Albistea entzun

Korsika 1. Euskal selekzioa 1

Zerbaiterako balio dezala

Euskal selekzioak penalti jaurtiketetan hartu du mendean Korsika, Ajaccion jokatutako partidan
Euskal selekzioko jokalariak, Korsikaren aurkako partida hasi aurretik, atzo, Ajaccioko Ange Casanova estadioan.
Euskal selekzioko jokalariak, Korsikaren aurkako partida hasi aurretik, atzo, Ajaccioko Ange Casanova estadioan. HARITZ GALLASTEGI

Julen Etxeberria -

2016ko maiatzak 28

Korsika. Jean-Louis Leca; Poggi, Bocognano, Modesto, Coulibaly, Lippini; Cabella, Pierazzi, Cahuzac, Cavalli; eta Santelli. Jokalari hauek ere aritu ziren: Vincensini, Aine, Cioni, Vincent, Marchetti, Vincent Leca, Romain, Benhaim eta Fogacci.

Euskal selekzioa. Iraizoz; Capa, Elustondo, Gurpegi, Garrido; Iturraspe, Rico; Xabi Prieto, Zurutuza, Yuri; eta Eraso. Jokalari hauek ere aritu ziren: Riesgo, Zaldua, Mikel Gonzalez, Ansotegi, Dani Garcia, Susaeta, Sabin Merino eta Markel.

Golak. 1-0: Santellik (20. min.). 1-1: Markelek (48. min.).

Epailea. William Lavis.

Bestelakoak. 3.000 ikusle inguru Ajaccioko Ange Casanova estadioan, tartean Euskal Herritik joandako hainbat jarraitzaile. Independentzia, Amnistia, Aitor eta Iñigo gogoan eta Korsika eta Euskal Herria Frantziaren kontra zioten pankartak izan ziren harmailan.

Hegazkinetik jaitsi berritan, burua udako oporretan zutela eta entrenamendu bakar bat ere egin gabe. Horrela ekin zioten euskal selekzioko jokalariek atzo Ajaccion Korsikaren aurka jokatu beharreko lagunarteko partidari. Ez zen inondik inora norgehiagoka bati behar bezala aurre egiteko modurik onena. Halere, bete egin zuten euren lana. Irabazi nahi zuten, eta irabazi egin zuten, penaltietan, arauzko denbora banakoarekin amaitu ondoren.

Mikel Etxarrik eta Jose Mari Amorrortuk prestatutako euskal selekzioak eutsi egiten dio emaitza bolada onari. Lau urte eta erdi daramatza partidarik galdu gabe, 2011ko Eguberrietan San Mamesen Tunisiaren kontra 0-2 galdu zuenetik. Ordutik bost partida jokatu ditu, eta ez du bakar bat ere galdu. Hiru irabazi ditu —6-1 Boliviari, 6-0 Peruri eta 0-1 Kataluniari— eta bi berdindu —bana Kataluniarekin eta Korsikarekin—. Bolada ona, ordea, ez da gaurko kontua. 2006ko maiatzean San Mamesen Galesen aurka 0-1 galdu zuenetik, Tunisia izan da euskal selekzioa mendean hartzeko gai izan den bakarra. Hamar urtean jokatutako 11 partidetatik zazpi irabazi ditu eta lau berdindu.

Estatistika onak dira, euskal selekzioak maila ona duenaren seinale. Hala ere, lagunartekoetan lortutako emaitzak dira horiek guztiak, zoritxarrez, lehiaketa ofizialetan parte hartu ezin duelako. Nolanahi ere, emaitza horiek guztiak baliagarriak dira aurkari izan daitezkeen selekzioen federazioen atea jotzerako orduan. Zenbat eta emaitza hobeak lortu, orduan eta ospe handiagoa izango du selekzioak, eta zenbat eta ospe handiagoa izan, orduan eta aukera gehiago egongo dira federazio garrantzitsuren batek aurkari izatea onar dezan. Ea atzoko neurketak horretarako balio duen.

Joko hobea bigarren zatian

Atzoko norgehiagokari dagokionez, denboraldi-aurreko partida baten tankera izan zuen, tentsiorik gabekoa. Hasieratik nabaritu zen jokalariak indarrez larri daudela. Hala ere, gogoa azaldu zuten. Hala, hasi eta berehala izan zuen euskal selekzioak lehen aukera, baina Xabi Prietok ez zuen asmatu Lecaren aurrean. Hain zuzen ere, Realeko erdilariak historia egin zuen atzo. Hamahirugarren aldiz jokatu zuen selekzioarekin, eta hortaz, norgehiagoka gehien jokatu duen jokalaria bilakatu zen, Igor Gabilondo eta Julen Guerrero atzean utzita.

Xabi Prietori falta izan zitzaion eraginkortasuna izan zuen Santellik 20. minutuan. Gorka Elustondori nagusitu zitzaion zelai erdian jauzi batean, eta bakarrik geratu zen Iraizozi begira. Korrika bizian hasi eta berehala iritsi zen areara, eta hor jaurtiketa neurtua egin zuen. Gola. Lehen aukeran asmatu egin zuten etxekoek. Ezin eraginkortasun gehiagorik erakutsi.

Golak indartu egin zuen bi selekzioen jokamoldea: euskal selekzioa baloiaren jabe egin zen, eta joko landua eginez saiatu zen arriskua sortzen; Korsikak, ordea, atzean sendo egon eta aukera zuenean kontraerasora ateratzearen alde egin zuen. Lehen zatia amaitzear zela, Capak aukera izan zuen berdinketa sartzeko, baina ez zen fin aritu errematean.

Susperraldia bilatuz, Etxarrik eta Amorrortuk talde erdia baino gehiago aldatu zuten atsedenalditik bueltan. Gurpegi aulkira joan zen, eta beraz, amaiera eman zion ia hogei urteko ibilbideari. Aldaketek laster eman zuten fruitua. Zurutuzak kornerra atera zuen, aldaratzea Susaetaren oinetara joan zen, eta hark erdiraketa ona egin zuen, Markelek buruz berdinketa egin zezan. 48. minutua zen. Euskal jokalarien poza, ordea, gutxi irautear izan zen, hiru minutu geroago Cabellak zutoinera bota baitzuen baloia.

Minutuek aurrera egin ahala, erritmoak behera egin zuen. Ez zen gol gehiago izan. Azkenean, penaltietan erabaki zen partidako irabazlea, eta 11 metroetatik euskal selekzioa nagusitu zen, hogei penalti jaurti ondoren (8-9).

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Irizpidea duzulako. Giroan zabiltzalako.

Zuk badakizulako.

Albiste gehiago

Gizonezkoen 23 urtez azpiko taldea, brontzezko domina jaso berritan, Gaur, Getxon. ©Lur Gil / BERRIA

Beste brontze batekin amaitu da Munduko Sokatira Txapelketa

Lur Gil

Gizonezkoen 23 urtez azpiko mailan lortu du gaur euskal selekzioak hirugarren postua. Osotara 7 domina geratu dira etxean: urrezko lau eta brontzezko hiru.

Olaizola eta Zabaleta, txapelak buruan, gaur Ogeta pilotalekuan. ©Jaizki Fontaneda/ Foku

Aimar Olaizolak azken txapel profesionala lortu du

Berria

Nagusi izan dira gorriak partidaren hasieratik.

Tolosaldeako arraunlariak, atzoko saioan. ©Aitor Arrizabalaga / FOKU

Tolosaldea eta Getaria maila nagusira igo dira

Berria

Hondarribia, ordea, jaitsi egin da, azken lau urteotan maila nagusian egon ostean. Getariak Eusko Label Ligarako txartela lortu du, gaurko saioan irabazita.

'Sotera' ontziko arraunlariak, gaurko garaipena ospatzen. ©Monika del Valle / FOKU

Santurtzik eraman du bigarren Eusko Label Liga jarraian

Berria

Bi segundo baino ez dizkiote atera santurtziarrek oriotarrei, emozio handiko estropadan.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Egin BERRIAlaguna

Irizpidea duzulako. Giroan zabiltzalako.

Zuk badakizulako.

Egin BERRIAlaguna