Albistea entzun

Jaurlaritzaren diru laguntzak. Euskal hedabideak

BERRIAri inoizko laguntza eskasena emango dio Jaurlaritzak, %14 jaitsita

Iaz baino 210.000 euro apalagoa izango da laguntza.

Banaketa irizpideak aldatu ditu Jaurlaritzak, eta kalte egin dio egunkari nazionalari.

BERRIA sortu zenetik ez da horren txikia izan urte osoko laguntza
BERRIA

Garikoitz Goikoetxea -

2014ko urriak 21

Kolpea. Kolpe handia eman dio Eusko Jaurlaritzak BERRIA egunkariari: 210.000 euro gutxiago jasoko ditu kolpetik, iaz baino %14 gutxiago. Euskarazko hedabideentzako diru laguntzetan aldaketak egin ditu gobernuak, eta euskarazko egunkari nazionalari babes eskasagoa emango dio. Inoiz baino txikiagoa: 1,3 milioi. 2003ko kopurua txikiagoa zen (1,03 milioi), baina ez da alderaketa egokia, urte erdia hartzen baitu kontuan. Hara: Euskaldunon Egunkaria-k, azken urtean, 2002an, 1,7 milioi jaso zituen; orain BERRIAk baino 350.000 euro gehiago. Ebazpenaren aurkako helegitea jartzea aztertzen ari da BERRIA.

Aurreko urteetako arazo berak ditu ebazpenak. Berandu dator: urtearen hondarrean, urrian jakinarazi dute zenbateko laguntza izango duen hedabide bakoitzak. Atzerapena arazo handia da kontuak taxutzeko, ziurtasunik eza dakar eta. Hor dago beste arazoa: urtero aldatzen da deialdia, eta hedabideek ez dakite zer gertatuko den. Finantzaketa egonkorra galdegiten ari dira, baina oraingoz ez du onartu gobernuak —gaia aztertuko duela esan du—. Aurten aldaketa handiak egin dituzte, eta BERRIAri kalte handia egin diote hala —beste batzuei ere bai: Hamaika telebistari, Elhuyar aldizkariari, Hernaniko Kronika-ri...—.

Berritasuna zuen deialdiak, irizpide berriak. Hedabidearen «zabalkundea eta produktuaren kalitatea» izan dira giltzarriak orain arte; aurten, baina, beste bat jarri du mahai gainean Patxi Baztarrikaren sailburuordetzak: «Irismena». Hori bihurtu dute gako: puntuazioaren %70 horren araberakoa da. Neurtzeko era: «Hedabide bakoitza irits litekeen herritarren artean zenbatengana iristen den». Hots, komunikabide bakoitzak zein eremu duen eta proportzioan zenbat herritarrek kontsumitzen duten. Sektorearekin adostu gabekoa da aldaketa.

Nazionalari kalte

Euskarazko kazeta nazionalari zuzeneko kaltea egin dio irizpide berriak. Kontua da hedabide guztiak elkarren parean jarri dituztela: doakoak eta ordainpekoak, tokikoak eta nazionalak. Bi aldeetatik jasan du kaltea BERRIAk: Euskal Herri osoa du eremu —leku euskaldunak eta erdaldunak, irismen handikoak eta txikikoak—, eta irakurleek ordaindu egiten dute —ez da hedabide guztien kasua: batzuek banaketa orokortua dute, debaldekoa—. Tokiko hedabide gehienek diru gehiago jasoko dute. Hedadura handiko hedabide izateak soilik hamar puntu eman ditu. Kalitatea eta horrelako irizpiderik ez da ageri listan.

Hain justu, kalitatea hobetzeko bide betean ari denean jo dio kolpea Jaurlaritzak BERRIAri. Uda aurretik jarri zuen martxan proiektu berritua —informazio landuagoa, igandeko ale berezia...—, eta oso harrera ona izan du. Interneteko atari berritua ere abian du, eta jarraitzaileak irabazten ari da —Interneteko laguntzan igoeratxoa dago, 4.700 eurokoa; ezdeusa da, jaitsiera orokorraren aldean—.

Panorama berria ekarri du Internetek komunikabideetara: paperaren krisia esaten diote. Krisi ekonomikoarekin topo egin du, gainera: publizitatea asko jaitsi da, eta erosleetan ere nabari da, nahiz eta BERRIAk beste hedabide batzuek baino hobeto eutsi dion. Ez dira urte errazak, nolanahi ere. Mozketak izan dira taldean: langileei soldata jaitsi diete, eta lanpostu batzuk ere desegin dituzte.

Azken urteetan ez bezala, diru laguntzak igo ditu Jaurlaritzak aurten, baina erdarazko hedabideentzat izan dira, haietan euskarazko berri batzuk sar ditzaten. BERRIArentzat, berriz, 200.000 euro gutxiago izan dira. Helegitea aztertzeaz gain, beste erantzun bide batzuk ere aztertzen ari dira.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Korrikaren lekukoak badu nondik nora ibili

Korrikaren lekukoak badu nondik nora ibili

Julen Aperribai

Korrikaren ibilbidearen berri eman dute: Mendebaldean hasiko da, eta Gasteiz izango da igaroko duen lehen hiriburua. 2.180 kilometro eginda, Donostiara iritsiko da lasterketa. Ikusi egunez eguneko ibilbidea eta ordutegia albiste barruan.

Manu Cabacas eta Fina Lizeranzu, Iñigo Cabacas semea gogoratzeko ekitaldi baten. ©ARITZ LOIOLA / FOKU

Cabacasen gurasoek auziari buruzko txostenak eskatu dizkiote Erkorekari

Edurne Begiristain

Komunikabideetara igorritako gutunean, esan dute «samina» eragin diela Ertzaintzak barne ikerketa itxi izanak, eta Erkorekari galdegin diote euren esku uztea Segurtasun Sailak auziari buruz duen dokumentazio guztia. Bilera eskatu diote Segurtasun sailburuari.

Sagardui, duela egun batzuk egindako agerraldian. ©MONIKA DEL VALLE / FOKU

Intzidentzia tasa jaitsi dela esan du Sagarduik, baina «zuhurtzia» eskatu du

Jone Arruabarrena

Osasun sailburuak adierazi du Osakidetza «beharrezkoak diren proba guztiak» egiten ari dela. Ospitaleratzeen datuek, berriz, gora egin dute

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.