Beste kapitulu bat gehiago

Ekainaren amaiera aldera hasi zen arraun mundua traineru denboraldiko aurtengo liburua idazten. Burutu dituzte hainbat kapitulu, ia denak San Miguel ligaren barruan eta beheko ligetan, eta kapitulu bereziena idazten hasteko eguna zuten atzo: Kontxako bandera izenburupean jarrita egon ohi dena. Eta ez zituzten kontu originalak utzi testuen artean. Beste kapitulu bat gehiago izan zen atzokoa, sailkatze estropadarena. Datu batek agerian uzten du hori: San Miguel ligako lehen seiak eta Urdaibai ariko dira bandera preziatua lortzeko lehian datozen bi igandeetan.

Zazpikote horretan, Hondarribiak, Urdaibaik, Oriok eta Kaikuk idatzi dituzte udan testu onenak, eta atzo beste orrialde bat gehiago gehitu zioten aurrez idatzitakoari. Batere arazorik gabe lortu zuten erlojupekoan sailkatzea. Lau aurrenetan sartu ere; lau onenak izan ziren. Kaiku izan zen biziena, Urdaibaik egin zuen atzetik, Hondarribiak hirugarren bukatu zuen, eta Oriok laugarren. Lauren artean 11 segundo eskas baino ez ziren egon, orain arteko estropada askotan gertatu den bezala. Hori hala izanik, gerta zitekeen lauren arteko beste hurrenkera bat izatea, eta ez zen inor harrituko, baina betiere laurak barruan izanda.

Kanpoko ziabogan ere, nola ez, laurek egin zuten denborarik onena. Orio eta Hondarribia izan ziren azkarrenak (10.14), eta atzetik zituzten Kaiku, segundo batera, eta Urdaibai, hirura. Bueltako luzean, bi bizkaitarrek irauli egin zuten kanpoko sailkatzea. Ez du ematen bide zuzena denik aldaketa horretatik ondorioak ateratzea. Ezin da ondorioztatu poparean bi gipuzkoarrak baino azkarrago dabiltzanik bi bizkaitarrak. Udako kapituluetan bestelako kontuak ere idatzi izan dituztelako. Ondorengoa da atera behar dena eta oso kontuan eduki beharrekoa: ez dago alderik lauren artean. Oso tarte txikian dira.

Ez zen duda handirik lau handiak barruan izango zirela; bestelako kontuak ziren beste hirurak asmatzeko orduan. Era eta kolore guztietako pronostikoak ziren bazterretan. Hiru leku eta hautagai asko. Azkenean, Cabok, Portugaletek eta San Juanek lortu zuten udako sari potoloa. Estropadaren aurretik inor gutxik jartzen zuen zalantzan galiziarrak barruan izango zirela, baina ziabogan estuago zeuden gauzak. Izan ere, Cabo zazpigarren izan zen kanpoko balizan, eta gainean zeuzkan Astillero, Zierbena, San Pedro eta Tiran. Sei segundoan zeuden laurak, eta garbi zegoen bueltako luzeak erabakiko zituela kontuak. Itsasoa narras antzean zegoen kanpoan, ez zen olatu garbi-garbia poparean gozo etortzeko, eta erabat asmatu beharra zuten sailkatu nahi zutenek.

Cabok bizi egin zuen azkeneko luze hori, eta onenetakoa izan zen bigarren luze hori egiten. Lau handien atzetik bera izan zen onena, azkenean. Galiziarrek denboraldi bikaina egin dute ligan, eta orain arteko lana biribildu zuten atzo.

Beste bi leku zeuden dantzan, eta, azkenean, uste baino tarte handiagoarekin lortu zuten saria Portugaletek eta San Juanek. Bizkaitarrak pattal ibili dira udan, espero zutena baino maila apalagoan, baina arantza ateratzea lortu zuten atzo, eta, iaz bezala, Kontxan aritzeko txartela eskuratu zuten. Seigarren denbora onena izan zen Portugaleterena. San Juanek egin zuen zazpigarren onena. Helmugan sartzen aurrenetakoa izan zen, eta oso denbora ona egin zuen. Baina sei ontzik aurreratu zuten gero. Horrela kontatuta, larri ibili zela pentsa daiteke, baina, azkenean, San Juanek hamabi segundo sartu zizkion zortzigarrenari, Tirani. Iaz kanpoan geratu eta gero, pasaitarrek arantza hori ateratzeko aukera izango dute etzi eta etzi zortzi.

Kanpoan geratu zirenen artean, San Pedro aipatu behar. Azkenaldian dotore ibili arren, atzo ez zuen emaitza ona lortu, eta sailkatzetik hamalau segundora geratu zen. San Miguel ligako kanporaketakoen artean kontuan hartzeko datu bat ere utzi zuen atzoko estropadak: Astillerok bi segundo sartu zizkion Meirari, hamazazpi Getariari, hemeretzi Zumaiari, eta 36 Amegroveri. Bi asteburu barru izango dute bost ontzi horiek lehia, eta erreferentzia onak izan daitezke atzokoak.

Bizkaitarrak, lehen txandan

Sailkatze estropada bukatuta, ez pentsa sailkatu ziren taldeak lasaitu egin zirenik. Igandeko txanda zozketa egin beharra zegoen segituan, eta, egin eta gero, lasaitu ederra hartuko zuten Kaikuko eta Urdaibaiko ordezkariek. Izan ere, aurreneko txandan ariko dira biak, Portugalete eta Caborekin batera. Gipuzkoarrak, laurak, bigarrenean egokitu dira: Orio, Hondarribia, San Juan eta Donostiarra.

Eguraldiak okerrera egiten du, normalean, bigarren txanda hasten denerako, haizeak gora egiten duelako, eta horregatik, ez ziren batere gustura Orio eta Hondarribia. Ikusi egin beharko da gero zer gertatzen den, baina aukeran emanez gero, lehen txandan nahiago izaten dute denek. Beste kapitulu bat gehiago izateko itxura hartuta dator etzikoa, baina orrialde traketsean idazteko arrisku larrian dira Gipuzkoakoak. Ea nork idazten duen orrialderik politena.