosten politikoan, Aralarrek dio ezker abertzaleak «egitura bateratua» behar duela «jauzi kualitatiboak» emateko. Patxi Zabaleta koordinatzaile nagusiak hedabideen aurrean zioen «egoera politiko berriak egokitzapenak» eskatzen dituela. «Ikusita EH Bilduren baitan egiten dugun politika, orain alderdi haiekin [Sortu, EA eta Alternatibarekin] dugun egitura estrategiko eta iraunkorra lehenetsi behar da, eta han hartu behar dira erabaki nagusiak eguneroko politikagintzarako. Horretara egokitu behar da alderdiaren araudia».

Zabaletak berretsi zuen Aralarreko zuzendaritzak, osoko zuzenketaren egileek bezala, Nafarroako erabaki esparrua defendatzen duela, «baina horrek ez du esan nahi alderdi nazional batek hori ezin dezakeenik bere egiturara eraman».

Estatutuetako 30 zuzenketa partzial eta txosten politikoko zortzi ere eztabaidatu zituzten. Bozketetako emaitzak osoko zuzenketaren joerakoak izan ziren.

Kargu berriak

Aralarreko koordinatzaile nagusi izateari utziko dio hark larunbatean, Iruñean egingo duten saioan. 2002tik dago, alderdia eratu zutenetik. Bere kabuz hartu du erabakia. Zuzendaritzak estatutu berrietan kargu hura, koordinatzaileordearena eta Antolaketa idazkariarena kentzea proposatu du. Hiru figura haiek gidatzen dute Aralar egunerokoan. Koordinatzaileordea Dani Maeztu da, 2011tik; Antolaketa idazkaria, Rebeka Ubera, 2009tik. Organigrama berrian, ohorezko presidentea eta idazkari nagusia jarri nahi dituzte —azkena izango da «ordezkari politiko gorena»—, eta zuzendaritzak larunbatean proposatuko ditu izenak.

Ziur jo daiteke Zabaleta izendatuko dutela ohorezko presidente. Idazkari nagusitzarako izen zehatzik ez da atera, oraingoz.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Nikolas Blain eta Anita Lopepe, Baionan egin duten agerraldian ©Bob Edme

Eskaintza politiko berri bat eratu nahi du EH Baik

Ekhi Erremundegi Beloki

Lehen kongresua eginen du azaroaren 26an. Txosten politikoa eta organizatiboa eztabaidatzen hasiko da ondoko egunetan

Miren Etxebeste eta Victor Lana, Donostian. ©Ahal Dugu.

Miren Etxebestek iragarri du aurkeztuko dela Gipuzkoako Ahal Dugu-ren hautagai izateko primarioetan

Uxue Rey Gorraiz

 Donostiako alkategai izateko, Victor Lasak ere aurkeztu du hautagaitza.

Pello Otxandiano, atzo, Donostian. ©ARITZ LOIOLA / FOKU

Egiturazko neurriak sustatzeko hitzarmen bat proposatu du EH Bilduk

Iosu Alberdi

Ongizate Hitzarmenak hamar neurri jaso ditu: bost «ongizatearen oinarri materialak bermatzeko», eta beste horrenbeste aberastasuna banatzeko

Frantziako armadan sartzera deitzeko publizitate bat, Baionako autobus geltoki batean. ©GUILLAUME FAUVEAU

Egun bat Frantziako armadan, nahi eta nahi ez

Oihana Teyseyre Koskarat

Iparraldeko 16 eta 25 urteko gazte guziak behartuak dira Frantziako armadarekin edo Jendarmeriarekin egun bat pasatzera. Euskaldunen kontrako diskriminazioa pairatu dute anitzek, «propaganda» egunean.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...