Albistea entzun

OSASUNA. 2. LAS PALMAS. 2

Modurik mingarrienean

Osasuna 2-0 jarri da, baina bigarren zatian bi gol jaso ditu, bigarrena 91. minutuan. Martinek aldagelan segitu du partida, bularrean mina sentitu baitu lehia hasieran
David Garcia Las Palmasekoa, berdinketaren gola ospatzen. David Garcia, Oier, Unai Garcia eta Nauzet Osasunakoak ageri dira ere, lur jota.
David Garcia Las Palmasekoa, berdinketaren gola ospatzen. David Garcia, Oier, Unai Garcia eta Nauzet Osasunakoak ageri dira ere, lur jota. JESUS DIGES / EFE

Eñaut Agirrebengoa -

2016ko urriak 2 - Iruñea

Golak. 1-0: Roberto Torresek, penaltiz (7. min.). 2-0: Sergio Leonek (45. min.). 2-1: Vicentek (57. min.). 2-2: David Garciak (91. min.). Epailea. Iglesias Villanueva. Txartel horiak: Osasunako Unai Garciari, Faustori eta Nauzeti; eta Las Palmaseko Aythamiri, Livajari, Micheli eta Tanari. Bestelakoak. 15.415 ikusle Sadarren.

Asteak zeramatzan Osasunak sasoiko lehen garaipenaren peskizan. Lehen sei partidetan ez zen irabazteko gai izan; beraz, jada egoera nahiko makurrean zegoen. Lehenbailehen zeukan suspertu beharra. Testuinguru horretan iritsi zen atzo Las Palmasen kontrako partidara. Sadarko berdegunera irten eta berehala, premia nabaritu zitzaion gorritxoei: garaipen gose handia zuten. Hainbeste amestutako saria lortzear izan ziren, baina zorteak, atzera ere, bizkarra eman zien. Futbolaren alderdirik ankerrena ezagutu zuen atzo, garaipenak norgehiagokaren azken hatsean egin baitzien ihes. Modurik mingarrienean agur esan zioten hainbeste behar eta desiratzen zuten garaipenari.

Neurketari kementsu ekin zioten gorritxoek, beldurrik gabe, azken asteetako emaitzak ahaztu izan balituzte bezala. Ausardiak saria izan zuen, partida hasi eta berehala sartu baitzuten lehen gola. Kevin Prince Boatengek baloia eskuarekin ukitu zuen area barruan, eta epaileak penaltia adierazi zuen. Ez zuen barkatu Roberto Torresek, Vila-realen egin bezala. Hortik aurrera, gorritxoek ideiak oso garbi zituztela erakutsi zuten. Atzean sartu ziren, eta zirrikitu guztiak itxi zizkioten Las Palmasi, zelai erdiko lerroaren lan bikainaren laguntzaz. Baloia bisitariek zuten nabarmen, baina ez zeuden batere eroso, ez baitziren gai taxuzko jokaldiak egiteko.

Halako egoeran, Osasuna zen eroso zegoena. Une oro bere zelaian sartuta, bai, baina bere arean gehiegi sufritu gabe. Erasoko jokoari zerbaiterako egin zion muzin. Las Palmasi min egiteko zuen aukera bakarra Sergio Leon aurrelariak jokaldiren bat asmatzea zen. Eta lehen zatia amaitzear zela, jokaldia ez, maisulana asmatu zuen aurrelari espainiarrak. Roberto Torresen pase luze bat jaso, arean sartu, eta David Garciari hirutan izkin egin ostean, baloia hanka azpitik sartu zion Lizoain atezainari. Horrenbestez, 2-0ekoarekin joan ziren gorritxoak atsedenaldira.

Eskarmentu falta

Zaleak nahiz jokalariak gozatu galanta ari ziren hartzen. Aski izan ziren 45 minutu taldearen inguruan sortutako kezka guztiak ahazteko. Alabaina, oraindik norgehiagokaren erdia falta zen. Las Palmas gozakaitz zebilen, baina nafarrak ezin ziren lokartu. Izan ere, Espainiako taldeak goi mailako jokalariak ditu, eta gutxien espero den momentuan, min egiteko gaitasuna dute. Horrela iritsi zen 2-1ekoa: Osasuna ondo zegoen paraturik zelaian, kontrolpean zuen partida, baina area ertzetik egindako erdiraketa batean baloia sareetara bidali zuen Vicente Gomezek. Berenguerrek hegalean ez zuen behar bezala presio egin, eta area barruko zaintzan ere gorritxoak ez ziren fin ibili.

Hortik aurrera, artega aritu zen Osasuna, esku artean zuen saria galtzeko beldurrez. Las Palmas itsu-itsuan joan zen erasora, baloia behin eta berriro erdiratuz gorrien areara. Etengabea zen bisitarien jazarpena. Gorriei partidaren kontrola mantentzeko eskarmentua falta izan zitzaien, eta, hala, 91. minutuan, Las Palmasek, gola sartu, eta berdindu egin zuen, korner bateko aldaratzea baliatuta. Kolpeak hotz utzi zuen Sadar. Enrique Martin Monrealek, ordea, ezin izan zuen bertatik bertara ikusi amaiera mingarria. Osasunaren lehen golaren ostean ondoezik sentitu zen, eta aldagelara eraman zuten. Hobera egin zuen, baina Nafarroako Unibertsitateko Klinikara eraman zuten, badaezpada, iaz ere bihotzeko arazoak izan baitzituen.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Realeko jokalariak Take Kuboren gola ospatzen, gaur, Cadizen (Espainia). ©Roman Rios / EFE

Realak Kuboren gol bati esker irabazi du Cadizen

Paulo Ostolaza

Txuri-urdinek gogor lan egin behar izan dute, baina japoniarrak 24. minutuan sartutako golak balio izan die. Debuta egin dute Brais Mendezek eta Momo Chok ere.

Orioko arraunlariak garaipena ospatzen, atzo, Ondarroan (Bizkaia). ©Aritz Loiola / Foku

Oriok hirugarren aldiz irabazi du Euskotren Liga

Berria

Hamalau ehuneneko eskasegatik irabazi du gaur Castro Urdialesen, eta denboraldiko hamargarren bandera astindu du. 

 ©ARITZ LOIOLA / FOKU

«Denboraldi hau niretzat azkena balitz bezala gozatuko dut»

Pettan Uralde

Hamalaugarren denboraldia du De Marcosek Athleticen, eta egunez egun gozatzeko ideiarekin ekin dio sasoi berriari. Guardiako jokalariak Europan kokatu du taldearen helburua, eta lortuko dutelakoan dago.
Hondarribia garaipen bat ospatzen, artxiboko irudi batean. ©Oskar Matxin Edesa / Foku

Hondarribiak irabazi du Castro Urdialesen, eta sailkapena estutu du

Berria

Pasa den asteburuko kolpeari buelta eman dio Ama Guadalupekoa-k. Urdaibaik bigarren amaitu du, eta ondo eutsi dio lidergoari.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...