Albistea entzun

Nafarroako barometroa. Podemos

Podemosen 'Ferraz'?

Haren antolaketa irizpideek diote lurraldeetako gai nagusietan Estatu Biltzarrak erabakiko duela
Pablo Iglesias, joan den urriaren 18an, Madrilen, Podemos alderdiaren Herritarren Estatu Biltzarrean hizketan.
Pablo Iglesias, joan den urriaren 18an, Madrilen, Podemos alderdiaren Herritarren Estatu Biltzarrean hizketan. ZIPI / EFE

Enekoitz Esnaola -

2014ko azaroak 22

Moncloa. Espainiako Estatua eraldatzeko Moncloan agintzeko helburua du Podemosek. Berez, urtebete barru izango dira Kongresurako eta Senaturako hauteskundeak, eta parte hartuko du Podemosek. Lehentasun ditu. Baina aurretik izango dira —maiatzean— udal eta toki batzuetan foru / erkidego bozak. Nafarroan baluke egoera berezi bat: UPNren gobernu alternatibo bat eratzeko nahia eta aukera balu, hain segur aldez edo moldez EH Bildurekin ere kontatu beharko luke, eta, Nafarroa Espainiarentzat estatu auzia izanda, orduan zer?

Podemosek joan den urrian onartu zuen, besteak beste, antolaketa eredua, aldeko 90.451 botorekin eta %80,71ko babesarekin. Pablo Iglesias, Iñigo Errejon, Juan Carlos Monedero, Carolina Bescansa eta Luis Alegre boskoteak proposatu zuen antolakuntza irizpideen dokumentua —Podemosen sortzaileak dira—, eta 8. artikuluak esaten du lurralde mailako ildo nagusiak Herritarren Estatu Biltzarrak erabakiko dituela: «Podemos estatu organizazio bat da [...]. Herritarren Estatu Biltzarrari dagokio (hau da, Podemoseko kide guztiei), edo bere ordezko izendatzen dituen organoei, Podemos osoan eragiten duten erabakiak hartzea, zernahi ere den gaia (sektorea edo lurraldea). Herritarren Estatu Biltzarrari dagokio, edo bere ordezko izendatzen dituen organoei, erabaki guztiak hartzea ekintza politiko orokorraren lerro nagusiez, organizazioaren helburuez, finantzabideez, ordezkaritza eta ekinaldi juridikoez, hauteskundeetako estrategia orokorren planifikazioaz, beste talde sozial eta politikoekiko hitzarmen politiken edo aliantzen definizioaz, eta abar [...]».

8. artikulua dela-eta lehengo astean Patxi Zabaleta Aralar-NaBaiko parlamentarioak ETB1eko solasaldi batean zioen Podemosek «bere Ferraz» duela. Zabaletak ere ondotxo daki zer esan nahi duen Ferrazek: 2007an PSOEren zuzendaritza nagusiak eragotzi zuen PSNk NaBai eta IU-EBrekin gobernatzea Nafarroan, UPNren alternatiba eratuta. Aurten ere PSOEk Madrilen, Ferrazko egoitzan erabaki du PSNk ez babestea Yolanda Barcina Nafarroako Gobernuko lehendakariaren aurka Bildu, Aralar-NaBai, Geroa Bai eta Ezkerrak bozkatuko zentsura mozioa —ez zen atera aurrera—.

Podemosen organigraman Herritarren Estatu Biltzarra da «erabakigune organo gorena». Antolaketa irizpideetako 11. artikuluan, hauteskundeen arloan, haren egitekoen artean dira «zerrendak osatzea, programak egitea, eta bozen aurreko edo ondorengo itunak onartzea edo baztertzea». Itunen kasuan 13. artikuluan zehazten du lurralde eremu txikiagoetan ere erabakiko duela biltzarrak, «Podemosen estrategia orokorrari eragitean».

10. artikuluak dioenez, «Podemos osatzen duten pertsona denek dute Estatu Biltzarrean uneoro hitza eta botoarekin parte hartzeko eskubidea». Erakundean izena emandako guztiek osatzen dute biltzarra (12. artikulua). Alderdiko webak dakarrenez, atzo 259.000 lagun pasa zeuden apuntatuta. Herri-hirikako datuak jarriak dituzte —azaroaren 16koak—, eta, Nafarroaren kasuan, adibidez Iruñean 908 lagun daude izena emanda —sailkapenean 38. tokian da— eta Tuteran 177. Bilbon 1.596, Gasteizen 983, Donostian 909.

Egituran hurrena zuzendaritza dator —Herritarren Kontseilua—. Haren eskumenetan dago «bereziki gai garrantzitsuak» daudenean lurralde mailako batzarrak deitzea —18. artikulua—.

Lurraldeek, «autonomia»

Lurraldeetako Zirkuluei hauteskunde arlorako-eta «autonomia» aitortzen die —32. artikulua—, «betiere Podemosen irizpide orokorrekin kontraesanik ez badute». Lurralde egiturak sortzeari ekin berri dio eta, beraz, ofizialki ez du erabakia Nafarroako Parlamenturako bozetara joango den. Aurkeztu eta emaitza onak balitu, ikusteko legoke zer rol jokatuko lukeen, norekin egingo lukeen bat, norekin ez...

Espainiako Estatuko hamazazpi erkidegoetatik bat da Nafarroakoa, eta estatuko biztanleen %1,3 baizik ez dira bizi bertan.

Europako hauteskundeen garaian ez bezala, Podemos-Ahal Duguk ez du Hego Euskal Herri bezala funtzionatzen. Orain bereizita daude: Podemos-EAE, Podemos-Nafarroa. Bien artean gune informatibo bat daukate.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Euskal Hirigune Elkargoko batzarra, joan den abenduan, Baionako Arteen Hirian. ©BOB EDME

Ezinegonak agerian, elkargoko aurrekontuaren eztabaidan

Ekhi Erremundegi Beloki

Martxoaren 4ko batzarrean bozkatuko dute Euskal Hirigune Elkargoko 2023ko aurrekontua. 2026 arte hogei milioi euro emanen dituzte herrientzat. Lurralde desoreka salatu dute hautetsi batzuek

Plaza Hutsan 350 lagun baino gehiago elkartu dira. ©SORTU

«Herrigintza aro berri bat pizteko oinarria» jarri du Sortuk Burlatan

Mikel Elkoroberezibar Beloki

Plaza Hutsa bete dute 350 lagunek baino gehiagok, herrigintzaren eta estrategia independentistaren arteko lotura sakontzeko helburuarekin.

Gregorio Eskuderoren aldeko manifestazioa, gaur, Orion. ©Gorka Rubio / FOKU

Gregorio Eskudero 70 urteko presoa Euskal Herriratzeko eskatu dute Orion

Berria

Eskuderori hirugarren gradua ezartzeko ere eskatu du Sarek. Orain, Dueñaseko (Espainia) kartzelan dago preso, lehen graduan.

 ©JON URBE / FOKU

«Ez genuen espero, identifikazio saioa egitea beti ukatu baitigute»

Xabier Martin

Merinok ez zuen espero, 40 urte pasatuta, segadan parte hartu zuten poliziak identifikatzeko saio batera deituko zutenik. Fisikoki aldatu arren, Merino ziur dago aurpegiez: «Haien eskuetatik pasatu garenok badakigu».

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.