Albistea entzun

Hau zen etorkizuna

Mikel Urrutikoetxeak eta Iker Irribarriak buruz buruko inoizko finalik gazteena jokatuko dute gaur, Bilbon. Apustuetan ez da alde handirik egongo
Mikel Urrutikoetxea eta Iker Irribarria, iragan ostegunean, finalerako pilotak aukeratzen.
Mikel Urrutikoetxea eta Iker Irribarria, iragan ostegunean, finalerako pilotak aukeratzen. LUIS JAUREGIALTZO / ARGAZKI PRESS

Imanol Magro Eizmendi -

2016ko maiatzak 29

Idoloen argazkiak dituzte biek logelako armairuan. Sainduen irudiak dirudite, baina sinadura daramate. Are gazteago zireneko garaietan lorturiko kopa eta txapelen artean dituzte. Makina bat aldiz hartuko zuten lo argazki horiei begira. Iker Irribarriak (Arama, Gipuzkoa, 1996) Irujo eta Titinenak zituen; Mikel Urrutikoetxeak (Zaratamo, Bizkaia, 1989), berriz, Berasaluze eta Olaizola II.arenak. Idolo zirenak orain aurkari dituzte, maila onean lehiatzen, gainera, eta gainditu egin dituzte. Bai, behintzat, buruz buruko txapelketa honetan. Hori du hain gaztea izateak eta dagoeneko lehen finalerako sailkatu izanak.

Irribarria eta Urrutikoetxea dira orain autografoak sinatzen dituztenak, eta gaur buruz buruko inoizko finalik gazteena jokatuko dute, Bilbon, Bizkaia pilotalekuan (17:00). Gaur arte, eta bi finalisten adina kontuan hartuta, Aimar Olaizolak eta Patxi Ruizek 2003an jokaturiko finala zen gazteena. Irribarriak 19 urte, hamar hilabete eta 25 egun ditu, eta Urrutikoetxeak 27 urte bete zituen asteazkenean, baina, marka hura hobetu dute. Final honek, batez beste, 23 urte erdi baino gutxiago ditu; 2003ko hark, berriz, 23 urte eta zazpi hilabete zituen. Hark amaiera jarri zion Eugi eta Belokiren aroari. Ikusteko dago gaurkoa ere beste aro baten amaiera izango den.

Gaztetasun marka horren gakoa Irribarria da, buruz buruko final bat jokatu duen finalistarik gazteena. Aurreko marka Iñaki Gorostizak zuen, 20 urte, zazpi hilabete eta 15 egun baitzituen 1974ko finala galdu zuenean. Logikoki, Irribarriak irabazten badu, inoizko txapeldunik gazteena izango da. Aski ezaguna da marka hori Ruben Belokik duela: 20 urte, bederatzi hilabete eta hamabost egun zituen 1995eko finala irabazi zuenean. Aramakoa Lehen Mailako txapelketa jokatu duen lehen aldian iritsi da finalera, Irujok edo Ogetak egin bezala.

Marka harrigarria da Irribarriarena, baina Urrutikoetxeak ere polita lor dezake. Izan ere, gaurkoa laugarren finala du jarraian, eta laugarren txapela irabaz dezake segidan. Balentria handia al da hori? Bada, esaterako, ez Juan Martinez de Irujok eta ez Aimar Olaizolak ez dute lortu sekula. Biek jokatu dituzte noizbait lau final jarraian, baina baten bat galdu izan dute. Halere, ez litzateke lau txapel jarraian irabazten dituen lehen pilotaria, Julian Retegik bost irabazi baitzituen bere garaian. Eratsungo txapeldun handiak 1989ko lau t'erdikotik hasi eta 1991ko binakakora arteko bostak irabazi baitzituen.

Txapelketako izena Iker Irribarria izan da. Ezustekorik handiena. Iaz Bigarren Mailako txapeldunorde izan ondoren, txapelketan sartzeko atariko partida bat jokatu behar izan zuen Merino II.aren aurka (22-11). Ondoren, Arretxe II.a (22-14), Jaunarena (22-2), Olaizola II.a (22-14) eta Bengoetxea VI.a kanporatu ditu (22-10). Partida guztietan ezker kolpe erakustaldiak eman ditu, eta pilotazaleak harritu. Hainbeste, duela bi aste apustuak haren alde baitzeuden, 100-80ri; azken egunetan, parekatuz joan dira.

Mikel Urrutikoetxeari dagokionez, sufrituz iritsi da finalera, lehen partidan batez ere. Urte bikaina egin du, hiru txapelak irabazi ditu, baina haren kolpeak ere nabaritu du. Atzelari jokaturiko txapelketan pasada hartu zuen, eta ez du iazko kolpe fresko hura. Hala ere, Zaratamokoa buruz buru jokatzeko makina da, eta, Ezkurdia ondo kostata kanporatu ondoren (22-19), finalerdietan ez zion aukerarik eman Altunari (22-6).

Beteta, edo ia beteta

Bi finalistek gaur jokatuko dute lehen aldiz elkarren aurka buruz buru. Irribarriarentzat, Lehen Mailako lehen finala da; Urrutikoetxearentzat, laugarrena eta buruz buruko bigarrena. Iaz jokatu zuen lehena, eta hartaz geroztik jokaturiko hiru finalak irabazi ditu. Apustuetan ez da alde handirik egongo: parean irtengo dira, Irribarriaren aldeko joera txikiarekin. Pilotalekuko sarrera guztiak ez dira bukatuko, baina ia goraino beteko da. Tartean umeak egongo dira, amaieran finalistei eskumuturrekoak, argazkiak eta sinadurak eskatuko dizkietenak. Haiek ere logelan gordeko dituzte; haiek izango dira etorkizunean txapeldun izatearekin amets egingo dutenak.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Isak gola ospatzen, atzo, Sturm Grazen aurkako neurketan. ©CHRISTIAN BRUNA / EFE

Realak lehen garaipena lortu du Europa Ligan

Jone Bastida Alzuru

Realak irabazi egin du Sturm Grazen aurkako partida: 0-1 gailendu da. Isakek sartu du lehiako gol bakarra, bigarren zatian

 ©SEDIS BASQUET

«Momentuaz gozatzen ari naiz»

Jone Bastida Alzuru

Estatistikek erakusten dute Etxarri sasoi hasiera aparta egiten ari dela: Espainiako Lehen Mailako saskiratzaile nagusia da, partidako batez beste 19,2 puntu bilduta. Hazten segitu nahi du.
Osasunako jokalariak, <em>Chimy</em> Avila-k Vila-reali sartutako gola ospatzen. ©DOMENECH CASTELLO / EFE

Denak bat eginik, gorabidean

Eñaut Agirrebengoa

Osasuna bosgarren postuan iritsiko da Lehen Mailako hamargarren jardunaldira, hasiera itzela osatu eta gero. Miguel Flañoren ustez, oraingo emaitzak azken urteetan hartutako ildoaren segida dira: «Oso egina dago taldea». Gorritxoek onbidean jarraitu nahi dute gaur, Sadarren Granadari irabazita.

 ©MONIKA DEL VALLE / FOKU

«Azken urte eta erdian asko sufritu dut; burumakur nengoen»

Mikel O. Iribar

Azken hamasei hilabeteak ez dira garairik samurrenak izan Zaratamokoarentzat, hainbat arrazoirengatik. Pixkanaka, sentipen «hobeagoak» ditu. Bihar, Lasoren aurkako partida erabakigarria jokatuko du, Zallan.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.