Estua zetorren, eta estua da oraindik ere
Hitz bakar bat nahikoa zen emakumezkoen Kontxako Banderaren lehen eguna nolakoa zetorren adierazteko: berdindua. San Juan, Hibaika eta Zumaia bata bestetik gertu zeudela jakina zen, eta Oriok hortzak erakuts zitzakeela ere bai. Bietatik bat bete zen herenegun: aurreneko baieztapena. Bata bestetik oso gertu amaitu zuten hiru faborito handiek, estropada bikaina egin eta gero. San Juanek du aldea, baina segundo bata eta 32 ehunenera dauka Hibaika, eta 4,48ra Zumaia. Orio atzerago ibili zen, 16,72 segundora.
Berdindua zetorren, estua aurreikusten zen, eta berdindua eta estua da oraindik, horrenbestez. Dena dago erabakitzeko bigarren igandera begira. Ez da betiko esaldia oraingoan edozeinek irabaz dezakeela esatea. Aldea San Juanek du, baina estropada nola joan zen ikusita, ez dira poz-pozik egongo, agian. Izan ere, hasieratik hartu zuten burua, eta gero Hibaika, zeina gertuen izan zuen, bospasei segundora ere eduki zuen. Kanporanzko luzean, biziago joan zen San Juan lehen kaletik Hibaika laugarrenetik baino. Eta, tartean, Zumaia izan zuten lehen ziabogan, bigarren izan zelako pasaitarren atzetik.
Bueltako luzean, aldatu egin zen estropada. Hasieran, San Juanek Hibaikarekiko aldeari eutsi zion, eta handitu egin zion tartea Zumaiari. Hibaikak harrapatu egin zuen Zumaia, eta pasatu ere bai gero. Segundoz segundo pasaitarren aldeko aldea txikituz joan zen, eta, azkenean, gainean izan zuen Hibaika. Zer dira ba segundo eta erdi horiek? Zumaia ere gainean daukate, baina horiei lan zaila geratzen zaie iganderako, bi aurkari gainditu behar dituelako iazko garaipena berriz lortzeko. Biren arteko lehia ematen du izango dela, eta ia ziurtzat jo daiteke estua izango dela.
Gaiak
Astekaria
Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.
