'Brexit'-aren garaipena. EBren bilera

Hainbat abiaduratako Europa proposatu dute EBren estatu sortzaileek

Erresuma Batuari lehenbailehen joateko eskatu diote Europako ordezkariek. Eskoziak, independentziaren erreferenduma abiatzeko legedia martxan jarri, eta EBrekin bilera eskatu du
FACUNDO ARRIZABALAGA / EFE Tamaina handiagoan ikusi

Amagoia Mujika Tolaretxipi -

2016ko ekainak 26

«Inork ez digu Europa kenduko». Gogortasunez hitz egin du Frank-Walter Steinmeier Alemaniako Atzerri ministroak, brexit-az gero Europako Batasunak egin duen lehen bileraren ostean. EB sortu zuten herrialdeen ordezkariek egin dute bilera Berlinen: Alemaniako, Frantziako, Italiako, Belgikako, Herbehereetako eta Luxenburgoko Atzerri ministroek. Premiazko bilera egin dute Europako norabide berriaz eztabaidatzeko, eta datorren astetik aurrerako estrategiak markatzeko. Ihesaldi gehiagorik ez egoteko Europak hartu behar duen norabide berriaz egin dute gogoeta, eta Erresuma Batuari eskatu diote negoziazioak lehenbailehen has ditzatela.

Jean-Marc Ayrault Frantziako Atzerri ministroak berretsi egin du EBko buruzagiek herenegun emandako mezua: lehenbailehen joateko «presio handia» egingo diote David Cameron Erresuma Batuko lehen ministroari datorren astearteko bileran. Jean-Claude Juncker Europako Batzordeko presidenteak esan bezala, dibortzioak «azkarra» izan behar du, Ayraulten ustez ere, «ez aurrera ez atzerako egoera saihesteko».

Erresuma Batuaren erabakiak hankaz gora jar lezake batasuna, eta horregatik azkartu nahi dute banaketa prozesua. Baina alde egiteko gogoa ez dadin beste herri batzuetara zabaldu, EBn erreformak egin behar direla ondorioztatu dute, herri bakoitzaren neurrikoa izan dadin egitura: alegia, abiadura ezberdineko Europa proposatu dute. Dagoeneko praktikan gertatzen da hori, baina bide horretan sakondu nahi dute, «malguagoak izan», Steinmeierren arabera, inplikazio ekonomiko eta politikoak herrialde bakoitzaren neurrira izan daitezen. «Ardura berezia daukagu orain Europak noranzkoa bideratzeko beharra daukanean».

Alemaniako Atzerri ministroak euroeszeptikoei ere hitz egin die: «Ez dugu paralisirik edo histeria egoerarik onartuko». Herenegun Europako eskuin muturreko hainbat buruzagik erakutsitako poztasunari erantzun dio horrela. Marie Le Pen Frantziako Fronte Nazionaleko buruak eta Geert Wilders Herbehereetako eskuin muturraren buruzagiak esan zuten erreferenduma nahi zutela Europari agur esateko.

Berlinek eta Parisek dokumentu bat idatzi dute dagoeneko Europako Batasun malguago baten alde, eta datozen egunetan xehatuz joango dira gainerako estatukideekin. Autokritika egiten dute lehenik, eta euroeszeptikoen gorakada geratzeko helburu duen proposamena egiten dute ondoren. Askatasun handiagoa izateko bidea diseinatuko dute, eta gogoeta zabaldu Europaren erronka garrantzitsuenei buruz: errefuxiatuak, langabezia, eta indarkeria jihadista; horiek jo dituzte, besteak beste, erronka nagusitzat.

Eskozian, independentzia

Eskoziak, berriz, Europako Batasunean geratzeko prozesuari «lehenbailehen» ekingo dio, Nicola Surgeon Eskoziako lehen ministroak jakinarazi duenez, gobernuko kideekin atzo premiazko bilera egin ostean. Batetik, Europako instituzioei eskatu die elkarrizketak berehala hasteko, «Eskoziak Europako Batasunean duen lekua babesteko», eta, bestetik, iragarri du legedia prestatzen hasi direla elkarrizketok izaten diren bitartean, Eskozian independentziari buruzko bigarren erreferenduma egin ahal izateko. «Independentziari buruzko bigarren erreferendumak mahaian egon behar du». Egutegi zehatz batean aukera bideragarria izan dadin, orain egingo dira urratsak, beharrezko legedia indarrean dagoela ziurtatzeko.

2014an egindako independentziari buruzko erreferendumean ezezkoa ateratzeko arrazoietako bat Europako Batasunetik kanpo geratzeko arriskua izan baitzen; Erresuma Batuan geratzearen aldekoek emandako argudioa izan zen. Independentistek, ordea, beti agertu dute Europako Batasuneko kide izateko gogoa, independente izanda ere. Brexit-aren kontra bozkatu zuten eskoziarren %62k.

Ipar Irlandako errepublikanoek ere aukera historikoa ikusten dute Irlandarekin batzeko: Gerry Adamsek eta Martin McGuinnessek adierazi dute erreferendum bat egiteko aukera, Irlandara batzeko eta Europako Batasunean geratzeko.

Erresuma Batuan, egun batean milioi eta erdi sinadura baino gehiago jaso dituzte berriz erreferenduma egitea eskatzeko, Erresuma Batuko Legebiltzarraren webgunean. Emaitzak oso estuak direla-eta nahi dute galdeketa berriro egin. Eskatu dute erreferenduma onartzeko parte hartzeak %75etik gorakoa izan behar duela, eta baiezkoak %60 baino handiagoa.

Bien bitartean, dimisioak ematen ari dira Erresuma Batuko buruen artean. Herenegun David Cameronek urrian kargua utziko zuela esan eta gero, atzo Jonathan Hillek eman zuen dimisioa, Europako Batasuneko Finantzen Egonkortasunerako, Finantzen Zerbitzuetarako eta Kapitalen Merkatuko komisarioak.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

PCR probak egten, gaur goizean, Refenan. ©JESUS DIGES / EFE

Nafarroako sarrera-irteerak itxiko ditu gobernuak

Mikel P. Ansa

Lanerako edo arrazoitutako mugimenduak baimenduko dituzte, baina ez bestelakoak. Tabernak eta ostatuak ixteko ere agindu du Nafarroak; etxera eramateko janari-edariak soilik prestatu ahalko dituzte. Jarduera guztiak itxiko dituzte 21:00etan, eta garraio publikoa %50era mugatuko dute. Ostegunean indarrean egongo dira neurriak.

PCR probak egiten, Ordizian, uztailaren hasieran izandako agerraldian ©juan Herrero / EFE

«Transmisio handia» egon arren, Jaurlaritzak baztertu egin du intzidentziarik handieneko herriak ixtea

Irati Urdalleta Lete

Baheketa selektiboak egingo dituzte Ordiziako eta Durangoko 13 eta 40 urte arteko herritarren artean.

Taberna baten barnealdea, Iruñean ©Jesus Diges / EFE

Hego Euskal Herrian 1.123 positibo atzeman dituzte

Berria

Kezka dago Azpeitiko, Azkoitiko, Beasaingo eta Ordiziako egoerarekin, azken hamalau egunetan 100.000 biztanleko 1.000tik gora positibo izan dituztelako

PCR probak egitek gunea, Donostiako Ospitalean, abuztuan. / ©Idoia Zabaleta, Foku

Jaurlaritzaren neurri berriak beranduenez ostegunean sartuko dira indarrean

Jon Ordoñez Garmendia

Garbiñe Biurrun EAEko Justizia Auzitegi Nagusiko behin-behineko presidenteak esan du gobernuaren eskaerak lehentasun osoa izango duela. Ipar Euskal Herrian eta Nafarroan ere baliteke neurriak zorroztea aste honetan.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna