Albistea entzun

Fidel Castroren heriotza. Agur ekitaldiak

Maitasun ilara amaiezin bat

Dozenaka mila herritarrek azken agurra eman diote Fidel Castro Kubako buruzagi iraultzaileari Habana hiriburuan. Etengabeko ilaran, iraultzaren printzipioei eusteko konpromisoa hartu dute
Dozenaka mila herritarrek ilara egin zuten atzo Habanan, Iraultzaren plazan, Fidel Castrori azken agurra eman ahal izateko.
Dozenaka mila herritarrek ilara egin zuten atzo Habanan, Iraultzaren plazan, Fidel Castrori azken agurra eman ahal izateko. ERNESTO MASTRASCUSA /EFE Tamaina handiagoan ikusi

Iñaki Petxarroman, Berriemaile berezia -

2016ko azaroak 29 - Habana

Fidel Castroren gerrilla garaiko argazki bat eta herritar olde amaiezin bat hari gorazarre egiten. Etengabeko ilara bat. Dozenaka mila herritar elkartu dira Habanan Fidel Castro Kubako Iraultzaren buruzagi historikoari azken agurra ematera. Jose Martiren memorialean komandante historikoaren argazkia jarri dute, eta goizetik gauera arte iraun du segizioak.

09:00etan ekin diote bederatzi egun iraungo duen doluari, eta hiriburuko herritarrak izan dira Fidel Castro agurtzeko aukera izan duten lehenak. Bihartik hasita, haren errautsak Santiagora bidean joango dira, gerrillak 1959an egin zuen Askatasunaren Martxaren kontrako norabidean.

Militarrek 21 kanoikada jaurti ondoren hasi da ekitaldia. Ordurako, etengabekoa da jendearen emana hiriburuko Iraultza plazaren inguru guztietan. Gertuko campusetako unibertsitarioak, langileak, herritarrak eta atzerritik bildutako milaka lagun elkartu dira komandante iraultzaileari azken agurra ematera.

Bakoitzak baditu bere motiboak. Eugenio Vazquez (80 urte) gogoz dago Castro omentzeko. «Berak merezi zuen, ezohiko gizon ikaragarria zelako, iraultzaren obraren arduradun handiena, eta harekin batera Kuban azaldu diren justizia, berdintasun eta elkartasun balioen sustatzaile nekaezina».

Vazquez bezalako beltzak ez ezik, zuriak, mestizoak, gizonak, emakumeak, gazteak eta haurrak daude tartean... Transexualak ere badira, inoiz Iraultzak kolektibo horrekin eta homosexualekin izandako esku hartze bortitza nolabait ahazteko prest, Iraultza plazara joandako taldeko batek BERRIAri adierazi zionez.

Omenaldirako arrazoiak arrazoi, bildutako guztiek aipatzen dute Fidel Castrorekin sentitzen duten zorra eta maitasuna. Lourdes Ruizek (60 urte) ere hala adierazi du: «Kuban gaur egun dugun askatasun hau hari esker dugu, eta Habanako herritar guztiek sentitzen dugu min sakon bat une honetan galdu egin dugulako».

Habanako Unibertsitateko ikasle andana batek, itsasgarriak soinean, plazaren ezker eta eskuin antolatu dira, ilaretan jarrita, pazientzia handiz, euren txanda iristeko zain. «Gazteok ikaragarri zor diogu. Hari esker ikasten ari naiz psikologia», dio 18 urteko neska gazte batek, aterki batekin bere burua eguzki indartsutik babesten ari dela.

Herritarrak, sartu ezinda

Mundu guztiak nahi dio azken agurra eman komandanteari, eta tentsio momentu batzuk ere izan dira, ilara gero eta estuagoetan herritarrak ondoezik direlako. Sorosleek lan dezente dute batzuk artatzen, eta baita zaintza lanean ari diren polizia eta antolatzaileek ere, herritarrak baretu nahian. «Lasai, zin dagizuet berandu bada ere denak sartuko zaretela, inor ez dela geratuko Fidel agurtu gabe», diote bozgorailutik, «Gora Fidel» eta «Garaipenera arte beti» lelo ezagunekin batera.

Desfilea goizeko bederatzietan hasi eta lerro hauek idazteko orduan, behintzat, ez dira batere arindu. Gaueko hamarrak arte zuten omenaldiarekin jarraitzeko asmoa, Euskal Herriko goizaldean. Edonola ere, aste osoan jarraituko dute Fidel Castroren aldeko ekintzek. Gaur bertan, Iraultza plazan ekitaldi handia egingo diote, eta han izango dira munduko buruzagi ezagunak ere. Dagoeneko, Habanan, herritar arruntak ez ezik, mundu osoko pertsona ezagunak ere badaude: besteak beste, Frei Betto Askapen Teologiaren ordezkari eta idazle brasildarra eta Palestinako Nazio Askapenerako eta Venezuelako enbaxadoreak, beste askoren artean.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Eric Ciotti, Valerie Pecresse eta LRko presidente Christian Jacob, hurrenez hurren. ©CHRISTOPHE PETIT TESSON / EFE

Valerie Pecresse aukeratu dute LRko presidentegai izateko

Arantxa ElizegiEgilegor

Emakumezko presidentegai bat izango du lehen aldiz eskuin tradizionalak. Militanteen botoen %61 eskuratu ditu Ile-de-France eskualdeko hautagaiak primarioetako bigarren itzulian
Auzi-mediku talde bat Irak iparraldeko Baduxko espetxearen ondoan, bertan topatu zuten hobi komuna azertzen, joan den ekainean. ©AMMAR SALIH / EFE

NBEk «inflexio puntu bat» iragarri du Estatu Islamikoa nazioartean epaitzeko

Gorka Berasategi Otamendi

Unitad ikerketa taldeak adierazi duenez, nahikoa zantzu bildu du frogatzeko fundamentalistek gerra krimenak eta gizateriaren kontrakoak egin zituztela

 ©ALBERTO VALDS / EFE

Txileko ofizialismoak jakinarazi du Kasten alde egingo duela 19ko bozetan

Igor Susaeta

Sichelen esanetan, «ezkerreko populismoa garaitzeko» erabiliko du bere botoa. Bi presidentegaiak publikoki hitz egitekoak dira Parisirekin

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.