Noiz sortua: 2016-02-06 00:30:00

Kontxu Odriozola hil da

Maria Luisa baino gehiago

Kontxu Odriozola aktore azpeitiarra hil da.

Antzerkian eta zineman aritu zen, baina 'Goenkale' telesailean egin zen ezagun, Maria Luisa Galardiren rolagatik
Kontxu Odriozola aktorea Arraldeko Boga tabernako barraren atzean gogoratuko dute askok, Maria Luisa Galardiren rolean.
Kontxu Odriozola aktorea Arraldeko Boga tabernako barraren atzean gogoratuko dute askok, Maria Luisa Galardiren rolean. IMANOL OTEGI / ARGAZKI PRESS

Ainhoa Sarasola -

2016ko otsailak 6

Urteetan, egunero, Euskal Herriko etxe askotako sukalderaino sartzen zen afalostean. Jenio biziz sarri, goxo beste askotan, senarraren eta semeen ibilerek kezkatuta hainbatetan, herrikideak larrutzen beste batzuetan... Ia familiakoa bihurtu zen etxe horietan, eta, horregatik, Maria Luisa Galardi ikusiko dute askok Kontxu Odriozola gogoratzean. Baina ezagun egin zuen Goenkale-ko pertsonaiatik harago, euskal antzerkian eta zineman ere arrastoa utzi du. Euskal aktoreen artean publikoak maitatuenetakoa izan dena atzo zendu zen, 70 urterekin, minbiziaren ondorioz.

Azpeitian (Gipuzkoa) jaio zen Odriozola, Eliz kalean, 1945eko San Fermin egunez. Azpeitiarra zuen aita, eta Urrestillakoa ama. Herriko eskolan hasi, eta Miserikordiakoan jarraitu zuen ikasten. Han egin zituen lehen antzezlanak, bere ibilbideari buruzko liburua osatzeko —Kontxu Odriozola, antzerkia bizitzaren edergarri, 2002—, Pako Aristiri kontatu zionez. Garai bertsuan, herriko talde amateurrek Luistarren lokal batean egiten zituzten entseguak. Hara maiz joaten zen aitarekin; izan ere, margolaria izanik, gazte haiei dekoratuekin-eta laguntzera joaten zen. Bazter batean, isilik egoten zen Odriozola, aktoreei beha. Han piztu zitzaion harra, antzerkirako nahia. Aitak lagundu zion zaletasun harekin; amak, ordea, ez zuen begi onez ikusten. «'Hori dana txorakeria da', esaten zuen. Debekatu inoiz ez zidan egin, baina haizerik eman ere sekula ez». Baina haurtzaroko garai haietan irudimenak eta jakin-minak gainezka egiten zioten, eta frankismopeko giro grisean, zinema, irratia, esku artera iristen zitzaion edozein testu... ihesbide zitzaizkion, baita antzerkia ere. 14 urterekin parte hartu zuen lehen aldiz obra batean.

Gaztetan, irakasle izateko ikasketak egin zituen, eta ikastoletan hasi zen lanean. Errenterian lehenik, Azpeitian gero —lehen ikastolako aurreneko andereñoetako bat izan zen—, eta Donostian geroago, 17 urtez jardun zuen irakasle. Imanol Zinkunegi errezildarrarekin ezkondua zen ordurako. Haur txikiekin aritzen zen, antzezten eta abesten. Donostiara aldatu ziren, eta Axular lizeoan aritu zen. Baina antzerkizaletasuna ez zitzaion batere apaldu urte haietan. Bikoizketa eskolak ere hartu zituen, eta haiek bukatzear zela jakin zuen Antzerti eskola irekitzekoak zirela. Erabakia ez zen samurra; soldata polita zuen, hiru seme-alaba, eta 36 urte. Haren ama ere etxean zuten. Eskolak aurrera jarraituko zuen ere ez zekien ziur. Baina ez zuen aukera galdu nahi izan, eta jauzia eman zuen. Lanpostua utzi, eta beka batekin sartu zen eskolara. Gazteagoak ziren kide gehienak, baina adinkide batzuk ere baziren han, gerora maiz lankide izan zituen Mikel Garmendia eta Arantxa Gurmendi, tartean. Goxoak zituen orduko oroitzapenak.

Hiru urte eman zituen eskolan, eta, pixkanaka, hainbat antzezlanetan hasi zen lanean. Troiarrak, Aspirina para dos, Pipin... Tragedia izan, komedia zein musikala, denetan aritzen zen gustura. Baina antzerkian beti izaten dira geldialdiak, eta, haietako bat baliatuta, langabezian zirela otu zitzaien Elena Irureta eta biei zerbait martxan jartzea. Erabateko arrakasta izan zuen Ama Begira Zazu-k, eta herriz herri ibili ziren biak, Mikel Garmendia eta Jose Ramon Soroizekin, Eneko Olasagastiren zuzendaritzapean, obra eskaintzen. «Gogorra izan zen, baina hasieratik ikusi genuen funtzionatzen zuela, jendeak tripak botatzen zituela». 200 emanaldi baino gehiago egin zituzten.

Profesioko kideen aitortza

Zineman ere aritu zen, baina ez nahi adina, aitortzen zuenez. Anjel Lertxundiren Hamaseigarrenean aidanez filmean (1985) protagonista aritu zen, eta taldeko aktore gisa beste hainbatetan, La conquista de Albania (1983) eta Crónica de la Guerra Carlista (1998) lanetan, adibidez. Telmo Esnalen Urte berri on, amona! (2011) filmean jokatutako rolagatik ere gogoratuko dute askok.

Aktore ezaguna zena are ezagunago bilakatu zuen telebistak. Bai horixe (1986) eta Flamingo berria (1993) saioetan parte hartu ostean hasi zen lanean Goenkale telesailean. 14 urtez jardun zuen Arraldeko Maria Luisaren rolean; horrek nekatu egin zuela eta saioa bera ere asko aldatu zela esan zuen, uzteko erabakiaz galdetuta, 2008an egunkari honi eskainitako elkarrizketan: «Kalitateari ez zaio garrantzirik eman, eta horrek ukitu egin nau». Hiru arloetatik maiteen zuena izanik, ez telebistaren garaian ez gero, Odriozolak ez zion utzi antzerkia egiteari. Azken urteotako lanen artean daude Ezetz lepoa jarri (2005) eta Lapur-zuloa (2007).

Urteotan, hainbatetan egin diote aitortza haren lanari. 2005ean, omenaldi beroa jaso zuen Donostiako Kursaalean, Olentzero Begigorri jaialdian. 2010ean, lankideen eskutik jaso zuen gorazarrea, Euskal Aktoreen Batasunak Besarkada saria eman baitzion.

Txikitan harrapatu zuen aktore senak ez zuen inoiz askatu. «Sendatuko banintz, paper txiki batzuk egingo nituzke», esan zion iragan abenduan Uztarria agerkariari. Ez da posible izan.

Ez da Odriozolaren aldeko hiletarik izango, baina antzerkigintza eta zinemako kideek hura omentzeko ekitaldia egingo dute aurki.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Covid-19 daukaten gaixoak zaintzen duten bi erizain besarkatzen 55 egun gaixo zeraman gizon bat sendatzean. ©Andoni Lubaki / Foku

Koronabirusaren azken datuak

Berria

Euskal Herrian 31.166 gaixok eman dute positibo guztira, koronabirusa atzemateko probaren bat eginda. Horietatik 2.150 hil dira. Grafikoak, albiste barruan.

Osakidetzako langile bat Txagorritxuko laborategi batean lanean. ©Gorka Rubio, Foku

Justizia Auzitegi Nagusiak ebatzi du Osakidetzak arriskuan jarri dituela langileak

Ainhoa Larretxea Agirre - Mikel P. Ansa

Osagileen sindikatuek jarri zuten salaketa, eta ekainaren 16an egin zuten epaiketa. ESK sindikatuak Nekane Murga Osasun sailburuaren eta Osakidetzako zuzendaritzaren dimisioa eskatu du. Osakidetzak, ordea, «positibotzat» jo du ebazpena, epaileak atzera bota dituelako sindikatuen «eskari gehienak».

Jendea paseoan, konfinamendua arintzeko lehen fasean. ©JON URBE/ FOKU

Jaurlaritzak ziurtatu du COVID-19aren agerraldiak «kontrolatuta» daudela

Irati Urdalleta Lete

Beste hamalau positibo eta hiru hildako daude. Jaurlaritzak pentsatu du neurriak areagotuko dituela jende pilaketak «mantenduz eta orokortuz» gero

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna
Ainhoa Sarasola

Informazio osagarria

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna